ພາສາຍີ່ປຸ່ນ

Project Description

ຫຼັກສູດ: ປະລິນຍາ​ຕີ 4 ປີ

ຄະນະອັກສອນສາດ

ມະຫາວິທະຍາ​ໄລ​ແຫ່ງ​ຊາດລາວ

ນິຍາມ ແລະ ຄວາມສຳຄັນ

ພາສາຍີ່ປຸ່ນແມ່ນພາສາປະຈຳຊາດຂອງປະເທດຍີ່ປຸ່ນ ແລະ ທັງເປັນເຄຶ່ອງມືທີ່ໃຊ້ເຂົ້າໃນການສື່ສານ ເພື່ອໃຫ້ເກີດຄວາມເຂົ້າໃຈໃນພາສາດັ່ງກ່າວ. ສາຂາວິຊານີ້ມີຄວາມສຳຄັນໃນການສ້າງໃຫ້ນັກສຶກສາສາມາດນຳໃຊ້ພາສາຍີ່ປຸ່ນໃນທຸກຮູບແບບຂອງການສື່ສານຢ່າງມີປະສິດທິພາບ ເພື່ອເປັນສື່ກາງໃນການສື່ສານກັບຄົນທີ່​ໃຊ້ພາສາຍີ່ປຸ່ນ, ​ການ​ສຶກສາຖອດຖອນ​ບົດຮຽນ ແລະ ການແລກປ່ຽນ​ຂໍ້​ມູນ​ຂ່າວສານ​ທາງດ້ານວັດທະນະທໍາ ແລະ ເສດຖະກິດ – ສັງຄົມ ກັບປະ​ເທດ​ຍີ່ປຸ່ນ.

ວິຊານີ້ຮຽນກ່ຽວກັບຫຍັງ

ສາຂາວິຊານີ້ແມ່ນສຶກສາກ່ຽວກັບພື້ນຖານພາສາຍີ່ປຸ່ນ ເຊັ່ນ: ການນຳໃຊ້ຫຼັກໄວຍາກອນໃຫ້ຖືກຕ້ອງ, ທັກສະທາງດ້ານການອ່ານ, ການຟັງ, ການຂຽນ ແລະ ການເວົ້າ ເພື່ອສື່ສານໃນຊີວິດປະຈຳວັນ ຫຼື ນໍາໃຊ້ເຂົ້າໃນການປະກອບອາຊີບ ແລະ ການແປພາສາ. ນອກຈາກນັ້ນ, ນັກສຶກສາ ຍັງຈະໄດ້ສຶກສາກ່ຽວກັບ ພູມສາດ, ປະຫວັດສາດ, ການເມືອງ-ການປົກຄອງ, ເສດຖະກິດ-ສັງຄົມ, ວັດທະນະທໍາ ແລະ ຮີດຄອງປະເພນີຂອງ ປະເທດຍີ່ປຸ່ນ ເຊັ່ນ: ພິທີການຊົງຊາ, ບຸນນະມັດສະການຕ່າງໆ ເປັນຕົ້ນ.

ວິທີການສິດສອນ

ວິທີການສິດສອນ ແມ່ນໄດ້ນຳໃຊ້ສື່ການຮຽນ-ການສອນທີ່​ຫຼາກ​ຫຼາຍ​ເຊັ່ນ: ເທັບ, ວິດີໂອ ແລະ ຊີດີ. ມີການເນັ້ນໜັກການຮຽນ-ການສອນ ແບບປະສົມປະສານລະຫວ່າງການສຶກສາຈາກປຶ້ມຕຳລາ ແລະ ການປະຕິບັດຕົວຈິງ ກໍຄືການເຂົ້້າຮ່ວມກິດຈະກໍາສົນທະນາ-ແລກປ່ຽນຄໍາຄິດເຫັນ ເປັນພາສາຍີ່ປຸ່ນກັບນັກສຶກສາ ຈາກມະຫາວິທະຍາໄລຍີ່ປຸ່ນ ຫຼື ຄົນຍີ່ປຸ່ນ ເພື່ອໃຫ້ນັກສຶກສາມີໂອກາດຝຶກທັກສະໃນການນໍາໃຊ້ພາສາຍີ່ປຸ່ນ ແບບສື່ສານກັບເຈົ້າຂອງພາສາໂດຍກົງ.

ທັກສະ/ຄວາມສົນໃຈ

ຄວາມຮູ້ພື້ນຖານ ດ້ານພາສາຍີ່ປຸ່ນ ກໍ່ຈະເປັນການດີ. ເປັນຄົນ ມີຄວາມກະຕືລືລົ້ນ ແລະ ກ້າສະແດງອອກ ໂດຍສະເພາະແມ່ນໃນການສົນທະນາ ແລະ ນຳໃຊ້ພາສາເພື່ອສື່ສານກັບຜູ້ທີ່ນໍາໃຊ້ພາສາຍີ່ປຸ່ນ.ມີຄວາມສາມາດໃນການຈື່ຈຳດີ. ມີຄວາມສົນໃຈ ແລະ ມັກຮັກໃນພາສາ, ຮີດຄອງປະເພນີ ແລະ ວັດທະນະທໍາຍີ່ປຸ່ນ.

ຈົບແລ້ວສາມາດ

ສາມາດເຂົ້າໃຈຢ່າງເລິກເຊິ່ງ ກ່ຽວກັບການນໍາໃຊ້ພາສາຍີ່ປຸ່ນ, ມີທັກສະພື້້ນຖານ ເຊັ່ນ: ທັກສະການຟັງ, ເວົ້າ, ອ່ານ ແລະ ຂຽນ ໃນລະດັບດີ; ສາມາດນຳໃຊ້ພາສາຍີ່ປຸ່ນ ເຂົ້າໃນການສື່ສານໃນຊີວິດປະຈຳວັນ ຫຼື ເຂົ້າໃນການປະກອບອາຊີບທັງການເຮັດທຸລະກິດສ່ວນຕົວ ຫຼື ໃນອົງການຈັດຕັ້ງຕ່າງໆ; ແລະ ສາມາດແປພາສາຈາກຍີ່ປຸ່ນ ເປັນລາວ ແລະ ລາວເປັນຍີ່ປຸ່ນ.

ອາຊີບ

ສາມາດປະກອບອາຊີບເປັນພະນັກງານໃນບໍລິສັດເອກະຊົນຕ່າງໆຂອງຍີ່ປຸ່ນທີ່ມາລົງທຶນຢູ່ລາວ ຫຼື ອົງການຈັດຕັ້ງຂອງຍີ່ປຸ່ນທີ່ເຮັດວຽກຊ່ວຍເຫຼືອລາວ ເຊັ່ນ: ອົງການ JICA ເປັນຕົ້ນ.ນອກຈາກນີ້ ຍັງສາມາດເປັນນັກປະກາດຂ່າວ, ພະນັກງານນໍາທ່ຽວ, ນາຍແປພາສາຍີ່ປຸ່ນ ຫຼື ເປັນອາຈານສອນພາສາຍີ່ປຸ່ນຢູ່ສະຖາບັນການສຶກສາຕ່າງໆ.

ວິຊາຮຽນ

ໝວດພື້ນຖານວິຊາສະເພາະ

  • ພາສາສາດຍີ່ປຸ່ນ
  • ໄວຍາກອນຍີ່ປຸ່ນ
  • ຄັນຈິ
  • ພາສາອັງກິດ
  • ວິທີວິທະຍາການຄົ້ນຄວ້າ
  • ການສອນພາສາຍີ່ປຸ່ນ
  • ພາສາຍີ່ປຸ່ນເພື່ອການສື່ສານ
  • ພາສາຍີ່ປຸ່ນເພື່ອການໂຮງແຮມ
  • ພາສາຍີ່ປຸ່ນເພື່ອການທ່ອງທ່ຽວ
  • ພາສາຍີ່ປຸ່ນເພື່ອການເລຂານຸການ
  • ພາສາຍີ່ປຸ່ນເພື່ອກຽມເສັງວັດລະດັບ

ໝວດວິຊາສະເພາະ

  • ພາສາຍີ່ປຸ່ນ
  • ການຂຽນພາສາຍີ່ປຸ່ນ
  • ການຟັງ-ການເວົ້າພາສາຍີ່ປຸ່ນ
  • ການແປຍີ່ປຸ່ນ-ລາວ
  • ການແປລາວ-ຍີ່ປຸ່ນ
  • ພູມສາດ-ປະຫວັດສາດຍີ່ປຸ່ນ
  • ສັງຄົມຍີ່ປຸ່ນ
  • ເສດຖະສາດ ແລະ ການບໍລິຫານຂອງຍີ່ປຸ່ນ
  • ວັດທະນະທຳຍີ່ປຸ່ນ