ພາສາລາວ-ວັນນະຄະດີ

Project Description

ຫຼັກສູດ: ປະລິນຍາ​ຕີ 4 ປີ

ຄະນະອັກສອນສາດ

ມະຫາວິທະຍາໄລແຫ່ງຊາດລາວ

ນິຍາມ ແລະ ຄວາມສຳຄັນ

ພາສາ​ ແລະ ວັນນະຄະດີ ແມ່ນພາກສ່ວນໜຶ່ງຂອງວັດທະນະທໍາແຫ່ງຊາດລາວ. ດັ່ງນັ້ນ, ການສຶກສາກ່ຽວກັບສາຂາວິຊານີ້ຈຶ່ງມີພາລະບົດບາດສຳຄັນ ແລະຈໍາເປັນ ໃນການສ້າງຄວາມ​ສະຫງວນຮັກທາງດ້ານ​ພາສາ​ ​ແລະ ວັນນະຄະດີ​ປະຈຳ​ຊາດ. ການ​ອະນຸລັກ, ປັບປຸງ ແລະເສີມຂະຫຍາຍ ມໍລະດົກ ສິລະປະ​ວັດ​ທະນະ​ທຳ​ອັນ​ດີງາມຂອງ​ຊາດ ກໍ​ຄື​ຂອງ​ປະຊາຊົນ​ບັນດາ​ເຜົ່າໃຫ້ມີຄວາມຈະເລີນກ້າວໜ້າ ແລະຍືນຍົງຄຽງຄູ່ກັບຄົນລາວຕະຫຼອດໄປ  ພ້ອມທັງສາມາດເຜີຍແຜ່ໄປສູ່ສາກົນ.

ວິຊານີ້ຮຽນກ່ຽວກັບຫຍັງ

ສາຂາ​ວິຊານີ້ ​ສຶກສາລົງເລິກ​ກ່ຽວ​ກັບທິດ​ສະ​ດີ​ທາງດ້ານພາສາ​ສາດ ແລະ ວັນນະຄະດີ ໂດຍສະເພາະແມ່ນພາສາ​ລາວ, ວັນນະຄະ​ດີ ແລະ ວັດທະນະທຳ​ລາວ. ໃນນັ້ນ, ​ນັກສຶກສາຈະ​ໄດ້​ສຶກສາ​ ​ຕົ້ນກຳ​ເນີ​ດ, ວິວັດທະນາ​ການ ຂອງ​ພາສາ​ລາວ ແລະວັນນະຄະດີລາວ ໃນ​ແຕ່​ລະ​ຍຸກ​ສະ​ໄໝ ແລະ ​ແຕ່ລະ​ທ້ອງ​ຖິ່ນ​ພາຍ​ໃນ​ປະ​ເທດ​ລາວ. ພ້ອມດຽວກັນ ກໍຍັງ​ໄດ້​ຮຽນຮູ້ກ່ຽວກັບການ​ຂຽນ​ບົດ​ຄວາມ, ບົດ​ປະພັນ, ບົດເລື່ອງ, ບົດ​ວິພາກ, ແລະ ກາບກອນ​ຕ່າງໆ.

ວິທີການສິດສອນ

ການ​ສອນ​ ​ແມ່ນ​ເນັ້ນໃສ່ການ​ຄົ້ນ​ຄວ້າທິດ​ສະ​ດີ​ທາງດ້ານພາສາ​ສາດ ແລະ ວັນນະຄະດີ ພາຍໃນຫ້ອງຮຽນເປັນຫຼັກ. ນອກ​ນັ້ນ, ຍັງ​ມີ​ກິດຈະກຳ​ປະກອບ​ການ​ສອນ ເພື່ອເສີມສ້າງທັກສະໃຫ້ແກ່ນັກສຶກສາ ​ເຊັ່ນ: ການ​ຝຶກຂຽນ​ ແລະການວິ​​ໄຈບົດ​ປະ​ເພ​ດຕ່າງໆ, ບົດ​ວິ​ໄຈ​ກ່ຽວ​ກັບ​ການ​ນຳ​ໃຊ້ ​ພາສາ​ທ້ອງ​ຖິ່ນ ແລະພາສາ​ລາວ​​ເດີ​ມ. ສຳລັບ​ນັກ​ສຶກສາ​ຕ່າງປະ​ເທດ​ທີ່​ມາ​ກຽ​ມພາສາ​ລາວ​ ເພື່ອ​ສຶບຕໍ່ຮຽນລະດັບ​ປະລິນຍາ​ຕີໃນ​ສາຂາຕ່າງໆ​ ​ແມ່ນຈະໄດ້​ນຳ​ໃຊ້​ຫ້ອງ​ຟັງສຽງເພື່ອອຳນວຍ​ຄວາມ​ສະດວກ.

ທັກສະ/ຄວາມສົນໃຈ

ຄວາມຮູ້ພື້ນຖານ ກ່ຽວກັບພາສາລາວ, ຫຼັກ​ພາສາ​ລາວ, ວັນນະຄະດີລາວ ແລະ ວັດທະນະທຳ​ລາວ. ມີຄວາມສະຫງວນຮັກ​ກ່ຽວ​ກັບ​ການ​ຮຽນ​ຮູ້, ສຶກສາ, ຄົ້ນຄວ້າ ພ້ອມທັງມີ​ຄວາມ​ສົນ​ໃຈ ​ແລະ ຄວາມຕັ້ງ​ໃຈ ໃນການ​ເສີມ​ຂະຫຍາ​ຍບົດບາດ​ຂອງ​ພາສາ​ລາວ, ວັນນະຄະດີ ​ແລະ ວັດທະນະທຳ​ຂອງ​ຊາດ​ລາວ.

ຈົບແລ້ວສາມາດ

ມີຄວາມເຂົ້າໃຈກ່ຽວກັບຫຼັກການ​ນຳ​ໃຊ້ພາສາລາວ, ສາມາດວິເຄາະ, ​​ໄຈ້​ແຍກ ​ກ່ຽວກັບພາສາ ແລະ ວັນນະຄະດີລາວ​ຢ່າງ​ຖືກຕ້ອງ; ມີທັກ​ສະ ​ໃນ​ການ​ຂຽນ​ບົດ​ປະ​ເພດ​ຄຳ​ຮ້ອຍ​​ແກ້ວ ແລະ ຮ້ອຍ​ກອງ ແລະ ມີຄວາມ​ເຂົ້າ​ໃຈ​ເລິກ​ເຊິ່ງກວ້າງ​ຂວາງ​ຕໍ່ກັບ​ເນື້ອ​​ໃນ​ວັນນະຄະດີລາວ ​ແລະ ວັດທະນາທຳ​​ໃນ​ການ​ດຳລົງ​ຊີວິດ​ຂອງ​ຄົນລາວ.

ອາຊີບ

ເປັນ​ນັກ​ຂຽນ, ນັກ​ແຕ່ງບົດຄວາມ ແລະ ກາບກອນຕ່າງໆ, ນັກປະພັນ, ​ບັນນາທິການ​ ໃນ​ຫ້ອງກາ​ນສຳນັກງານໜັງສືພິມ ແລະ ວາລະສານ​ຕ່າງໆ, ​​ເປັນ​ນັກຄົ້ນຄວ້າກ່ຽວ​ກັບ​ ພາສາ​ລາວ​-ວັນນະຄະດີລາວ ແລະ ​ເປັນ​ນັກວິ​ຊາ​ການທາງດ້ານພາສາສາດ ໃນໜ່ວຍງານທັງພາກລັດ ແລະ ເອກະຊົນທີ່​ກ່ຽວຂ້ອງ.

ວິຊາຮຽນ

ໝວດວິຊາຄວາມຮູ້ພື້ນຖານວິຊາສະເພາະ

  • ວັດທະນະທຳ​ລາວ
  • ໂຫລາ​ສາດ​ລາວ ​ແລະ​ ອ່ານ​ຈາລຶກ
  • ແພ່ງ​ພື້ນ​ເມືອງ
  • ປະຫວັດສາດ​ລາວ
  • ພາສາສາດພື້ນຖານ
  • ວິວັດທະນາ​ການ​ພາສາ​ລາວ
  • ຕັກ​ກະ​ວິທະຍາ​ທາງ​ພາສາ
  • ທິດ​ສະ​ດີ​ວັນນະຄະດີ

ໝວດວິຊາສະເພາະ

  • ອັກຂະຫຼະວິທະຍາ
  • ວັດຈະນະ​ສຶກສາ
  • ອັກສອນ​​​ທຳ​ລາວ-ບາ​ລີ
  • ວາ​ກະ​ຍະ​ສຳພັນ
  • ສັນທະ​ສາດ
  • ພາສາ​​ເພື່ອ​ການ​ສື່ສານ
  • ພາສາ​ລາວ​ນຳ​ໃຊ້​ໂດຍ​ສັງ​ເຂ​ບ
  • ບາ​ລີ-ສັນສະກິດ​ໃນ​ພາສາ​ລາວ
  • ປະຫວັດ​ຕົວ​ອັກສອນ ​ແລະ​ ອັກສອນ​ລາວ​ເດີມ
  • ການ​ຂຽນ
  • ຫຼັກການ​ປະລິວັດ​ໜັງສື
  • ອັດຖະ​ສາດ
  • ພາສາ​ສາດ​ສັງຄົມ
  • ພາສາ​ຖິ່ນ​ຕະກູນ​ໄຕ​
  • ຫຼັກການ ​ແລະ​ ສິລະ​ປະການ​ເວົ້າ
  • ປະຫວັດວັນນະຄະດີ​ລາວ
  • ວັນນະຄະດີປາກ​ເປົ່າ
  • ວັນນະຄະດີ​ພື້ນ​ເມືອງ
  • ວັນນະຄະດີ​ລ້ານ​ຊ້າງສະ​ໄໝຮຸ່ງ​ເຮືອງ
  • ວັນນະຄະດີ​ລ້ານ​ຊ້າງສະ​ໄໝຊຸດ​ໂຊມ
  • ວັນນະຄະດີ​​ຄຳ​ສອນ
  • ວັນນະຄະດີ​ປັດຈຸບັນ
  • ວັນນະຄະດີ​ວິຈານ
  • ປະພັນ​ສິນ
  • ວັນນະຄະດີ​ການ​ລະຄອນ
  • ລູຊິນ ​ແລະ​ ບົດ​ປະພັນ ອາ​ກຸຍ
  • ກັອກກີ ​ແລະ​ ບົດ​ປະພັນ ​ແມ່