ການບັນຊີ

ການບັນຊີ ໝາຍເຖິງສິລະປະການຮວບຮວມ, ຈົດບັນທຶກ, ຈໍາແນກ, ສະຫຼຸບຜົນ ແລະ ລາຍງານຂໍ້ມູນກ່ຽວກັບເຫດການທາງເສດຖະກິດໃນຮູບຈໍານວນເງິນ. ການບັນຊີມີຄວາມສຳຄັນ ໃນຖານະເປັນພາສາທາງທູລະກິດທີ່ເປັນຕົວຊີ້ບອກສະຖານະພາບທາງການເງິນຂອງໜ່ວຍງານຕ່າງໆ ເຊິ່ງຈະຊ່ວຍສະໜອງຂໍ້ມູນພື້ນຖານສໍາລັບການວາງແຜນ, ການຄວບຄຸມ ແລະ ການຕັດສິນໃຈໃນການເລືອກແນວທາງປະຕິບັດ ເພື່ອໃຫ້ສາມາດດໍາເນີນງານໄດ້ບັນລຸຕາມເປົ້າໝາຍຂອງໜ່ວຍງານ.

ສາຂານີ້ຮຽນລົງເລິກທາງດ້ານບັນຊີ ກໍ່ຄືຫຼັກການ ແລະ ວິທີປະຕິບັດໃນການເຮັດບັນຊີ ແລະ ການສ້າງເອກະສານລາຍງານການເງິນ ໃນນັ້ນລວມມີ ການສ້າງລະບົບບັນຊີ ແລະ ການລົງບັນຊີປະເພດຕ່າງໆ ເຊັ່ນ: ບັນຊີປະຈຳວັນ ບັນຊີຫົວໃຫຍ່. ນອກນີ້, ກໍ່ມີໃບດຸ່ນດ່ຽງຊັບສົມບັດ, ໃບສະຫຼຸບຊັບສົມບັດ ແລະ ໃບລາຍງານຜົນໄດ້ຮັບ. ການຮຽນແມ່ນເນັ້ນໜັກໃສ່ບັນຊີລາວ  ແລະ ມາດຕະຖານບັນຊີສາກົນຈໍານວນໜຶ່ງ. ນັກສຶກສາຍັງຈະໄດ້ຮຽນກ່ຽວກັບການກວດສອບບັນຊີ ແລະ ພາສີ-ອາກອນ ອີກດ້ວຍ.

ວິທີການສິດສອນ ປະກອບມີການຮຽນກ່ຽວກັບທິດສະດີໂດຍຜ່ານການບັນຍາຍ ເພື່ອເປັນພື້ນຖານໃຫ້ແກ່ການປະຕິບັດ ເຊິ່ງໃນການປະຕິບັດຕົວຈິງນີ້ ແມ່ນໄດ້ມີການນໍາເອົາ ບັນຊີ ແລະ ເອກະສານທາງການເງິນຕົວຈິງ ມາເປັນກໍລະນີສຶກສາເພື່ອໃຫ້ນັກສຶກສາມີຄວາມເຂົ້າໃຈ ແລະ ສາມາດປະຕິບັດຕາມໄດ້. ນັກສຶກສາຈະໄດ້ເຮັດບົດລາຍງານຕາມລາຍວິຊາ ແລະ ລົງຝຶກງານຕາມອົງການຈັດຕັ້ງຕ່າງໆ ເຊັ່ນ: ກົມບັນຊີ ກະຊວງການເງິນ, ທະນາຄານກາງ ແລະ ບໍລິສັດເອກະຊົນຕ່າງໆ.

ຄວາມຮູ້ພື້ນຖານດ້ານການຄິດໄລ່ ເຊັ່ນ: ວິຊາຄະນິດສາດທົ່ວໄປ ແລະ ວິຊາສະຖິຕິ ພ້ອມທັງ ວິຊາສັງຄົມສາດ. ມີຄວາມສົນໃຈໃນການເຮັດວຽກກ່ຽວກັບຕົວເລກ, ການບັນທຶກລາຍການຕ່າງໆ ແລະ ການເຮັດວຽກກ່ຽວກັບເອກະສານ. ເປັນຄົນໃສ່ໃຈໃນລາຍລະອຽດ, ມີຄວາມອົດທົນ, ຄວາມຊື່ສັດສຸຈະລິດ ແລະ ຄວາມຮັບຜິດຊອບສຸງ.​

ນັກສຶກສາທີ່ຮຽນຈົບຈາກສາຂານີ້ຈະມີທັກສະວິຊາສະເພາະດ້ານບັນຊີ ຄື: ມີຄວາມຮູ້ກ່ຽວກັບເລກລະຫັດບັນຊີ, ໝວດ ແລະ ປະເພດຂອງບັນຊີລາວ ຕະຫຼອດເຖິງທັກສະພື້ນຖານໃນການລົງບັນຊີປະເພດຕ່າງໆ. ນອກຈາກນີ້ ນັກສຶກສາຍັງຈະຮູ້ວິທີການສ້າງເອກະສານລາຍງານການເງິນ ແລະ ການບັນຊີ ເຊິ່ງເປັນຂັ້ນຕອນສຸດທ້າຍຂອງວຽກບັນຊີ.

ນັກສຶກສາທີ່ຈົບຈາກສາຂານີ້ ສາມາດປະກອບອາຊີບ ເປັນນັກບັນຊີ ຫຼື ຜູ້ຊ່ວຍນັກບັນຊີ ໂດຍສາມາດເຮັດວຽກທີ່ພະແນກບັນຊີ ຂອງອົງກອນຕ່າງໆ ແລະ ສາມາດເຮັດວຽກນໍາອົງການຈັດຕັ້ງທີ່ເຮັດວຽກກ່ຽວກັບບັນຊີໂດຍສະເພາະ ເຊັ່ນ: ທະນາຄານກາງ, ກົມບັນຊີ ແລະ ບໍລິສັດກວດສອບບັນຊີເອກະຊົນພາຍໃນ ແລະ ສາກົນ (ບໍລິສັດເຄພີເອັມຈີ, ຄູເປີ, ເອີນສແອນຢັງ).