ການໂຮງແຮມ

ສາຂາການໂຮງແຮມ ແມ່ນສາຂາທີ່ຮຽນກ່ຽວກັບການໃຫ້ບໍລິການທຸລະກິດທາງດ້ານທີ່ພັກອາໄສ ເຊັ່ນ: ໂຮງແຮມ, ຣີສອດ, ບ້ານພັກ ແລະ ອຶ່ນໆ. ສາຂານີ້ມີຄວາມສຳຄັນ ໃນການສະໜັບສະໜຸນໃຫ້ແກ່ຂະແໜງການທ່ອງທ່ຽວ ເຊິ່ງເປັນທຸລະກິດໜຶ່ງທີ່ກໍາລັງຈະເລີນເຕີບໃຫຍ່ຂະຫຍາຍຕົວໃນ ສປປ ລາວ, ສະນັ້ນຈຶ່ງໄດ້ມີການຈັດຕັ້ງການຮຽນ-ການສອນ ເພື່ອພັດທະນາວິທີການຈັດການ ແລະ ການບໍລິການ ເພື່ອທີ່ຈະສາມາດສະໜັບສະໜູນເສດຖະກິດ ແລະ ສ້າງລາຍໄດ້ໃຫ້ແກ່ປະເທດຊາດ.

ວິຊານີ້ຮຽນກ່ຽວກັບຫຼັກການບໍລິຫານທີ່ພັກປະເພດຕ່າງໆ ເຊັ່ນ:  ການວາງແຜນ, ການຈັດຕັ້ງ, ການຄວບຄຸມອຸດສາຫະກໍາໂຮງແຮມ, ການບໍລິຫານລາຍຮັບ ແລະ ທ່າອ່ຽງໃນການຂະຫຍາຍຕົວຂອງອຸດສາຫະກໍາໂຮງແຮມ; ຫຼັກການການບໍລິການລູກຄ້າ, ຄວາມສຳພັນລະຫວ່າງທຸລະກິດໂຮງແຮມ ແລະ ທຸລະກິດທ່ອງທ່ຽວ ແລະ ການປະສານງານພາຍໃນອົງກອນ ແລະ ທຸລະກິດທີ່ກ່ຽວຂ້ອງ ເຊັ່ນ: ບໍລິສັດທ່ອງທ່ຽວ ຫຼື ສະຖານທີ່ທ່ອງທ່ຽວທາງດ້ານທຳມະຊາດ, ປະຫວັດສາດ ແລະ ວັດທະນະທຳ.

ວິທິການສິດສອນແມ່ນປະກອບມີການຮຽນທິດສະດີພາຍໃນຫ້ອງຮຽນ ແລະ ເນັ້ນໜັກການຝຶກປະຕິບັດຕົວຈິງ, ໃນນັ້ນລວມມີ: ການໃຫ້ບໍລິການດ້ານການໂຮງແຮມ, ການຈັດໂຕະອາຫານ, ການຮຽນວິທີການປຸງແຕ່ງອາຫານ, ແກະສະຫຼັກໝາກໄມ້, ການປຸງແຕ່ງເຄື່ອງດື່ມລາວ ແລະ ຕ່າງປະເທດ. ນອກນັ້ນຍັງມີການເຮັດບົດລາຍງານໂດຍນຳໃຊ້ ຂໍ້ມູນຈາກເອກະສານຄົ້ນຄວ້າ ແລະ ຈາກການລົງພາກປະຕິບັດຕົວຈິງ ເຊັ່ນ: ການຝຶກງານນຳບັນດາໂຮງແຮມຕ່າງໆ.

ນັກສຶກສາຄວນເປັນຜູ້ທີ່ມີຄວາມສົນໃຈ ໃນການຮຽນພາສາຕ່າງປະເທດ. ມີຄວາມມັກຮັກ ໃນວຽກການບໍລິການ, ໃນການປຸງແຕ່ງອາຫານ ແລະ ເຄື່ອງດື່ມ. ເປັນຄົນມີມະນຸດສຳພັນດີ ແລະ ມີຄວາມຮັບຜິດຊອບສູງ, ມີຄຸນະທຳ ແລະ ດຸໝັ່ນ, ເປັນຄົນໃສ່ໃຈໃນລາຍລະອຽດ ແລະ ມີຄວາມເປັນລະບຽບຮຽບຮ້ອຍ.

ນັກສຶກສາທີ່ຈົບຈາກສາຂານີ້ ຈະມີທັກສະທາງດ້ານການຕະຫຼາດການໂຮງແຮມ ເຊັ່ນ: ການສ້າງຊື່ສຽງ ແລະ ການດຶງດູດລູກຄ້າເຂົ້າມາໃຊ້ບໍລິການ, ການຈັດການທຸະກິດໂຮງແຮມ. ນອກນີ້ ຍັງຈະມີຄວາມຮູ້ກ່ຽວກັບພາສາຕ່າງປະເທດ, ສາມາດນໍາໃຊ້ເຕັກໂນໂລຊີ ເຂົ້າໃນການສື່ສານໃນຂົງເຂດທຸລະກິດໂຮງແຮມ ແລະ ການພົວພັນວຽກນໍາຄົນທີ່ມາຈາກຫຼາກຫຼາຍວັດທະນະທຳ.

ຫຼັງຈາກຈົບການສຶກສາແລ້ວ ນັກສຶກສາສາມາດປະກອບອາຊີບ ເປັນພະນັກງານຕ້ອນຮັບ, ພະນັກງານໃຫ້ບໍລິການ, ຜູ້ຈັດການ ແລະ ເລຂານຸການ ໃນພະແນກຕ່າງໆໃນໂຮງແຮມ. ນອກນີ້ ນັກສຶກສາຍັງສາມາດປະກອບອາຊີບເປັນພະນັກງານປຸງແຕ່ງອາຫານ ຫຼື ສາມາດໄປປະກອບທຸລະກິດທາງດ້ານໂຮງແຮມ ແລະ ທີ່ພັກອາໄສອື່ນໆຂອງຕົນເອງໄດ້ອີກ.