ສ້າງ​ຄູພາລະສຶກສາ

ສ້າງຄູພາລະສຶກສາ ແມ່ນ ການສ້າງຄູອາຈານວິຊາສະເພາະທາງ​ດ້ານກິລາເພື່ອໄປສອນ ​ໃນໂຮງຮຽນສາມັນ ແລະ ໂຮງຮຽນວິຊາຊີບຕ່າງໆ. ວິຊານີ້ ມີຄວາມສຳຄັນ ໃນການປະກອບສ່ວນເຂົ້າໃນການ ເສີມສ້າງສະມັດຖະພາບທາງກາຍ ໃຫ້ແກ່ນັກຮຽນ. ການມີສຸຂະພາບທີ່ສົມບູນແຂງແຮງດີ ເປັນສີ່ງທີ່ມີຄ່າ ​​ແລະ ສໍາຄັນຕໍ່ບຸກຄົນ ດັ່ງນັ້ນ ການທີ່ບຸກຄະລາກອນມີສຸຂະພາບທີ່ດີ ຈຶ່ງເປັນປັດ​ໄຈທີ່ສຳຄັນ ໃຫ້ແກ່ການພັດທະນາ ແລະ ສ້າງສາປະເທດຊາດ.

ສາຂານີ້ສຶກສາກ່ຽວກັບ ຄວາມ​ເປັນ​ມາ ​ແລະ ທັກສະພື້ນຖານຕ່າງໆ ໃນການຫຼິ້ນກິລາແຕ່ລະປະເພດ ລວມ​​ທັງກິລາ​ພື້ນເມືອງ ແລະ ສາກົນ ເຊັ່ນ: ກິລາແລ່ນລານ, ຕີດອກປີກໄກ່, ລອຍນ້ຳ, ເຕະກະຕໍ້, ເຕະບານ, ຕີບານ ແລະ ອື່ນໆ;  ວິທີການສິດສອນ ແລະ ຖ່າຍທອດຄວາມຮູ້ທາງດ້ານກິລາ. ນອກນັ້ນ, ຍັງສຶກສາກ່ຽວກັບ ແພດ​ກິລາ ​ແລະ ຫຼັກການພື້ນຖານທາງດ້ານວິທະຍາສາດການ​ກິ​ລາ ​ເປັນຕົ້ນ​ແມ່ນ ການທົດສອບຮ່າງກາຍຂອງນັກກິລາ ແລະ ການ​ວາງ​ແຜນ​ການ​ທາງດ້ານກິ​ລາ. ​

ວິທີການສິດສອນ ຂອງພາກວິຊານີ້ ແມ່ນເນັ້ນໃສ່ ການປະຕິບັດຕົວຈິງ ໂດຍສະເພາະແມ່ນກິດຈະກໍາ ໃນການອອກກໍາລັງກາຍ ແລະ ການລົງຫຼີ້ນກິລາ ປະເພດຕ່າງໆ ໂດຍນໍາໃຊ້ ສະຖານທີ່ ຫຼື ເດີ່ນ ຂອງປະເພດກິລາ ຕົວຈິງ;  ມີການວິເຄາະ-ວິໄຈ ຄວາມ​ຖືກຕ້ອງ​ຂອງ​ວິທີ​ການ ​ໃນ​ເວລາປະຕິບັດກິິລາ.  ໃນ​ດ້ານການຝຶກງານ, ນັກສຶກສາ ​ໄດ້ລົງພາກປະຕິບັດຕົວຈິງ ດ້ວຍ​ການສອນຝຶກຫັດ ກິລາ ຕາມໂຮງຮຽນມັດທະຍົມສຶກສາ ແລະ ໂຮງຮຽນວິຊາຊີບ ຕ່າງໆ.

ມີທັກສະ​ພື້ນ​ຖານ ໃນການຫຼິ້ນກິລາໂດຍລວມ ຫຼື ທັກ​ສ​ະ​ໃດ​ໜຶ່ງ ​ເຊັ່ນ​: ກິລາ​ແລ່ນ​ລານ, ລອຍ​ນ້ຳ, ບານບ້ວງ, ບານ​ສົ່ງ,ການ​ຕີ​ດອກ​ປີກ​ໄ​ກ່ ​ແລະ ​ອື່ນໆ; ເປັນ​ຄົນ​ ທີ່ມີສຸຂະພາບ​ ແລະ​ ຮ່າງ​ກາຍທີ່ສົມບູນແຂງແຮງດີ; ມີຄວາມສົນໃຈ ທາງດ້ານກິລາ​ ແລະ ມີຄວາມມັກຮັກ​ໃນ​ການ​ເປັນ​ຄູ ​ແລະ ​ຮັກ​ສາ​ສຸ​ຂະ​ພາບ.

ມີ​ຄວາມຮູ້ກ່ຽວກັບທັກສະ ​ແລະ ​ເຕັກ​ນິກ ໃນກິລາປະເພດຕ່າງໆ; ທັກສະໃນການເປັນ​ຄູສອນ ກິລາປະເພດຕ່າງໆ; ຮູ້​ວິທີ​ການ​ສ້າງ​ແບບ​ແຜນ​ການ​ສອນ; ສາມາດ​ວາງ​ແຜນ​ ລະ​ບົບ​ການ​ຈັດ​ຕັ້ງ​ ແລະ ​ສ້າງ​ຍຸດ​ທະ​ສາດ​ການ​ກິ​ລາ​ພາຍ​ໃນ​ໂຮງ​ຮຽນ ​ແລະ ​ອົງ​ການ​ຈັດ​ຕັ້ງ; ສາມາດປະຕິບັດກິດຈະກໍາ​ກ່ຽວ​ກັບ​ວິ​ທະ​ຍາ​ສາດ​ການ​ກິ​ລາ ​ເຊັ່ນ: ​ການ​ທົດ​ສອບ ແລະ ການ​ວັດ​ປະ​ເມີນ​ຜົນ.

ເປັນຄູສອນພາລະສຶກສາຕາມໂຮງຮຽນສາມັນຕ່າງໆ; ​ເປັນ​ອາ​ຈານ​ສອນ​ໃນ ວິທະຍາໄລ, ຫ້ອງການສຶກສາ ແລະ ກິລາ. ​ນອກຈາກ​ນີ້, ​ຍັງ​ສາ​ມາດເປັນ​ຜູ້​ບໍ​ລິ​ຫານ ໃນ​ພະ​ແນກການ​ກິ​ລາ​ ຕາມ​ອົງ​ການ​ຈັດ​ຕັ້ງ​ທີ່​ກ່ຽວ​ຂ້ອງ​ ແລະ ເປັນ​ຄູ​ຝຶກ​ສ່ວນ​ຕົວ​ຂອງ​ທີມ​ກິ​ລາ ​​ແລະ​ ເປັນ​ທີ່​ປຶກ​ສາ​ກ່ຽວ​ກັບ​ການ​ເສີມ​ສ້າງ​ສະ​ມັດ​ທະ​ພາບ​ຮ່າງ​ກາຍ​ຂອງ​ບຸກ​ຄົນ.