ຊ່າງໄມ້ເຟີນິເຈີ

ສາຂາຊ່າງໄມ້ ແລະ ເຟີນິເຈີ ເປັນສາຂາທີ່ເວົ້າເຖິງການສຶກສາກ່ຽວກັບການຜະລິດເຄື່ອງເຟີນິເຈີປະເພດໄມ້. ສາຂານີ້ເປັນວິຊາຊີບທີ່ສາມາດປະກອບເຂົ້າໃນວຽກງານການຜະລິດ ເຊິ່່ງມີຄວາມຮຽກຮ້ອງຕ້ອງການຫຼາຍຈາກທັງພາກລັດ ແລະ ເອກະຊົນ. ນອກຈາກນີ້ ການຜະລິດເຄື່ອງເຟີນິເຈີ ຍັງມີຄວາມສໍາຄັນໃນການຊ່ວຍຫັນປ່ຽນ ຈາກອຸດສາຫະກໍາການຂຸດຄົ້ນ ແລະ ນໍາໃຊ້ວັດຖຸດິບ ມາເປັນອຸດສາຫະກໍາການຜະລິດ ເຊິ່ງຈະຊ່ວຍສ້າງມູນຄ່າເພີ່ມໃຫ້ແກ່ຜະລິດຕະພັນ ແລະ ສ້າງລາຍຮັບໃຫ້ແກ່ປະເທດຊາດ.

ສາຂານີ້ສຶກສາກ່ຽວກັບ ການຜະລິດເຄື່ອງເຟີນິເຈີ ແລະ ເຄື່ອງຮັບໃຊ້ພາຍໃນເຮືອນ ໃນນັ້ນປະກອບມີ ການສຶກສາກ່ຽວກັບພື້ນຖານການເຮັດເຄ່ື່ອງເຮືອນປະເພດຕ່າງໆ ເຊັ່ນ: ການເຮັດຕູ້, ໂຕະ, ຕັ່ງ, ຕຽງ ແລະ ອື່ນໆ. ນອກຈາກນີ້ ນັກສຶກສາຍັງຈະໄດ້ຮຽນກ່ຽວກັບວິທີການແຕ້ມແບບ ແລະ ອອກແບບ, ການຄິດໄລ່ປະເມີນລາຄາ, ການນໍາໃຊ້ເຄື່ອງມື ແລະ ເຄື່ອງຈັກ, ການຄິດໄລ່ໂຄງຮ່າງ ແລະ ບໍລິມາດເຄື່ອງເຟີນິເຈີ ແລະ ວິທະຍາການໄມ້ ເຊັ່ນ: ການຄິດໄລ່ໜ້າກວ້າງ-ຍາວຂອງຕູ້ ເປັນຕົ້ນ.

ວິທີການສິດສອນປະກອບມີ ການຮຽນກ່ຽວກັບທິດສະດີພາຍໃນຫ້ອງຮຽນ ເພື່ອມາເປັນພື້ນຖານໃຫ້ແກ່ການປະຕິບັດຕົວຈິງ. ເຊິ່ງໃນການລົງປະຕີບັດຕົວຈິງນີ້ ນັກສຶກສາຈະໄດ້ເຮັດການກົບໄມ້, ການເຂົ້າໄມ້, ການປາດມຸມໄມ້ ແລະ ອື່ນໆ. ຫຼັງຈາກນັ້ນ ຈະໄດ້ຝຶກການນໍາໃຊ້ເຄື່ອງຈັກ. ໃນແຕ່ລະພາກຮຽນ, ນັກສຶກສາຈະໄດ້ຜະລິດເຄື່ອງເຟີນິເຈີໃດໜຶ່ງ ດ້ວຍຕົນເອງ ພາຍໃຕ້ການຊີ້ນໍາຈາກອາຈານ. ນອກຈາກນີ້ ຍັງມີການລົງຝຶກງານ ຕາມບໍລິສັດຜະລິດເຄື່ອງເຟີນິເຈີ ເປັນຕົ້ນ. 

ຄວາມ​ຮູ້ພື້ນຖານທາງດ້ານ ວິຊາຄະນິດສາດ. ເປັນຄົນ ທີ່ມັກການລົງມືປະຕິບັດຕົວຈິງ, ມີຄວາມຄິດສ້າງສັນ, ມີຫົວຄິດປະດິດສ້າງ, ມີຄວາມອົດທົນ ແລະ ຄວາມພະຍາຍາມສູງ. ມີຄວາມສົນໃຈໃນການອອກແບບ ແລະ ປະດິດເຄື່ອງມືເຄື່ອງໃຊ້ຕ່າງໆ.

ສາມາດປະຕິບັດຕົວຈິງ ເຊັ່ນ: ສາມາດກົບໄມ້, ເຈາະໄມ້, ແຕ້ມແບບ, ສຶກສາແບບ, ເຮັດລາຍການໄມ້ (ເຮັດລາຍການຂອງໄມ້ ແລະ ປະເພດໄມ້ ທີ່ຈະເອົາມາປະກອບເປັນເຄື່ອງເຟີນິເຈີ ເຊັ່ນ: ໃນການເຮັດຕູ້ ກໍ່ຈະປະກອບມີໄມ້ທີ່ຈະເອົາມາເຮັດ ຂາຕູ້, ຝາຕູ້ ເປັນຕົ້ນ), ຕັດໄມ້, ຊອຍໄມ້, ທາສີ, ຂັດໄມ້ ແລະ ສາມາດເຂົ້າໃຈເຄື່ອງໝາຍທີ່ໃຊ້ເຂົ້າໃນແບບເຟີນິເຈີ.

ສາມາດປະກອບອາຊີບ ເປັນຫົວໜ້າຊ່າງ ເຊິ່ງມີໜ້າທີ່ເປັນຜູ້ຄວບຄຸມ ແລະ ແນະນໍາການຜະລິດ, ເປັນຊ່າງໄມ້ ໂດຍສາມາດເຮັດວຽກຕາມໂຮງງານຜະລິດເຄື່ອງເຟີນິເຈີໄມ້ຕ່າງໆ ຫຼື ເປັນຊ່າງໄມ້ອິດສະຫຼະ. ນອກຈາກນີ້ ຍັງສາມາດເປັນຜູ້ປະກອບການບໍລິສັດທີ່ເຮັດກ່ຽວກັບການຜະລິດເຄື່ອງເຟີນິເຈີ ເປັນຕົ້ນ.

ວິຊາຮຽນ