ວິທະຍາ​ການ​ອາຄານ

ວິທະຍາ​ການ​ອາຄານໝາຍ​ເຖິງ​ການ​ດຳ​ເນີນ​ໂຄງການການ​ອອກ​ແບບ ​ແລະ ​ກໍ່ສ້າງອາຄານ ຕາມຫຼັກວິຊາ​ການໂດຍ​ການ​ນຳ​ໃຊ້​ເຕັກນິກ ​ແລະ ​ເຕັກ​ໂນ​ໂລ​ຊີທີ່​ທັນ​ສະ​ໄໝ​ທາງ​ດ້ານ​ສະຖາປະນິກ ເພື່ອຮັບປະກັນການກໍ່ສ້າງໃຫ້ມີຄຸນນະພາບ, ທັນເວລາທີ່ກຳນົດ, ແລະ ທີ່ສຳຄັນແມ່ນຕ້ອງນຳໃຊ້ງົບປະມານຕາມທີ່ກໍາໜົດໄວ້ຢ່າງ​ມີ​ປະສິດ​ທິ​ພາບ. ສາຂາ​ນີ້ມີຄວາມ​ສຳຄັນ​ຕໍ່​ກັບ​ການ​ພັດທະນາ​ທາງ​ດ້ານພື້ນຖານ​ໂຄງ​ລ່າງທີ່​ເປັນ​ພື້ນຖານສົ່ງ​ເສີມ​ການ​ຂະຫຍາຍ​ເສດຖະກິດ ​ແລະ ສັງຄົມ. 

ພາກວິຊານີ້ສຶກສາຄົ້ນຄ້ວາກ່ຽວກັບໂຄງ​ສ້າງການ​ອອກ​ແບບ​ອາຄານ, ການ​ຄຸ້ມ​ຄອງບໍລິຫານ​ໂຄງການ​ກໍ່ສ້າງ ​ແລະ ອະສັງຫາລິມະ​ຊັບ, ການ​ສຶກສາ​ຄວາມ​ເປັນ​ໄປ​ໄດ້ ​ແລະ ຄວາມ​ເຂົ້າ​ໃຈ​ຕໍ່​ກັບ​ສະພາບ​ແວດ​ລ້ອມ ໂດຍ​ເຊື່ອມ​ໂຍງ​ການ​ນຳ​ໃຊ້​ເຕັກ​ໂນ​ໂລ​ຊີ​ທີ່​ທັນ​ສະ​ໄໝ​​ໃຫ້​ທຽບ​ເທົ່າ​ກັບ​ສາກົນ​. ນອກຈາກ​ນີ້, ວິຊານີ້ຍັງ​ພົວພັນກັບ​ການ​ອອກ​ແບບ​ວາງຜັງ​ຕົວ​ເມືອງ​ ​ແລະ ການ​ອອກ​ແບບ​ຜະລິດ​ຕະພັນ​ຕ່າງໆ​.

ວິທີການສິດສອນຂອງພາກວິຊານີ້ແມ່ນ​ປະກອບ​ມີ​ການບັນ​ລະ​ຍາຍທິດ​ສະ​ດີ​, ການ​ປະຕິບັດ​ຕົວ​ຈິງ ​ແລະ ການ​ທົດ​ລອງ​ວັດ​ສະ​ດຸ​ກໍ່ສ້າງເຊັ່ນ: ການກໍ່ສ້າງ, ການນໍາໃຊ້ໄມ້, ການນຳໃຊ້ເຫຼັກ ແລະ ອື່ນໆ​.​ການ​ຄິດ​ໄລ່​ໂຄງ​ສ້າງ​ປະ​ເມີນ​ລາ​ຄາ​ແລະ​ວັດ​ສະ​ດຸ​ທີ່​ຕ້ອງ​ການ​.ທັງ​ນີ້​ຍັງມີການໄປທັດສະນະ​ສຶກສາຕາມສະຖານທີ່ຕ່າງໆທີ່ກ່ຽວຂ້ອງກັບວຽກງານສະຖາປັດຕະຍະກຳ, ການລົງ​ຝຶກງານ​ໃນ​ໂຄງການກໍ່ສ້າງຕາມ​ບໍລິສັດ​ຕ່າງໆ ​ລວມທັງຫ້ອງ​ການພາກ​ລັດ ​ແລະ ​ເອກະ​ຊົນ.

ນັກຮຽນທີ່ຈະເຂົ້າຮຽນສາຂານີ້ ຕ້ອງມີພື້ນຖານຄວາມຮູ້​ ທາງ​ດ້ານ​ຄະນິດສາດ, ຟິຊິກສາດ, ສະຖິຕິ ​ເປັນ​ຕົ້ນ. ມີ​ຄວາມ​ຄິດ​ສ້າງສັນ​ໃນ​ການ​ອອກ​ແບບ, ມີ​ຄວາມ​ສາມາດ​ໃນການວາງ​ແຜນ ​ແລະ ການຄິດ​ໄລ່​ຄຳນວນ​, ມີ​ຄວາມ​ສາມາດ​ໃນ​ການ​ແຕ້ມ​ຮູບ, ມີ​ຄວາມ​ມັກ​ໃນ​ການ​ທົດ​ລອງ​ສິ່ງ​ໃໝ່ໆ. ມີຄວາມສົນໃຈໃນການກໍ່ສ້າງອາຄານ​ ​ແລະ ​ເປັນ​ຄົນ​ໃສ່​ໃຈ​ໃນລາຍ​ລະອຽດ. 

ນັກສຶກສາທີ່​ຈົບ​ຈາກ​ພາກ​ວິຊາ​ນີ້​ ​ຈະ​ມີ​ຄວາມສາມາດ​ໃນການ​ອອກ​ແບບ​ອາຄານ, ຄິດ​ໄລ່​ຄຳນວນ​ມູນ​ຄ່າ​ໂຄງການ​ກໍ່ສ້າງ​ລວມທັງບໍລິຫານ, ຄວບຄຸມ ແລະ ກວດກາການກໍ່ສ້າງອາຄານຕ່າງໆ ບໍ່ວ່າຈະເປັນ ອາຄານໂຮງຮຽນ, ໂຮງໝໍ, ໂຮງງານ, ສະຖານທີ່ເຮັດວຽກ ແລະ ວັດວາອາຮາມຕ່າງໆ. ນອກຈາກນັ້ນ, ກໍຍັງປະເມີນໂຄງການກໍ່ສ້າງ ແລະ ວຽກງານຕ່າງໆທີ່ກ່ຽວຂ້ອງກັບສະຖາປັດຕະຍະກຳ.

​ທາງ​ເລືອກ​ໃນ​ການ​ປະກອບ​ອາຊີບນີ້ ນັກສຶກສາສາມາດປະກອບ​ອາຊີບໄດ້ໃນວຽກງານບໍລິຫານ, ຄວບຄຸມ ແລະ ກວດກາການກໍ່ສ້າງ; ການຄິດໄລ່ລາຄາການກໍ່ສ້າງ ແລະ ການປະເມີນໂຄງການນໍາພາກລັດ ແລະ ເອກະຊົນ. ເປັນຕົ້ນແມ່ນ ບັນດາກະຊວງ, ແຂວງ, ພະແນກ​​ໂຍທາ​ທິການ ​ແລະ ຂົນ​ສົ່ງ, ບໍລິສັດອອກແບບ,​ ບໍລິສັດກໍ່ສ້າງ ແລະ ບໍລິສັດທີ່ປຶກສາ.