ບໍລິຫານທຸລະກິດ
ບໍລິຫານທຸລະກິດ ໝາຍເຖິງ ຄວາມຮູ້, ເຕັກນິກ, ທິດສະດີ ແລະ ວິທີການຕ່າງໆ ທີ່ກ່ຽວຂ້ອງກັບການບໍລິຫານທຸລະກິດ. ການປະກອບທຸລະກິດ ນອກຈາກຈະສ້າງລາຍໄດ້ໃຫ້ຜູ້ປະກອບການແລ້ວ ຍັງສ້າງວຽກເຮັດງານທໍາ ແລະ ສ້າງຄວາມເຂັ້ມແຂງໃຫ້ເສດຖະກິດ. ເຈົ້າຂອງທຸລະກິດ ຫຼື ຜູ້ບໍລິຫານຈໍາເປັນຕ້ອງມີຄວາມຮູ້ໃນດ້ານຕ່າງໆທີ່ສາມາດເຮັດໃຫ້ທຸລະກິດດໍາເນີນໄປຢ່າງເປັນລະບົບ, ສາມາດສ້າງກໍາໄລ, ນໍາໃຊ້ຊັບພະຍາກອນຢ່າງມີປະສິດທິພາບ ແລະ ຍັງມີຄວາມສາມາດໃນການແຂ່ງຂັນ.
ສາຂານີ້ ສຶກສາໂດຍລວມກ່ຽວກັບອົງປະກອບທຸກດ້ານທີ່ຈໍາເປັນຕໍ່ການບໍລິຫານທຸລະກິດໃດໜຶ່ງເຊັ່ນ: ພື້ນຖານບັນຊີທົ່ວໄປ ແລະ ບັນຊີວິສາຫະກິດ, ພື້ນຖານທາງດ້ານການເງິນ ແລະ ການທະນາຄານ, ການບໍລິຫານບຸກຄະລາກອນ ແລະ ຄຸ້ມຄອງຫ້ອງການ, ການບໍລິຫານການຕະຫຼາດ. ນອກນີ້ ຍັງຮຽນກ່ຽວກັບ ການເລີ່ມຕົ້ນ ແລະ ປະກອບທຸລະກິດ, ກົດໝາຍທຸລະກິດ, ພື້ນຖານດ້ານເສດຖະສາດ, ພາສາອັງກິດສໍາລັບທຸລະກິດ ແລະ ການບໍລິຫານການຈັດສົ່ງສິນຄ້າ ເປັນຕົ້ນ.
ການສິດສອນ ລວມມີທັງການບັນຍາຍທາງທິດສະດີ ແລະ ລົງມືປະຕິບັດຕົວຈິງ. ມີການນໍາໃຊ້ ການຮຽນ-ການສອນ ຫຼາຍ ຮູບແບບ ເພື່ອໃຫ້ນັກສຶກສາເຂົ້າໃຈເຖິງເນື້ອໃນຢ່າງເລິກເຊິ່ງ ຜ່ານການສົນທະນາ, ການເຮັດບົດລາຍງານ, ການນໍາສະເໜີ, ວິເຄາະ ບັນດາກໍລະນີສຶກສາດ້ານທຸລະກິດຕົວຈິງ. ມີການລົງຝຶກງານເພື່ອສຶກສາວຽກງານບໍລິຫານຫ້ອງການ ແລະ ສຶກສາການດໍາເນີນງານຂອງທຸລະກິດໃດໜຶ່ງ ໃນຫ້ອງການ ແລະ ບໍລິສັດທີ່ກ່ຽວຂ້ອງ.
ຄວາມຮູ້ພື້ນຖານ ຄະນິດສາດ ແລະ ພາສາຕ່າງປະເທດຍິ່ງເປັນການດີ; ເປັນຄົນ ທີ່ມັກສັງເກດ, ມັກການບໍລິຫານຈັດການ, ມັກຄວາມສ່ຽງ ແລະ ມີຄວາມເປັນຜູ້ນໍາ; ມີທັກສະ ໃນການສື່ສານ, ການແກ້ໄຂບັນຫາສະເພາະໜ້າ ແລະ ມີມະນຸດສໍາພັນດີ; ມີຄວາມມັກໃນການດໍາເນີນທຸລະກິດ, ຄ້າຂາຍ ແລະ ຢາກມີທຸລະກິດເປັນຂອງຕົນເອງ ຫຼື ສືບທອດທຸລະກິດຄອບຄົວ.
ມີຄວາມຮູ້ ແລະ ທັກສະ ພື້ນຖານໃນການຕັ້ງຕົ້ນ ແລະ ປະກອບທຸລະກິດ; ມີຄວາມຮູ້ ແລະ ທັກສະພື້ນຖານດ້ານການລົງບັນຊີ, ການບໍລິຫານຊັບພະຍາກອນມະນຸດ, ການຈັດຫ້ອງການ, ການບໍລິຫານການຕະຫຼາດ; ຄວາມຮູ້ກ່ຽວກັບກົນໄກຂອງທະນາຄານ, ການຄິດໄລ່ທາງການເງິນ ແລະ ແຫຼ່ງເງິນທຶນສໍາລັບທຸລະກິດ; ແລະ ທັກສະພາສາອັງກິດສໍາລັບທຸລະກິດ.
Leave A Comment