ສື່ສານມວນຊົນ
ສື່ສານມວນຊົນ ໝາຍເຖິງການນໍາໃຊ້ສື່ຕ່າງໆ ເພື່ອເປັນເຄື່ອງມືໃນການຕິດຕໍ່ສື່ສານ, ເຜີຍແຜ່ຂໍ້ມູນຄວາມຮູ້ທີ່ສຳຄັນ ແລະ ສາລະໜ້າຮູ້ທີ່ເປັນປະໂຫຍດໃຫ້ແກ່ສັງຄົມ ໂດຍຜ່ານຊ່ອງທາງຕ່າງໆ ເຊັ່ນ: ໜັງສືພິມ, ວາລະສານ, ໂທລະພາບ ຫຼື ວິທະຍຸເປັນຕົ້ນ. ສື່ສານມວນຊົນມີບົດບາດສຳຄັນຫຼາຍ ໃນການກະຈາຍຂໍ້ມູນ, ແລກປ່ຽນຂ່າວສານເຊິ່ງກັນ ແລະ ກັນອັນກໍ່ໃຫ້ເກີດມີການເຄື່ອນໄຫວ ແລະ ຮັບຮູ້ຂ່າວສານບ້ານເມືອງພາຍໃນສັງຄົມປັດຈຸບັນ.
ສາຂາວິຊານີ້ຮຽນກ່ຽວກັບບັນດາວິທີການເຜີຍແຜ່ຂໍ້ມູນຂ່າວສານຕ່າງໆ ເຊັ່ນ: ການຂຽນຂ່າວໃນໜັງສືພີມ ຫຼື ການຂຽນບົດຄວາມໃນວາລະສານຕ່າງໆ, ຫຼັກການລາຍງານຂ່າວ, ການຈັດທຳຂ່າວ, ການຖ່າຍທຳ ແລະ ການຕັດຕໍ່ພາບ. ນອກຈາກນັ້ນ ຍັງຮຽນຮູ້ກ່ຽວກັບສິລະປະການເວົ້າ, ການເປັນໂຄສົກວິທະຍຸກະຈາຍສຽງ ແລະ ໂທລະພາບ ພ້ອມທັງສຶກສາກ່ຽວກັບຄຸນສົມບັດ ແລະ ຈັນຍາບັນຂອງສື່ມວນຊົນກໍຄືນັກຂ່າວ ແລະ ນັກໜັງສືພິມເປັນຕົ້ນ.
ວິທີການສິດສອນແມ່ນອີງໃສ່ທັງພາກທິດສະດີ ແລະພາກປະຕິບັດຕົວຈິງໄປຄຽງຄູ່ກັນ ເຊັ່ນ: ການທົດລອງການເປັນໂຄສົກ, ການນຳໃຊ້ຫ້ອງອັດສຽງ-ຟັງສຽງ ເປັນຕົ້ນ. ນອກນັ້ນ, ນັກສຶກສາຍັງຈະມີໂອກາດເຂົ້າຮ່ວມໃນກິດຈະກຳທີ່ໂຮງຮຽນຈັດຕັ້ງຂຶ້ນ ເຊັ່ນ: ການຂຽນຂ່າວຕິດກະດານຂ່າວສານ, ການຖ່າຍທຳພິທີການພາຍໃນໂຮງຮຽນ ພ້ອມທັງມີການລົງຝຶກງານໃນສະຖານີໂທລະພາບ ແລະ ສະຖານີວິທະຍຸກະຈາຍສຽງແຫ່ງຊາດ ເປັນຕົ້ນ.
ຄວາມຮູ້ພື້ນຖານທາງດ້ານພາສາລາວ ແລະ ພາສາຕ່າງປະເທດ. ມີຄວາມມັກຮັກ ໃນການຂຽນຂ່າວປະເພດຕ່າງໆ. ເປັນຄົນມີມະນຸດສຳພັນດີ, ມີຄວາມສາມາດໃນການວາງແຜນ ແລະ ວິເຄາະສະຖານະການ, ມີຄວາມຮູ້ດ້ານການນໍາໃຊ້ອຸປະກອນໄອທີຕ່າງໆ, ມີຄວາມຊື່ສັດສຸຈະລິດ ແລະ ຍຸດຕິທຳໃນການເຜີຍແຜ່ຂໍ້ມູນ. ທີ່ສໍາຄັນ ແມ່ນຕ້ອງມີທັກສະໃນການນໍາສະເໜີຂໍ້ມູນ.
ມີຄວາມຮູ້ດ້ານພາສາຕ່າງປະເທດ, ມີຄວາມສາມາດໃນການນຳໃຊ້ສຳນວນພາສາລາວ ຫຼື ພາສາຕ່າງປະເທດ ເຊັ່ນ: ການໃຊ້ຄໍາສັບທາງລັດຖະການທີ່ຖືກຕ້ອງ ເປັນຕົ້ນ. ມີຄວາມຮູ້ດ້ານໄອທີ ແລະ ການນໍາໃຊ້ຄອມພີວເຕີ ເຂົ້າໃນການສ້າງສື່ຕ່າງໆ ເຊັ່ນ: ການຕັດຕໍ່ຮູບພາບ, ການຖ່າຍພາບ ແລະ ຖ່າຍວິດີໂອ. ມີທັກສະ ແລະ ສິລະປະໃນການເວົ້າທີ່ດຶງດູດໃຈຜູ້ອື່ນ.
ສາມາດປະກອບອາຊີບໃນທຸກຂະແໜງການທີ່ກ່ຽວຂ້ອງກັບການສື່ສານ ເຊັ່ນ: ເປັນໂຄສົກ, ນັກຂ່າວໂທລະພາບ ແລະ ວິທະຍຸ, ນັກຂ່າວໜັງສືພິມ, ນັກຂຽນວາລະສານ, ເປັນບັນນາທິການ ຫຼື ຜູ້ຖ່າຍທຳພາບໃນອົງກອນຕ່າງໆ ເຊັ່ນ: ໂທລະພາບແຫ່ງຊາດລາວ ແລະ ບັນດາຫົວໜວ່ຍທຸລະກິດໂທລະພາບ, ວິທະຍຸກະຈາຍສຽງ, ເປັນໂຄສົກໃນກອງປະຊຸມ ແລະ ງານສັງສັນຕ່າງໆ.
-
- ໝວດວິຊາຄວາມຮູ້ພື້ນຖານວິຊາສະເພາະ
- ພາສາສາດພື້ນຖານ
- ພາສາລາວນໍາໃຊ້ໂດຍສັງເຂບ
- ພາສາອັງກິດທົ່ວໄປ
- ຕັກກະສາດຮູບການ
- ໂສພະນິຍະສາດຂັ້ນຕົ້ນ
- ວັດທະນະທໍາລາວ
- ທິດສະດີວັນນະຄະດີ
- ວັນນະຄະດີລາວ (ປະຫວັດ ແລະ ວິເຄາະ)
- ວັນນະຄະດີອາຊີ (ຫວຽດ, ໄທ, ກໍາປູເຈຍ ແລະ ວິເຄາະບົດ)
- ວັນນະຄະດີໂລກ (ຫຼູຊິນ, ກ໊ອກກີ, ວິກຕໍ ຮຸຍໂກ, ເຊັກສະເປຍ)
- ປະຫວັດສາດພັກ
- ການພົວພັນການເມືອງສາກົນ
- ປະຫວັດສາດອະລິຍະທໍາໂລກ
- ປະຫວັດແນວຄິດຕາເວັນອອກ
- ໝວດວິຊາສະເພາະ
- ທິດສະດີການສື່ສານມວນຊົນ
- ກົດໝາຍ ແລະ ຈັນຍາບັນສື່ມວນຊົນ
- ເຕັກໂນໂລຊີເພື່ອການສື່ສານມວນຊົນ
- ການສື່ສານມວນຊົນເບື້ອງຕົ້ນ
- ປະຫວັດການໜັງສືພິມ (ໂລກ ແລະ ລາວ)
- ພາສາເພື່ອການສື່ສານມວນຊົນ
- ການສໍາພາດ
- ສື່ມວນຊົນກັບສັງຄົມ
- ຈິດຕະສາດການສື່ສານມວນຊົນ
- ແນະນໍາການຂ່າວພາບ ແລະ ການຖ່າຍພາບ
- ການຈັດໜ້າໜັງສືພິມ ແລະ ວາລະສານ
- ການບັນນາທິການ
- ຄວາມຮູ້ພື້ນຖານກ່ຽວກັບຂ່າວ
- ການຂຽນຂ່າວ ແລະ ການລາຍງານຂ່າວ
- ພາສາອັງກິດເພື່ອການສື່ສານມວນຊົນ
- ການຂຽນບົດ, ການຜະລິດລາຍການວິທະຍຸ ແລະ ໂທລະພາບ
- ການຂຽນບົດຄວາມ
- ການຂຽນບົດສາລະຄະດີ
- ການເປັນໂຄສົກ ແລະ ພິທີກອນ
- ການຂຽນໂຄສະນາ ແລະ ປະຊາສໍາພັນ
Leave A Comment