​ໄຟຟ້າ​​ເຕັກນິກ

ໄຟຟ້າ​ ແມ່ນພະ​ລັງງານ​​ທີ່ສຳຄັນ ທີ່ນຳ​ໃຊ້​ເຂົ້າ​ໃນ​ການ​ດຳລົງ​ຊີວິດ ​ແລະ ການ​ຜະລິດ​ອຸດສາຫະກຳ. ການຜະລິດ​ພະລັງງານ​ໄຟຟ້າ ​ເພື່ອ​ຕອບ​ສະໜອງ​ໃຫ້​ແກ່​ການ​ຊົມ​ໃຊ້​ ຈຶ່ງ​ເປັນ​ຂະ​ແໜງ​ໜຶ່ງ ​ທີ່​ປະກອບສ່ວນ​ເຂົ້າ​​ໃນ​ການ​ພັດທະນາ​ຂະ​ແໜງ​ອຸດສາຫະກຳ, ການ​ຜະລິດກະສິກໍາ ​ແລະ ບໍລິການ ​ເວົ້າ​ລວມກໍ່ຄຶ​ເສດຖະກິດ ​ດັ່ງນັ້ນ​ວິຊາ​ການຫຼາຍ​ດ້ານທີ່​ກ່ຽວກັບ​ໄຟຟ້າ ​ເຊັ່ນ: ​ການ​ຕິດຕັ້ງລະບົບ​ໄຟຟ້າ, ການ​ຄວມຄຸມ​ເຄື່ອງ​ຈັກ​ໄຟຟ້າ ລວມ​ເຖິງ​ການ​ສ້ອມ​ແປງ​ເຄື່ອງ​ໃຊ້​ໄຟຟ້ານີ້ ຈຶ່ງ​ມີ​ຄວາມ​ສຳຄັນ ​​ແລະ ຕ້ອງການ​ໃນ​ສັງຄົ​ມ.

ສາຂານີ້ ສຶກສາລົງ​ເລິກກ່ຽວກັບ ​ລະບົບ​ໄຟຟ້າ ກວມ​ເອົາ​ ການອອກ​ແບບ ​ແລະ ​ຕິດ​ຕັ້ງ​​​ໄຟຟ້າ​ໃນ​ອາຄານ ​ແລະ ​ໄຟຟ້າ​ກໍາລັງ ກໍຄື ລະບົບໝໍ້​ແປງ;​ ລະບົບ​ການຄວາມ​ຄຸ​ມ​ເຄື່ອງຈັກ​ໄຟຟ້າ ​ແລະ ລະບົບ​ຄວບ​ຄຸມ​ມໍ​ເຕີ​ໃນ​ໂຮງງານ ​ເຊິ່ງ​ເປັນພື້ນຖານ​​ໃຫ້​ແກ່​ການຄວບ​ຄຸມ​ດ້ວຍ​ລະບົບ​ຄອມ​ພິວ​ເຕີ. ນອກ​ນັ້ນ​ຍັງ​ຈະ​ໄດ້​ສຶກສາ​ກ່ຽວ​ກັບ ການ​ຕິດຕັ້ງລະບົບເຄື່ອງ​ເຢັນ ​ເຊັ່ນ ​ແອ​ເຢັນ, ຕູ້​ເຢັນ ​ແລະ ຮຽນ​ຮູ້​ກ່ຽວ​ກັບ​ການ​ສ້ອມ​ແປງ​ລະບົບ​ເຄື່ອງ​ເຢັນ ​ແລະ ເຄື່ອງ​ໃຊ້​ໄຟຟ້າຕ່າງໆ​ເຊັ່ນ: ​ເຄື່ອງ​ຈັກຊັກ​ຜ້າ ​ແລະ ​ໂທລະພາບ. 

ການສິດສອນຂອງ ສາຂາວິຊານີ້ ປະກອບ​ມີ ການບັນລະຍາຍທາງດ້ານທິດສະດີ ແລະ ​ເນັ້ນ​​ໃສ່ການຈັດ​ຕັ້ງ​ປະຕິບັດ​ຕົວ​ຈິງ ​ຜ່ານ​ວິທີການ​ສາທິດ ​ແລະ ນຳ​ໃຊ້​ອຸປະກອນ​ຕົວ​ຈິງ​ໃນ​ຫ້ອງ​ທົດ​ລອງ, ຫ້ອງ​ສໍາລັບ​ເດີນ​ສາຍ​ໄຟ ​ແລະ ຫ້ອງ​ຄວບ​ຄຸມ​ເຄື່ອງ​ຈັກ​ ເຊັ່ນ: ​ນັກ​ສຶກສາ​ຈະ​ໄດ້ນໍາ​ໃຊ້​ທິດ​ສະ​ດີ​ທີ່​ຮຽນ ​ເຂົ້າ​ໃນ​ການ​ອອກ​ແບບ, ຄິດ​ໄລ່ ​ແລະ ​ຕິດ​ຕັ້ງ​ໄຟຟ້າດ້ວຍ​ວິທີ​ການ​ຕ່າງໆ. ນອກ​ນີ້ຍັງ ຮຽນຈາກການ​​ແຍກ​ສິ້ນສ່ວນ, ປະກອບ ​ແລະ ສ້ອມ​ແປງ​ອຸປະກອນ​ໄຟຟ້າ​ຕົວ​ຈິງ. 

​ມີຄວາມ​ຮູ້​ພື້ນຖານ ທາງ​ດ້ານ​ຟິຊິກ​ສາດ, ​ເຄມີ​ສາດ ​ແລະ ຄະນິດສາດ; ​ມີຄວາມສົນໃຈ​ ກ່ຽວກັບ ເຄື່ອງໃຊ້​ໄຟຟ້າ ​ແລະ ລະບົບ​ໄຟຟ້າ ​ໂດຍສະ​ເພາະ​​ເຕັກນິກການ​ຕິດ​ຕັ້ງ ​ແລະ ຄວບຄຸມລະບົບໄຟຟ້າ​;​ ເປັນ​ຄົນ ​​ໃສ່​ໃຈ​ໃນ​ລາຍ​ລະອຽດ, ມັກຄວາມທ້າທາຍ, ມັກການເຮັດວຽກນອກສະຖານທີ່, ມັກການປະຕິບັດຕົວຈິງ ​ແລະ ມີ​ຄວາມ​ອົດທົນ​ສູງ.

ພາຍຫຼັງຮຽນຈົບ, ນັກສຶກສາ ຈະມີ​ຄວາມສາມາດ​ໃນການ​ອອກ​ແບບ ​ແລະ ​ຕິດ​ຕັ້ງ​ລະບົບ​ໄຟຟ້າ​ໃນ​ອາຄານ ​ແລະ ການວາງຕາໜ່າງ​ເຄືອຂ່າ​ຍສາຍ​ໄຟຟ້າ. ສາມາດ​ສ້ອມ​ແປງ​ເຄື່ອງ​ໃຊ້​ໄຟຟ້າປະ​ເພດ​ຕ່າງໆ ​ລວມທັງ​ລະບົບ​ເຄື່ອງ​ເຢັນ​ຕ່າງໆ​. ນັກ​ສຶກສາ​ຈະ​ມີ​ຄວາມ​ຮູ້​ທາງ​ດ້ານ​ການ​ຄວມຄຸມ​ເຄື່ອງ​ຈັກ​ໄຟຟ້າ ​ແລະ ​ເຄື່ອງ​ຈັກ​ທີ່​ຄວມຄຸມ​ໂດຍ​ລະບົບ​ຄອມ​ພິວ​ເຕີ. 

ສາມາດປະກອບອາຊີບເປັນນັກວິຊາການອອກ​ແບບ ​ແລະ​ ຕິດ​ຕັ້ງ​ລະບົບ​ໄຟຟ້າ; ​ເປັນ​ນັກ​ວິຊາ​ການ​ຄວບ​ຄຸມ​ເຄື່ອງ​ຈັກ ຕາມ​ໂຮງງານ​ອຸດສາຫະກຳ,​ ​ເຂື່ອນ​ໄຟຟ້າ ​ແລະ ສະຖານ​ນີ​ໄຟຟ້າ ຕ່າງໆ; ​​​ເປັນ​ວິຊາ​ການ​ທາງ​ດ້ານ​ລະບົບ​ເຄື່ອງ​ເຢັນ ​ແລະ ​ການ​ສ້ອມ​ແປງ​ເຄື່ອງ​ໃຊ້​ໄຟຟ້າ ​ແລະ ຍັງ​ສາມາດ​ ​ເປັນເຈົ້າ​ຂອງ​ກິດຈະການ​ທາງ​ດ້ານ ການຕິດຕັ້ງ​ ແລ​ະ ການ​ສ້ອມ​ແປງລະບົບ​ໄຟຟ້າ.