ສາຂາ ເຕັກໂນໂລຊີລົດຍົນ

ເຕັກໂນໂລຊີລົດຍົນ ແມ່ນ ວິທີການນໍາໃຊ້ຂໍ້ມູນກ່ຽວກັບ ກົນຈັກລົດຍົນ ເຂົ້າໃນການດໍາເນີນການສ້ອມແປງ ແລະ ການປະກອບ ສ້າງດ້ານກົນຈັກລົດຍົນ ເພື່ອເຮັດໃຫ້ເຄື່ອງຈັກລົດຍົນສາມາດໃຊ້ການໄດ້. ຍ້ອນລົດຍົນນັບມື້ນັບເພີ່ມຂຶ້ນເປັນຈໍານວນຫຼາຍ, ເຕັກໂນໂລຊີລົດຍົນຈຶ່ງ ມີຄວາມສໍາຄັນໃນການສ້າງພະນັກງານ ໃຫ້ມີຄວາມສາມາດ ແລະ ມີຄວາມຊໍານານສະເພາະດ້ານການສ້ອມແປງ ແລະ ປະກອບສ້າງເຄື່ອງກົນຈັກລົດຍົນ ໂດຍສະເພາະແມ່ນ ລົດໃຫຍ່ ແລະ ລົດຈັກ.

ສາຂານີ້ຮຽນກ່ຽວກັບການປະກອບສ້າງຂອງລະບົບລົດຍົນເຊີ່ງລວມມີທັງລົດໃຫ່ຍ ແລະ ລົດຈັກ, ລະບົບຕ່າງໆ ຂອງລົດຍົນໂດຍລວມເຊັ່ນ ການປະກອບສ້າງຂອງ ຊ່ວງລ່າງ, ລະບົບໄຟຟ້າຂອງລົດຍົນ ແລະ ຊິ້ນສ່ວນປະກອບອື່ນໆຂອງລົດຍົນ ແລະ ວິທີການສ້ອມແປງ ແລະ ບົວລະບັດລົດຍົນ. ນອກຈາກນັ້ນ, ຍັງຮຽນກ່ຽວກັບການປະກອບທຸລະກິດ ຂະໜາດນ້ອຍ ແລະ ຂະໜາດກາງ ສໍາລັບການເປີດບໍລິການສ້ອມແປງລົດຍົນ ອີກດ້ວຍ.

ໃນຫຼັກສູດການສຶກສາ ເຕັກໂນໂລຊີລົດຍົນ ໃນລະດັບຊັ້ນກາງ ແມ່ນ ມີການບັນລະບາຍທາງດ້ານພາກທິດສະດີ 70% ແລະ ມີການປະຕິບັດຕົວຈິງດ້ານ ພາກປະຕິບັດ 30%. ໃນພາກປະຕິບັດຕົວຈິງ ນັກສຶກສາຈະໄດ້ມີການປະຕິບັດການທົດລອງຕົວຈິງ ໃນການສ້ອມແປງດ້ານເຄື່ອງຈັກຂອງລົດຍົນທີ່ມີຢູ່ໃນໂຮງຮຽນ. ນອກຈາກນີ້, ນັກສຶກສາຈະໄດ້ລົງຝຶກງານ ໂດຍສະເພາະແມ່ນ ຢູ່ຕາມບັນດາສະຖານທີ່ ທຸລະກິດສ້ອມແປງລົດຍົນ ຫຼື ອູ່ສ້ອມແປງຂອງ ເອກະຊົນ.

ຄວາມຮູ້ພື້ນຖານ ດ້ານ ຄະນິດສາດ ແລະ ຟິຊິກສາດ.  ຄວນເປັນຄົນທີ່ມີຄວາມມັກ ແລະ ສົນໃຈກ່ຽວກັບດ້ານເຄື່ອງກົນຈັກ, ການປະກອບສ້າງຂອງໂຄງສ້າງລົດຍົນ. ນອກນັ້ນ, ນັກສຶກສາຄວນ ເປັນຄົນທີ່ມີສຸຂະພາບແຂງແຮງດີ ເພາະການສຶກສາໃນວິຊາ ດັ່ງກ່າວ ນັກສຶກສາຈະໄດ້ມີການອອກແຮງງານ.

ຮູ້ຈັກວິທີການນໍາໃຊ້ຄວາມຮູ້ ແລະ ຂໍ້ມູນດ້ານລະບົບເຄື່ອງຈັກລົດຍົນ ເພື່ອໄປດໍາເນີນການສ້ອມແປງ ແລະ ການປະກອບສ້າງ ຂອງລົດຍົນໄດ້ແບບໂດຍລວມ; ສາມາດຮູ້ຈັກວິທີການປະຊາສໍາພັນ ກັບລູກຄ້າ, ກັບຜູ້ທີ່ໃຊ້ລົດຍົນ ແລະ ມີຄວາມສາມາດພື້ນຖານ ດ້ານການດໍາເນີນທຸລະກິດຂະໜາດນ້ອຍ ອີກດ້ວຍ.

ສາມາດປະກອບອາຊີບ ເປັນຜູ້ຊ່ວຍຊ່າງແປງລົດຍົນ ແລະ ເປັນນາຍຊ່າງສ້ອມແປງລົດ ຢູ່ຕາມສະຖານທີ່ສ້ອມແປງລົດຍົນ ເປັນຕົ້ນແມ່ນ ອູ່ສ້ອມແປງລົດຍົນ.  ນອກນັ້ນ ນັກສຶກສາທີ່ຈົບການສຶກສາດັ່ງກ່າວ ຍັງສາມາດປະກອບທຸລະກິດ ເປັນເຈົ້າຂອງ ຮ້ານສ້ອມແປງລົດຍົນ ດ້ວຍຕົນເອງ ອີກດ້ວຍ.