ການເງິນ-ການທະນາຄານ
ການເງິນ-ການທະນາຄານ ໝາຍເຖິງ ວຽກງານໃນຂະແໜງການທີ່ກ່ຽວກັບການໃຫ້ບໍລິການທາງດ້ານການເງິນ ເຊັ່ນ: ສະຖາບັນການເງິນ-ການທະນາຄານ, ການບໍລິຫານສິນເຊື່ອ, ຕະຫຼາດການເງິນ, ຕະຫຼາດທຶນ ແລະ ອື່ນໆ. ປັດຈຸບັນ ການເງິນ-ການທະນາຄານໄດ້ມີການຂະຫຍາຍຕົວຢ່າງວ່ອງໄວ ແລະ ກວ້າງຂວາງພໍສົມຄວນ ເຊິ່ງມີບົດບາດສຳຄັນໃນການຈັດຫາແຫຼ່ງທຶນ ແລະ ອໍານວຍຄວາມສະດວກດ້ານທຸລະກໍາດ້ານການເງິນໃຫ້ແກ່ ບຸກຄົນ ແລະ ຫົວໜ່ວຍທຸລະກິດ.
ວິຊານີ້ຮຽນກ່ຽວກັບພາບລວມຂອງການເງິນ ແລະ ການທະນາຄານ, ການບັນຊີ, ວິທີການຄິດໄລ່ດອກເບ້ຍ, ຮຸ່ນກູ້ ແລະ ພັນທະບັດ. ນອກນັ້ນ, ຍັງສຶກສາກ່ຽວກັບການບໍລິການຂອງທະນາຄານ ເປັນຕົ້ນແມ່ນ ການຮັບຝາກເງິນ, ຂະບວນການປ່ອຍກູ້ ແລະ ການປ່ອຍສິນເຊື່ອ; ລະບົບການບໍລິຫານ-ດໍາເນີນງານຂອງທະນາຄານ ແລະ ສະຖາບັນການເງິນຕ່າງໆ; ການກໍານົດນະໂຍບາຍທາງການເງິນ, ການບໍລິຫານການຈັດຫາເງິນທຶນ ແລະ ການບໍລິຫານການໃຊ້ເງິນທຶນ ຫຼື ລົງທຶນ.
ວິທີການສິດສອນຂອງສາຂາວິຊານີ້ ແມ່ນອີງໃສ່ພາກທິດສະດີເປັນຫຼັກ ແລະ ຍັງມີພາກປະຕິບັດຕົວຈິງ. ນອກນັ້ນ, ຍັງມີການຮຽນຈາກກໍລະນີສຶກສາ ເຊັ່ນ: ສຶກສາກ່ຽວກັບການເງິນລະຫວ່າງປະເທດ ເປັນຕົ້ນແມ່ນ ຂອງປະເທດກຸ່ມອາຊຽນ ແລະ ຍັງມີການໄປທັດສະນະທຸກໆປີຢູ່ຕາມໜ່ວຍງານ ແລະ ສະຖານທີ່ ທີ່ກ່ຽວຂ້ອງກັບວິຊາຮຽນ. ສໍາລັບນັກສຶກສາປີສຸດທ້າຍ ແມ່ນ ຈະໄດ້ຮັບໂອກາດໄປລົງຝຶກງານຕາມທະນາຄານລັດ ແລະ ເອກະຊົນຕ່າງໆ.
ຄວາມຮູ້ພື້ນຖານດ້ານ ວິຊາຄະນິດສາດ, ຄອມພີວເຕີເບື້ອງຕົ້ນ (ການນໍາໃຊ້ໂປແກຣມ Word, Excel) ແລະ ພາສາອັງກິດ; ເປັນຄົນ ທີ່ມີຄວາມມັກຮັກດ້ານການບໍລິການ, ມີມະນຸດສຳພັນດີ, ມີຄວາມສາມາດໃນການວາງແຜນ, ວິເຄາະສະຖານະການ, ມີຄວາມຊີ່ສັດສຸຈະລິດ ແລະ ຍຸດຕິທຳ; ແລະ ມີຄວາມສົນໃຈໃນ ການດໍາເນີນງານຂອງການທະນາຄານ.
ນັກສຶກສາຈະມີຄວາມຮູ້ພື້ນຖານດ້ານວຽກງານການເງິນ-ການທະນາຄານ ເປັນຕົ້ນແມ່ນ ການວິເຄາະ ແລະ ຄາດຄະເນມູນຄ່າສິນເຊື່ອ, ການຄິດໄລ່ດອກເບ້ຍ ແລະ ບໍລິການອື່ນໆ ຂອງທະນາຄານ; ຮູ້ການຄິດໄລ່ບັນຊີ. ນອກນັ້ນ, ຍັງສາມາດພັດທະນາ ແລະ ສ້າງຕົນເອງໃຫ້ເປັນຜູ້ບໍລິຫານທະນາຄານ ແລະ ສະຖາບັນການເງິນທີ່ດີ.
Leave A Comment