ການບໍລິການອາຫານ ແລະ ເຄື່ອງດື່ມ
ການບໍລິການອາຫານ ແລະ ເຄື່ອງດື່ມ ໝາຍເຖິງ ການໃຫ້ບໍລິການດ້ານອາຫານ ແລະ ເຄື່ອງດື່ມ ເຊິ່ງລວມເອົາ ຮູບແບບ, ມາດຕະຖານ, ວິທີການ ແລະ ອື່ນໆທີ່ກ່ຽວຂ້ອງ. ອຸດສາຫະກໍາດ້ານນີ້ ແມ່ນໜຶ່ງໃນຂະແໜງການບໍລິການທີ່ສ້າງວຽກເຮັດງານທໍາ ແລະ ສ້າງລາຍໄດ້ໃຫ້ແກ່ປະເທດ. ສາຂານີ້ ຍັງຊຸກຍູ້ໃຫ້ການບໍລິການອາຫານ ແລະ ເຄື່ອງດື່ມ ມີຄວາມສະອາດ, ຖືກຫຼັກອະນາໄມ ແລະ ສອດຄ່ອງຕາມມາດຕະຖານສາກົນ ເຊິ່ງສິ່ງເຫຼົ່ານີ້ຍັງຊ່ວຍສົ່ງເສີມຂະແໜງການທ່ອງທ່ຽວໃຫ້ເຂັ້ມແຂງ.
ສາຂານີ້ ສຶກສາລົງເລິກກ່ຽວກັບຂອບເຂດການບໍລິການທາງດ້ານອາຫານ ແລະ ຮ້ານອາຫານ, ການບໍລິການລູກຄ້າ, ການບໍລິຫານຈັດການ ແລະ ການຕະຫຼາດ ເປັນຕົ້ນແມ່ນ ຄວາມຮູ້ ແລະ ທັດສະນະໃນການບໍລິການອາຫານ ແລະ ເຄື່ອງດື່ມ ພ້ອມຫຼັກສຸຂະອະນາໄມໃນການໃຫ້ບໍລິການ; ຮຽນຮູ້ວິທີການເສີບອາຫານແບບປະເພດຕ່າງໆ ໂດຍສະເພາະຮູບແບບສາກົນ ເຊັ່ນ: ແບບ ອາເມຣິກາ, ຝຣັ່ງ ແລະ ອັງກິດ. ນອກນັ້ນ ຍັງຮຽນກ່ຽວກັບ ການປຸງແຕ່ງເຄື່ອງດື່ມ Cocktail ແລະ Mocktail.
ການສິດສອນ ລວມມີທັງການບັນລະຍາຍທາງທິດສະດີ ແລະ ລົງມືປະຕິບັດຕົວຈິງ. ມີການນໍາໃຊ້ ການຮຽນ-ການສອນ ຫຼາຍຮູບແບບ ເພື່ອໃຫ້ນັກສຶກສາເຂົ້າໃຈເຖິງບັນຫາ, ກໍາໄດ້ເນື້ອໃນບົດຮຽນໄດ້ຢ່າງຄົບຖ້ວນ ແລະ ສາມາດຕໍ່ຍອດບົດຮຽນທີ່ໄດ້ຮຽນມາເຂົ້າໃນສະພາບຕົວຈິງ. ມີການລົງຝຶກງານເພື່ອສຶກສາວຽກງານບໍລິການອາຫານ ແລະ ເຄື່ອງດື່ມ ເປັນຕົ້ນແມ່ນ ການຈັດໂຕະອາຫານ, ການເສີບ ແລະ ອື່ນໆ ໃນຮ້ານອາຫານຂອງໂຮງຮຽນ ທີ່ມີມາດຕະຖານການບໍລິການແບບສາກົນ.
ມີຄວາມຮູ້ ແລະ ທັກສະ ໃນການບໍລິການອາຫານ ແລະ ເຄື່ອງດື່ມ, ມີຄວາມຮູ້ພື້ນຖານໃນການບໍລິຫານງານໃນຮ້ານອາຫານ, ມີທັກສະ ແລະ ຄວາມຮູ້ໃນການແກ້ໄຂບັນຫາ, ແນວຄິດໃນທາງວິເຄາະ, ທັກສະໃນການສື່ສານຢ່າງມີປະສິດທິພາບ ແລະ ການເຮັດວຽກເປັນທີມ, ມີທັດສະນະຄະຕິ, ທ່າທາງ ແລະ ການປະພຶດແບບມືອາຊີບທີ່ຈະນໍາໄປສູ່ການບໍລິການທີ່ດີເລີດ.
- ຄວາມຮູ້ພື້ນຖານກ່ຽວກັບການທ່ອງທ່ຽວ ແລະ ການໂຮງແຮມ
- ພາສາອັງກິດສໍາລັບການທ່ອງທ່ຽວ
- ທັກສະການສື່ສານຢ່າງມືອາຊີບ
- ຄອມພິວເຕີ
- ການບໍລິການລູກຄ້າ
- ຄວາມຮູ້ພື້ນຖານກ່ຽວກັບການປຸງແຕ່ງອາຫານ
- ຄວາມຮູ້ພື້ນຖານກ່ຽວກັບການບໍລິການອາຫານ ແລະ ເຄື່ອງດື່ມ
- ການແກ້ໄຂບັນຫາ
- ພາສາລາວ
- ຄວາມຮູ້ພື້ນຖານກ່ຽວກັບການບໍລິຫານ
Leave A Comment