ຈັດສັນຄຸ້ມຄອງປ່າໄມ້

ການຈັດສັນຄຸ້ມຄອງປ່າໄມ້ ແມ່ນການສຶກສາກ່ຽວກັບໂຄງສ້າງເຂດທີ່ຢູ່ອາໄສ ແລະ ການຄຸ້ມຄອງຂັ້ນພື້ນຖານຂອງປ່າ, ສັດ ແລະ ພືດ. ຮຽນຮູ້ກ່ຽວກັບການອອກແບບ ແລະ ຟື້ນຟູປ່າທຳມະຊາດ, ການສຳຫຼວດເພື່ອຂຸດຄົ້ນ ແລະ ຢັ້ງຢືນປ່າໄມ້. ສາຂານີ້ ມີຄວາມສຳຄັນໃນການ​ຄຸ້ມ​ຄອງ​ ແລະ ນຳ​ໃຊ້​ໄມ້ ແລະ ເຄື່ອງປ່າຂອງດົງ ລວມ​ໄປ​ເຖິງ​ການ​ລ່າສັດປ່າ​ໃຫ້​ມີ​​ລະ​ບຽບ​ແບບແຜນ, ພ້ອມທັງປູກຈິດສຳນຶກ ໃຫ້ຮູ້ຈັກ ຮັກສາ ​ແລະ ຟື້ນຟູປ່າໄມ້ໃຫ້ມີເນື້ອທີ່ເພີ່ມຂຶ້ນ. 

ສາຂານີ້ ຮຽນກ່ຽວກັບ ການສຳຫຼວດ ແລະ ຈັດສັນປ່າ ໂດຍຈະໄດ້ຮຽນຮູ້ກ່ຽວກັບ ສາມໜ່ວຍວິຊາຫຼັກຄື: (1) ໜ່ວຍວິຊາ ຊີວະວິທະຍາ – ຮຽນຮູ້ກ່ຽວກັບສິ່ງທີ່ມີຊີວິດ ແລະ ບໍ່ມີຊີວິດ, ໂຄງສ້າງ ແລະ ລະບົບນິເວດ; (2) ໜ່ວຍວິຊາ ວະນະວັດວິທະ ຍາ – ການຮຽນຮູ້ກ່ຽວກັບການປູກປ່າກ້າເບ້ຍ, ຟື້ນຟູທຳມະຊາດ ແລະ ການຂະຫຍາຍເຄື່ອງປ່າຂອງດົງ; ແລະ (3) ໜ່ວຍວິຊາ ວາງແຜນຈັດສັນປ່າ – ຮຽນຮູ້ກ່ຽວກັບການວາງແຜນຈັດສັນປ່າ, ວັດແທກໄມ້, ຂຸດຄົ້ນ ແລະ ການຢັ້ງຢືນປ່າໄມ້. 

ວິທີການສິດສອນປະກອບມີ 2 ພາກສ່ວນຄື: ພາກທິດສະດີ ໂດຍຈະໄດ້ສຶກສາຜ່ານການບັນຍາຍ ແລະ ສຳມະນາ ໂດຍເອົາ ນັກສຶກສາເປັນໃຈກາງ ເຊິ່ງນັກສຶກສາ ສາມາດປຶກສາຫາລືກັນ ເພື່ອຊອກຮູ້ໂດຍມີອາຈານເປັນຜູ້ໃຫ້ຂໍ້ມູນ. ນອກນີ້ ຍັງມີການ ຂຽນບົດລາຍງານວິຊາການ ທີ່ກ່ຽວຂ້ອງກັບເນື້ອໃນຂອງລາຍວິຊາ. ໃນພາກສ່ວນທີ່ສອງ, ນັກສຶກສາຈະໄດ້ປະຕິບັດຕົວຈິງ ໃນການເຮັດບົດວິໄຈ ຂັ້ນພື້ນຖານ ເຊັ່ນ: ການຮຽນກ້າແກ່ນ, ການປູກຕົ້ນໄມ້, ການວິໄຈຊະນິດພັນພືດ ແລະ ອື່ນໆ. 

ຄວາມຮູ້ພື້ນຖານ ວິຊາຄະນິດສາດ, ເຄມີສາດ ແລະ ການນຳໃຊ້ຄອມພິວເຕີ ເພາະວ່າຈະໄດ້ຮຽນນຳໃຊ້ ໂປຼແກຣມສຳຫຼວດປ່າ ແລະ ທີ່ດິນ. ​ເປັນ​ຄົນ ມັກ​ເຮັດ​ວຽກພາກ​ສະໜາມ; ມີຄວາມສົນໃຈໃນການສຶກສາທາງດ້ານ ຊີວະວິທະຍາ ຫຼື ຂະແໜງການ ອື່ນໆທີ່ກ່ຽວກັບຕົ້ນໄມ້ ແລະ ການສຳຫຼວດວາງແຜນຈັດສັນປ່າ.

​ຮູ້​ວິທີ​ການ ປູກປ່າ, ກ້າເບ້ຍ, ການຟື້ນຟູທຳມະຊາດ ເພື່ອຄວາມສົມດູນ ແລະ ຍືນຍົງ; ມີທັກສະໃນການສໍາຫຼວດ ແລະ ວາງແຜນຈັດສັນຊັບພະຍາກອນປ່າໄມ້ຢ່າງຖືກວິທີ; ມີຄວາມຮູ້ໃນການສໍາຫຼວດ, ຢັ້ງຢືນ ​ແລະ ວັດ​ແທກຕົ້ນໄມ້ ​ແລະ ຮູ້​ວິທີ​ການຄຸ້ມຄອງຊີວະນາໆພັນ ​ແລະ ປ່າ​ສະຫງວນ.

ເປັນນັກວິຊາການຄຸ້ມຄອງ ຫຼື ຈັດສັນປ່າ ໄມ້ ແລະ ຊັບພະຍາກອນປ່າໄມ້, ເປັນທີ່ປຶກສາໃນການກ້າເບ້ຍໄມ້, ການ ສຳຫຼວດຈັດສັນຊັບພະຍາກອນນໍ້າ ແລະ ປ້ອງກັນປ່າ ຢູ່ບັນດາກະຊວງ ແລະ ອົງການທີ່ກ່ຽວຂ້ອງ ເຊັ່ນ:  ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ກະຊວງກະສິກຳ ແລະ ປ່າໄມ້, ແລະ ອົງການພັດທະນາທີ່ກ່ຽວກັບກະສິກຳ, ປ່າໄມ້, ຊັບພະຍາກອນທຳມະຊາດ ແລະ ສິ່ງແວດລ້ອມ. 

ມະຫາວິທະຍາໄລແຫ່ງຊາດ

ໂທ 021 740 277