ພາສາຝຣັ່ງ
ພາສາຝຣັ່ງ ແມ່ນ ພາສາໜຶ່ງ ທີ່ມີອິດທິພົນ ແລະ ເປັນທີ່ນິຍົມຂອງຫຼາຍປະເທດໃນໂລກ ລວມທັງປະເທດລາວ ເຊິ່ງໄດ້ຖືກນຳໃຊ້ມາຕັ້ງແຕ່ ອະດີດ ຈົນເຖິງປັດຈຸບັນ ເຂົ້າໃນຫຼາຍຂົງເຂດວຽກງານ ເຊັ່ນ: ລັດຖະບານ, ການແພດ ແລະ ກົດໝາຍ-ກົດລະບຽບບ້ານເມືອງ. ພາສາຝຣັ່ງ ມີບົດບາດສຳຄັນ ເນື່ອງຈາກ ມັນເປັນພາຫະນະໃນການຄົ້ນຄວ້າ ເພື່ອນຳເອົາເຕັກນິກວິທະຍາສາດ ແລະ ວິທະຍາການທີ່ກ້າວໜ້າຈາກຕ່າງປະເທດ ເຂົ້າໃນການພັດທະນາ ແລະ ສົ່ງເສີມເສດຖະກິດຂອງຊາດ.
ສາຂານີ້ ສຶກສາບັນດາຄວາມຮູ້ພື້ນຖານກ່ຽວກັບພາສາຝຣັ່ງ ທີ່ໃຊ້ໃນການຕິດຕໍ່ສື່ສານ ເປັນຕົ້ນແມ່ນ ການເວົ້າ, ການອອກສຽງ, ການຂຽນ ແລະ ໄວຍະກອນ; ຄວາມຮູ້ພື້ນຖານກ່ຽວກັບພາສາຝຣັ່ງສະເພາະດ້ານ ເຊັ່ນ: ພາສາຝຣັ່ງສຳລັບການທ່ອງທ່ຽວ, ພາສາຝຣັ່ງສຳລັບທຸລະກິດ ແລະ ການແປ. ນອກຈາກນີ້, ນັກສຶກສາຍັງຈະໄດ້ຮຽນຮູ້ກ່ຽວກັບ ວັນນະຄະດີ, ວັດທະນະທໍາ, ຮີດຄອງປະເພນີ, ອະລິຍະທຳ ແລະ ຮູບແບບຊີວິດການເປັນຢູ່ ຂອງຄົນຝຣັ່ງ ອີກດ້ວຍ.
ວິທີການສິດສອນຂອງພາກວິຊານີ້ແມ່ນ ອີງໃສ່ທັງພາກທິດສະດີ ແລະ ພາກປະຕິບັດຕົວຈິງ ກໍຄື ການຮ່ວມກິດຈະກຳງານບຸນຝຣັ່ງໂກໂຟນີ ໃນນັ້ນ ນັກສຶກສາຈະໄດ້ມີການສະແດງລະຄອນ, ຮ້ອງເພງ, ອ່ານກາບກອນພາສາຝຣັ່ງ, ແຂ່ງຂັນຕອບຄຳຖາມວິທະຍາສາດ ແລະ ອື່ນໆ. ນອກຈາກນີ້ ຍັງມີການໄປທັດສະນະສຶກສາ; ມີໂອກາດໄປຮຽນແລກປ່ຽນ ຢູ່ປະເທດກຳປູເຈຍ ແລະ ຫວຽດນາມ ແລະ ມີໂອກາດສອບເສັງເອົາທຶນ ເພື່ອໄປສຶກສາຕໍ່ ໃນລະດັບປະລິນຍາໂທຈາກສະຖານທູດຝຣັ່ງອີກດ້ວຍ.
ຄວາມຮູ້ພື້ນຖານ ພາສາຝຣັ່ງ ຫຼື ພາສາອັງກິດ; ເປັນຄົນ ທີ່ມີໃຈມັກ ຫຼື ມີຄວາມສະຫງວນຮັກ ແລະ ມີຄວາມຕັ້ງໃຈໃນການຮຽນຮູ້, ສຶກສາ, ຄົ້ນຄວ້າ ກ່ຽວກັບພາສາ, ວິຖີຊີວິດ ແລະ ວັດທະນະທໍາ ຂອງປະເທດຝຣັ່ງ ແລະ ຂອງບັນດາປະເທດອື່ນໆ ທີ່ນໍາໃຊ້ພາສາຝຣັ່ງ; ແລະ ມີຄວາມສົນໃຈໃນຄວາມກ່ຽວພັນລະຫວ່າງ ພາສາ, ປະຫວັດສາດ ແລະ ວັດທະນະທໍາ.
ມີທັກສະ ໃນການອ່ານ, ຂຽນ, ເວົ້າ ແລະ ຟັງ ພາສາຝຣັ່ງ; ສາມາດສື່ສານກັບຄົນທີ່ນຳໃຊ້ພາສາຝຣັ່ງໄດ້; ສາມາດອອກສຽງ ແລະ ນໍາໃຊ້ໄວຍະກອນຂອງພາສາຝຣັ່ງຢ່າງຖືກຕ້ອງ; ສາມາດສົມທຽບ ແລະ ວິເຄາະ ດ້ານວັດທະນາທຳ, ການເມືອງ, ເສດຖະກິດ ແລະ ສັງຄົມ ຂອງປະເທດຝຣັ່ງ ແລະ ລາວ; ແລະ ສາມາດນໍາໃຊ້ ພາສາຝຣັ່ງ ເຂົ້າໃນການແປ ແລະ ນໍາທ່ຽວ.
Leave A Comment