ກົນຈັກໜັກ
ກົນຈັກໜັກ ແມ່ນປະເພດເຄື່ອງຈັກຂອງພາຫະນະ ທີ່ຮັບໃຊ້ເຂົ້າໃນວຽກງານຂຸດຄົ້ນ ແລະ ກໍ່ສ້າງ ເຊັ່ນ: ລົດບັນທຸກ, ລົດຈົກ, ລົດດຸດ ແລະ ລົດເກດ ເປັນຕົ້ນ. ສາຂານີ້ມີຄວາມສໍາຄັນ ເນື່ອງຈາກໃນປັດຈຸບັນ ໄດ້ມີການນໍາໃຊ້ເຄື່ອງຈັກເຂົ້າໃນທຸກຂົງເຂດອຸດສາຫະກໍາຢ່າງຫຼວງຫຼາຍ ດັ່ງນັ້ນ ຈຶ່ງມີຄວາມຈໍາເປັນຕ້ອງໄດ້ມີຊ່າງຊໍານານງານ ທີ່ສາມາດນໍາໃຊ້, ສ້ອມແປງ ແລະ ບໍາລຸງຮັກສາ ເຄື່ອງຈັກດັ່ງກ່າວ ເພື່ອເຮັດໃຫ້ສາມາດດໍາເນີນງານໄດ້ຢ່າງມີປະສິດທິພາບ, ວ່ອງໄວ ແລະ ໄດ້ມາດຕະຖານ.
ສາຂານີ້ ສຶກສາກ່ຽວກັບຄວາມຮູ້ຕ່າງໆທີ່ເປັນອົງປະກອບຂອງເຄື່ອງກົນຈັກໜັກ ທີ່ໃຊ້ເຂົ້າໃນວຽກງານຂຸດຄົ້ນ ແລະ ກໍ່ສ້າງ ເປັນຕົ້ນແມ່ນ ລົດບັນທຸກ, ລົດຈົກ, ລົດຕັກ, ລົດດຸດ ແລະ ລົດເກດ ເຊິ່ງໃນນັ້ນ ນັກສຶກສາຈະໄດ້ຮຽນຮູ້ຕັ້ງແຕ່ ໂຄງສ້າງຂອງເຄື່ອງຈັກ ແລະ ລະບົບທີ່ກ່ຽວຂ້ອງກັບການທໍາງານຕ່າງໆຂອງເຄື່ອງຈັກ, ວິທີການນໍາໃຊ້ ແລະ ເຕັກນິກໃນການສ້ອມແປງເຄື່ອງຈັກດັ່ງກ່າວ ແລະ ວິທີການໃນການບໍາລຸງຮັກສາ ເພື່ອເພີ່ມອາຍຸການໃຊ້ງານຂອງເຄື່ອງຈັກ ໃຫ້ໄດ້ຍາວນານ.
ວິທີການສິດສອນຂອງສາຂານີ້ ລວມມີການຮຽນທິດສະດີພຽງແຕ່ 40% ສ່ວນອີກ 60% ແມ່ນຈະເນັ້ນໃສ່ການຮຽນຈາກພາກປະຕິບັດຕົວຈິງເຊັ່ນ: ນັກຮຽນຈະໄດ້ມີການປະກອບ ແລະ ສ້ອມແປງເຄື່ອງຈັກໜັກ ເຊິ່ງຈະນໍາໃຊ້ຫຼັກການ ສິດສອນແບບ 4 ຂັ້ນຕອນ ເຊັ່ນ: ອາຈານອະທິບາຍ, ສາທິດ, ຕິດຕາມ, ກວດກາໂດຍ ນັກຮຽນ ເຮັດຕາມ ແລະ ຝຶກແອບ. ນັກຮຽນຈະໄດ້ລົງຝຶກງານນໍາບໍລິສັດຕ່າງໆທີ່ກ່ຽວຂ້ອງ ແລະ ສາມາດຝຶກງານພາຍໃນໂຮງຮຽນກໍ່ໄດ້.
ມີຄວາມຮູ້ກ່ຽວກັບຊິ້ນສ່ວນປະກອບຕ່າງໆຂອງກົນຈັກໜັກ ແລະ ມີຄວາມເຂົ້າໃຈ ກ່ຽວກັບ ລະບົບການເຮັດວຽກຂອງກົນຈັກໜັກຂອງພາຫະນະປະເພດຕ່າງໆ; ມີີຄວາມຮູ້ພື້ນຖານ ກ່ຽວກັບ ການຄວບຄຸມ ແລະ ນໍາໃຊ້ເຄື່ອງກົນຈັກໜັກເຂົ້າໃນວຽກງານຂຸດຄົ້ນ ແລະ ກໍ່ສ້າງ; ສາມາດຄິດໄລ່ສ້ອມແປງກົນຈັກໜັກ ແລະ ຮູ້ວິທີການທີ່ເໝາະສົມໃນການບໍາລຸງຮັກສາກົນຈັກໜັກ.
ສາມາດປະກອບອາຊີບເປັນວິຊາການ ແລະ ນາຍຊ່າງທາງດ້ານກົນຈັກໜັກ ທີ່ບັນຈຸເຂົ້າໃນສັງກັດຕ່າງໆ ບໍ່ວ່າຈະເປັນ ບໍລິສັດທີ່ນໍາເຂົ້າ, ຈໍາໜ່າຍ, ຜະລິດ ຫຼື ມີການນໍາໃຊ້ກົນຈັກໜັກ ເຊັ່ນ: ບໍລິສັດ RMA, ບໍລິສັດພູເບ້ຍມາຍນິ້ງ ແລະ ບໍລິສັດຕ່າງໆທີ່ກ່ຽວຂ້ອງ. ນອກນີ້ ຍັງສາມາດປະກອບທູລະກິດສ່ວນຕົວທີ່ກ່ຽວກັບການແປງລົດ ແລະ ກົນຈັກຕ່າງໆ.
Leave A Comment