ສ້າງຄູປະຫວັດສາດ 

ວິຊາ​ປະຫວັດສາດ ໝາຍ​ເຖິງ​ການ​ສຶກສາ​ອະດີດ​ຂອງ ມະນຸດ, ສັງຄົມມະນຸດ​ ​ແລະ ສິ່ງ​ແວດ​ລ້ອມ​​ທີ່ກ່ຽວ​ຂ້ອງກັບ​ການ​ປ່ຽນ​​ແປງ​ຂອງ​ສັງຄົມມະນຸດ, ຄວາມ​ຄິດ ​ແລະ ຄວາມ​ເຊື່ອ ທີ່​ເຮັ​ດ​ໃຫ້​ເກີດ​ມີພຶດຕິ​ກຳ​ຕ່າງໆ​ທີ່​​ເກີດ​ຂຶ້ນ​​ແລ້ວໃນ​ອະດີດ. ສາ​ຂາ​ວິຊານີ້​ມີຄວາມສໍາຄັນ ເນື່ອງຈາກປະຫວັດສາດຖືເປັນຫຼັກຖານຢັ້ງຢືນ ເຖິງວິວັດທະນາການຂອງວິທະຍາສາດ ແລະ ສັງຄົມ ນັບຕັ້ງແຕ່ອະດີດ ເພື່ອໃຫ້ເຮົາເຂົ້າໃຈກ່ຽວກັບປັດຈຸບັນ ​ແລະ ສາມາດໝູນໃຊ້ ເຂົ້າໃນການປະດິດສ້າງເຕັກໂນໂລຊີສະໄໝໃໝ່​ໄດ້.

ສາຂາ​ວິຊາ​​ສຶກສາລົງເລິກກ່ຽວ​ກັບ​ປະຫວັດສາດ​ ທີ່ກ່ຽວພັນກັບບັນດາຫົວຂໍ້ຕ່າງໆ ເຊັ່ນ: ວັດຖູບູຮານ, ບູຮານສະຖານ, ເຫດການປະຫວັດສາດ, ການຂະຫຍາຍຕົວ ແລະ ວິວັດທະນາການຂອງມະນຸດ ແລະ ສັງຄົມມະນຸດ, ການດໍາລົງຊີວິດ ແລະ ການພັວພັນສາກົນ ຂອງມະນຸດໃນຍຸກສະໄໝຕ່າງໆ. ​ ນອກ​ນັ້ນ ນັກສຶກສາຍັງຈະໄດ້ຮຽນກ່ຽວກັບວິຊາຄູ ເຊັ່ນ: ວິທີການສິດສອນວິຊາປະຫວັດສາດໂດຍສະເພາະ, ການວິໄຈ, ການວັດ ແລະ ປະເມີນຜົນການສຶກສາ ເປັນຕົ້ນ.

ວິທີການສິດສອນ ແມ່ນ​ຈະເນັ້ນໜັກໃສ່ການຮຽນທິດສະດີເປັນຫຼັກ. ໃນນັ້ນ, ຈະໄດ້ມີການນໍາເອົາເຫດການທີ່ສໍາຄັນທີ່ເກີດຂຶ້ນໃນອະດີດເພື່ອມາເປັນກໍໍລະນີສຶກສາ ແລະ ສົມທຽບລະຫວ່າງອະດີດ ແລະ ປັດຈຸບັນ, ມີການຕັ້ງຄໍາຖາມພາຍໃນຫ້ອງຮຽນເພື່ອໃຫ້ນັກສຶກສາໄດ້ຄົ້ນຄິດ ແລະ ສົນທະນາ. ​​ ນັກສຶກສາຈະໄດ້ເຮັດວຽກເປັນກຸ່ມ ໃນການເຮັດບົດລາຍງານ ແລະ ຈະໄດ້ລົງທັດສະນະສຶກສາຕາມບັນດາສະຖານທີ່ບູຮານ ເພື່ອສຶກສາປະຫວັດຄວາມເປັນມາ ເຊັ່ນ: ວັດພູຈຳປາສັກ ເປັນຕົ້ນ.

ຄວາມ​ຮູ້ພື້ນຖານ ທາງດ້ານວິຊາປະຫວັດສາດ, ພູມີສາດ, ສຶກສາພົນລະເມືອງ ແລະ ຄະນິດສາດ. ມີຄວາມສົນໃຈໃນການຄົ້ນຄວ້າກ່ຽວກັບ ທິດສະດີ, ວິເຄາະໄຈ້ແຍກ ແລະ ສຶກສາກ່ຽວກັບ​ເຫດການປະຫວັດສາດ ແລະ ຄໍາສັບທາງບູຮານຕ່າງໆ, ເຫັນຄຸນຄ່າ ແລະ ໃຫ້ຄວາມສໍາຄັນຕໍ່ເຫດການທີ່ເກີດຂຶ້ນໃນອະດີດ ແລະ ມັກການສົມທຽບລະຫວ່າງອະດີດ ແລະ ປັດຈຸບັນ. 

​ນັກ​ສຶກສາຈະ​ມີຄວາມຮູ້ພື້ນຖານດ້ານປະຫວັດສາດຂອງຍຸກສະໄໝ ແລະ ພື້ນທີ່ຕ່າງໆໃນໂລກ. ມີທັກສະໃນການສອນ, ວິໄຈ, ປະເມີນຜົນການສຶກສາ, ວິເຄາະ ແລະ ວາງແຜນສ້າງຫຼັກສູດການສອນ ເຊັ່ນ: ການຕັດສິນໃຈເລືອກໃຊ້ ແລະ ສ້າງ ສື່ການຮຽນ-ການສອນທາງດ້ານປະຫວັດສາດ. ນອກນີ້, ຍັງຈະມີທັກສະໃນການບໍລິຫານຫໍພິພິທະພັນ ແລະ ການເປັນຜູ້ນໍາທ່ຽວ. 

ນັກ​ສຶກສາ​ສາມາດ​ປະກອບ​ອາຊີບ ເປັນຄຸສອນໃນຊັ້ນມັດທະຍົມຕົ້ນ ຫຼື ປາຍ, ເປັນນັກວິຊາການດ້ານການພັດທະນາ ແລະ ວາງແຜນການສຶກສາ ໂດຍສາມາດເຮັດວຽກໃນພະແນກ ຫຼື ຫ້ອງການສຶກສາຂັ້ນແຂວງ ແລະ ຂັ້ນເມືອງ. ນອກນີ້, ຍັງສາມາດເປັນຜູ້ນໍາທ່ຽວ ແລະ ເປັນພະນັກງານສັງກັດຕາມຫໍພິພິທະພັນຕ່າງໆ ເປັນຕົ້ນ.