ລະບົບການຈັດສົ່ງສິນຄ້າ

ລະບົບການຈັດສົ່ງສິນຄ້າ ເປັນການລວບລວມເອົາວຽກງານໃນການຈັດຊື້ວັດຖຸດິບ, ການຜະລິດ, ການຂາຍ ແລະ ການກະຈາຍສິນຄ້າໃຫ້ດຳເນີນໄປຢ່າງ​ເປັນ​ລະບົບ​ຕ່ອງ​ໂສ້. ລະບົບການຈັດສົ່ງສິນຄ້າ​ ເປັນ​ປັດ​​ໄຈ​ສຳຄັນ​ໃນການຂະຫຍາຍຕົວ​ທາງ​ດ້ານ​ເສດຖະ ກິດເຊິ່ງສາມາດອຳນວຍຄວາມສະດວກ​​ໃນ​ການ​ເຊື່ອມ​ຕໍ່​ຕະຫຼາດ​ພາຍ​ໃນ ​ແລະ ຕ່າງປະ​ເທດ. ນອກ​ນັ້ນ, ​ລະບົບ​ການຈັດ​ສົ່ງ​ສິນຄ້າ​ທີ່​ດີ​ຍັງ​ຊ່ວຍຫຼຸດ​ຕົ້ນ​ທຶນ​ການ​ຜະລິດ ​ແລະ ສາມາດຕອບສະໜອງຄວາມຕ້ອງການຂອງຜູ້ຊົມໃຊ້​ຢ່າງ​ມີ​ປະສິດທິພາບ.

ສາຂາ​ນີ້ຮຽນກ່ຽວກັບວິທີການຄິດໄລ່ຈຳນວນ ແລະ ເວລາໃນການຂົນສົ່ງສິນຄ້າ ເພື່ອເຮັດໃຫ້ສິນຄ້າໄປເຖິງມືລູກຄ້າໄດ້ຢ່າງວ່ອງໄວທີ່ສຸດ. ສາຂານີ້ ຍັງຈະໄດ້ຮຽນກ່ຽວກັບການວິເຄາະ, ການວາງແຜນປະຕິບັດງານ, ການແກ້ໄຂບັນຫາດ້ວຍຫຼັກການ ແລະ ເຫດຜົນເພື່ອໃຫ້ວຽກງານສຳເລັດຕາມເປົ້າໝາຍ. ນອກນັ້ນ, ວິຊານີ້ຍັງຮຽນຮູ້ກ່ຽວກັບການບໍລິຫານສາງ, ການຄ້າອີເລັກໂຕນິກ ແລະ ໂປຣແກຣມຂໍ້ມູນຂ່າວສານທີ່ນຳໃຊ້ເຂົ້າໃນການບໍລິຫານການຂົນສົ່ງ ແລະ ການຈັດຊື້ໃນລະດັບສາກົນ.

ວິທີການສິດສອນລວມມີ ການສອນທິດສະດີລະບົບການຂົນສົ່ງ ແລະ ການຈໍລະຈອນແຈກຢາຍສິນຄ້າທີ່ມີປະສິດທິຜົນເພື່ອຍົກສູງມາດຕະຖານການຄ້າພາຍໃນ ແລະ ຕ່າງປະເທດ. ພ້ອມກັນນັ້ນຍັງມີການທັດ​ສະ​ນະ ​ແລະ ລົງຝຶກງານ​ໃນສະຖານທີ່ປະກອບການທີ່ມີໜ່ວຍງານຂົນສົ່ງ ແລະ ການຈໍລະຈອນສິນຄ້າ ເຊັ່ນ: ບໍລິສັດເບຍລາວ, ບໍລິສັດນ້ຳຫວານລາວ, ບໍລິສັດບໍລິການຂົນສົ່ງ ແລະ ການຈໍລະຈອນສິນຄ້າ ຫຼື ໂລຈິສຕິກຕ່າງໆ ​ເພື່ອໃຫ້ນັກສຶກສາມີຄວາມກຽມພ້ອມໃນການເຮັດວຽກຕົວຈິງ

ຄວາມຮູ້ພື້ນຖານວິຊາ ຄະນິດສາດ ແລະ ພາສາອັງກິດ; ມີທັກສະ ໃນການແກ້ໄຂບັນຫາສະເພາະໜ້າ ແລະ ທັກສະໃນການເຮັດວຽກຮ່ວມກັບຄົນອື່ນ; ມີ​ຄວາມ​ສົນ​ໃຈ ​ທາງ​ດ້ານ​ທຸລະ​ກິດການ​ຄ້າ ​ແລະ ລະບົບ​ການ​ຂົນ​ສົ່ງ​ສິນຄ້າ.​ ນອກຈາກນັ້ນ ຍັງຕ້ອງເປັນຄົນທີ່ມີຄວາມດຸໝັ່ນ, ຫ້າວຫັນ ແລະ ແຂງແຮງ.

ນັກສຶກສາທີ່ຮຽນຈົບສາຂານີ້ ຈະຮູ້ຈັກວິທີການຈັດລະບົບການຈັດການສິນຄ້າພາຍໃນສາງ ແລະ ລະບົບການຂົນສົ່ງຢ່າງມີປະສິດທິ ພາບນັບຕັ້ງ​ແຕ່​ຂັ້ນ​ຕອນ​ການ​ຜະລິດຈົນ​ເຖິງ​ການຈຳໜ່າຍ. ພ້ອມກັນນັ້ນ ຍັງ​ໄດ້​ຝຶກທັກສະໃນການຄິດໄລ່ສິນຄ້າ ແລະ ເວລາທີ່ຈະໃຊ້ໃນການຂົນສົ່ງເພື່ອໃຫ້ໄດ້ຮັບໝາກຜົນສູງສຸດ.

ນັກສຶກສາທີ່ຮຽນຈົບວິຊານີ້ຈະສາມາດປະກອບອາຊີບທາງ​ດ້ານ​ການພັດທະນາ​​ແຜນການການ​ຂົນ​ສົ່ງ ​ແລະ ກະຈາຍສິນຄ້າ, ປະສານ​ງານ ​ແລະ ​ຈັດການກັບຕ່ອງ​ໂສ້​ການ​ຜະລິດສິນຄ້າ, ການ​ຈັດການ​ບໍລິຫານ​ສາງ ​ແລະ ການຕະຫຼາດ ຕາມໜ່ວຍງານລັດ ​ແລະ ເອກະຊົນ. ນອກ​ນັ້ນ​ຍັງ​ສາມາດເປັນ​ເຈົ້າ​ຂອງທຸລະ​ກິດດ້ານ​ການ​ບໍລິການ​​ຂົນ​ສົ່ງ