ບໍລິຫານຈັດການ
ການບໍລິຫານຈັດການ ໝາຍເຖິງການປະຕິບັດ ຫຼື ຄຸ້ມຄອງວຽກງານທາງດ້ານບໍລິຫານທົ່ວໄປ ເຊັ່ນ: ການຈັດການບໍລິຫານອົງກອນ, ການວາງແຜນ, ການສັ່ງການ, ການຄວບຄຸມ ແລະ ອື່ນໆ. ການບໍລິຫານຈັດການ ມີຄວາມສຳຄັນຕໍ່ການພັດທະນາວຽກງານຕ່າງໆຂອງອົງກອນ ເນື່ອງຈາກວ່າທຸກວຽກງານຈໍາຕ້ອງມີຜູ້ນຳພາບໍລິຫານທີ່ດີ ເພື່ອໃຫ້ວຽກດັ່ງກ່າວບັນລຸເປົ້າໝາຍທີ່ຕັ້ງໄວ້. ນອກຈາກນີ້, ຍັງເວົ້າເຖິງການຈັດຕັ້ງປະຕິບັດກ່ຽວກັບການບໍລິຫານ ແລະ ພັດທະນາບຸກຄະລາກອນໃຫ້ມີປະສິດທິພາບຍິ່ງຂຶ້ນ.
ສາຂານີ້ຮຽນກ່ຽວກັບ ຫຼັກການບໍລິຫານໂດຍທົ່ວໄປເຊິ່ງຈະໄດ້ສຶກສາເຖິງລັກສະນະຕ່າງໆຂອງຜູ້ບໍລິຫານ, ທິດສະດີການຈູງໃຈ, ການວາງແຜນການບໍລິຫານທຸລະກິດ, ການບໍລິຫານສຳນັກງານ-ອົງການ, ການບໍລິຫານບຸກຄະລາກອນ, ການບໍລິຫານທຸລະກິດຂະໜາດນ້ອຍ, ບໍລິຫານການຜະລິດ, ການບໍລິຫານການທ່ອງທ່ຽວ-ໂຮງແຮມ, ການບໍລິຫານການຕະຫຼາດ ເຊັ່ນ: ການຜະລິດ ແລະ ການໃຫ້ບໍລິການ.
ວິທີການສິດສອນ ປະກອບມີ ພາກທິດສະດີ ແລະ ພາກປະຕິບັດຕົວຈິງຄຽງຄູ່ກັນໄປ ເຊັ່ນ: ການລົງຝຶກງານຕົວຈິງນຳບັນດາອົງກອນ, ພາກລັດ ແລະ ບໍລິສັດຕ່າງໆທີ່ກ່ຽວຂ້ອງ. ນອກນັ້ນ, ມີການກຳນົດຫົວຂໍ້ເຮັດບົດສະເໜີ ແລະ ການຂຽນບົດວິເຄາະທຸລະກິດ, ການເຮັດບົດລາຍງານ ທີ່ຕິດພັນກັບການປະຕິບັດຕົວຈິງ ແລະ ຈາກການໄປທັດສະນະ ສຶກສາຕາມສະຖານທີ່ຕ່າງໆ ທັງພາຍໃນ ແລະ ຕ່າງປະເທດ. ນອກນີ້, ຍັງມີການເຄື່ອນໄຫວນອກຫຼັກສູດ ເຊັ່ນ: ກິລາ ແລະ ສີລະປະອື່ນໆ ອີກດ້ວຍ.
ຄວາມຮູ້ພື້ນຖານ ທາງດ້ານການຄິດໄລ່ສະຖິຕິ, ຄະນິດສາດ, ເສດຖະສາດ ແລະ ການບໍລິຫານ ເພື່ອຈະກ້າວໄປເປັນຜູ້ບໍລິຫານທີ່ມີປະສິດທິພາບ ແລະ ເປັນແບບຢ່າງທີ່ດີໃຫ້ຄົນອື່ນ. ມີຄວາມສົນໃຈ ທາງດ້ານການບໍລິຫານຈັດການ, ມີທັກສະຄວາມເປັນຜູ້ນໍາ, ຄວາມສາມາດໃນການປົກຄອງອົງກອນ, ມີຄວາມມຸ່ງຫວັງທີ່ຈະພັດທະນາວຽກງານບໍລິຫານ ແລະ ກ້າຄິດກ້າສະແດງອອກ.
ພາຍຫຼັງທີ່ຈົບຈາກພາກວິຊານີ້ນັກສຶກສາຈະມີຄວາມຮູ້ – ຄວາມເຂົ້າໃຈກ່ຽວກັບພື້ນຖານບໍລິຫານທຸລະກິດ ແລະ ການບໍລິຫານບຸກຄະລາກອນ, ເຊິ່ງຄວາມຮູ້ດັ່ງກ່າວແມ່ນມີຄວາມສຳຄັນຫຼາຍບໍ່ວ່າຈະເປັນການປະກອບສ່ວນເຂົ້າໃນໜ້າທີ່ວຽກງານທັງພາກລັດ ແລະ ເອກະຊົນ ລວມໄປເຖິງການປະກອບທຸລະກິດສ່ວນຕົວ.
ເປັນນັກບໍລິຫານອົງກອນ, ບຸກຄະລາກອນ, ບໍລິຫານໂຄງການ, ເຈົ້າໜ້າທີ່ພາສີອາກອນ. ນອກນີ້, ນັກສຶກສາຍັງສາມາດປະກອບອາຊີບໄດ້ໃນທຸກໆກະຊວງ ເພາະວ່າການບໍລິຫານແມ່ນຈຳເປັນໃນທຸກຂະແໜງການ ແລະ ຍັງເປັນຜູ້ບໍລິຫານທາງດ້ານແນວຄິດ, ພະນັກງານວິຊາການໃຫ້ແກ່ບໍລິສັດ, ທະນາຄານ ຫຼື ອົງການຈັດຕັ້ງສາກົນຕ່າງໆອີກດ້ວຍ.
ໝວດວິຊາຄວາມຮູ້ພື້ນຖານ
- ຄະນິດສາດ
- ເສດຖະສາດ
- ພື້ນຖານສະຖິຕິ
- ຄອມພິວເຕີ
- ຫຼັກການບັນຊີ
- ຫຼັກການເສດຖະສາດ
- ວິທະຍາສາດສິ່ງແວດລ້ອມ
- ລາວສຶກສາ
- ຕັກກະວິທະຍາ
ໝວດວິຊາສະເພາະລົງເລິກ
- ເລກທຸລະກິດ
- ສະຖິຕິທຸລະກິດ
- ເສດຖະສາດຈຸລະພາກ
- ເສດຖະສາດມະຫາພາກ
- ການຄ້າສາກົນ
- ການເງິນທຸລະກິດ
- ບັນຊີສາກົນ
- ບັນຊີວິສາຫະກິດ
- ການເມືອງ – ການປົກຄອງ
- ກົດໝາຍທຸລະກິດ
- ຫຼັກການຄວາມເປັນຜູ້ນຳ
- ຫຼັກການຕະຫຼາດ
- ພາສີອາກອນ
- ການບໍລິຫານທຸລະກິດ
- ການຕະຫຼາດສາກົນ
- ລະບົບການຈັດການຂໍ້ມູນ
- ການບໍລິຫານບຸກຄະລາກອນ
Leave A Comment