ການຕະຫຼາດ
ການຕະຫຼາດ ໝາຍເຖິງ ກິດຈະກຳທາງທຸລະກິດທີ່ເຮັດໃຫ້ສິນຄ້າ ແລະ ການບໍລິການ ເຄື່ອນຍ້າຍຈາກແຫຼ່ງຜະລິດ ຫຼື ຜູ້ໃຫ້ບໍລິການ ໄປເຖິງຜູ້ບໍລິໂພກ ໂດຍມີວັດຖຸປະສົງເພື່ອຕອບສະໜອງ ແລະ ສ້າງຄວາມເພິ່ງພໍໃຈໃຫ້ແກ່ຜູ້ບໍລິໂພກ. ການຕະຫຼາດມີຄວາມສຳຄັນຫຼາຍໃນການສ້າງລາຍໄດ້ ແລະ ກຳໄລໃຫ້ແກ່ບັນດາຫົວໜ່ວຍທຸລະກິດ ແລະ ລະບົບເສດຖະກິດຂອງປະເທດ ແນໃສ່ການພັດທະນາເສດທະກິດ-ສັງຄົມ ແລະ ການຄ້າລະຫວ່າງປະເທດ.
ວິຊານີ້ຮຽນກ່ຽວກັບພາບລວມຂອງວຽກງານການຕະຫຼາດ ເຊັ່ນ: ການບໍລິຫານການຕະຫຼາດ, ລະບົບການຕະຫຼາດ, ການວາງແຜນການຕະຫຼາດ, ການວິໄຈຕະຫຼາດ, ການນໍາໃຊ້ເຄື່ອງມືທາງການຕະຫຼາດ (ການອອກແບບຜະລິດຕະພັນ, ການຕັ້ງລາຄາ,ຊ່ອງທາງການຈັດຈໍາໜ່າຍ ແລະ ການນໍາໃຊ້ຂະບວນການສົ່ງເສີມທາງການຕະຫຼາດເປັນຕົ້ນ). ນອກຈາກນີ້ ຍັງຈະໄດ້ສຶກສາກ່ຽວກັບການຕະຫຼາດລະຫວ່າງປະເທດ, ພຶດຕິກຳຜູ້ບໍລິໂພກ ແລະ ການອອກແບບຜະລິດຕະພັນຕ່າງໆ.
ວິທີການສິດສອນຂອງສາຂາວິຊານີ້ ແມ່ນ ອີງໃສ່ທັງພາກທິດສະດີ ແລະ ປະຕິບັດຕົວຈິງໄປຄຽງຄູ່ກັນ; ມີການເຮັດບົດລາຍງານທັງແບບກຸ່ມ ແລະ ແບບດ່ຽວ; ນັກສຶກສາຈະໄດ້ວາງແຜນ ແລະ ລອງເຮັດທຸລະກິດ; ອອກແບບ ແລະ ຜະລິດສິນຄ້າເພື່ອຈໍາໜ່າຍ ໂດຍເນັ້ນໃສ່ການນໍາໃຊ້ຄວາມຮູ້ດ້ານການຕະຫຼາດ. ນອກຈາກນັ້ນ ນັກສຶກສາຍັງມີໂອກາດລົງຝຶກງານນຳບັນດາບໍລິສັດ ແລະ ວິສາຫະກິດຕ່າງໆ.
ຮູ້ວິທີການໃນການເປັນນັກການຕະຫຼາດທີ່ດີ, ຮູ້ຫຼັກການຂອງການຕະຫຼາດ ແລະ ສາມາດປະຍຸກໃຊ້ທິດສະດີເຫຼົ່ານັ້ນເພື່ອສ້າງແຜນການຕະຫຼາດ ແລະ ດໍາເນີນທຸລະກິດ ເຊັ່ນ: ການວາງຕໍາແໜ່ງ ແລະ ດຶງຈຸດເດັ່ນຂອງຜະລິດຕະພັນເພື່ອດຶງດູດຜູ້ບໍລິໂພກ, ການໂຄສະນາ ແລະ ປະຊາສໍາພັນ, ທັກສະໃນການສັງເກດ ແລະ ວິໄຈຕະຫຼາດ ແລະ ອື່ນໆ.
Leave A Comment