ການແພດ

ສາຂາການແພດ ແມ່ນສາຂາໜຶ່ງຂອງວິທະຍາສາດ​ສຸຂະພາບ ທີ່ກ່ຽວຂ້ອງ​ກັບ​ການ ​ບົ່ງມະ​ຕິ​, ປິ່ນປົວ ​ແລະ ປ້ອງ​ກັນ​ພະຍາດ. ​ ​ເນື່ອງ​ຈາກ​ວ່າ ມະນຸດ​ເຮົາ​ແມ່ນປາສະຈາກ​ບໍ່​ໄດ້​ເຊິ່ງ​ພະຍາດ​ໂລຄາ ຫຼື ການ​ບາດ​ເຈັບ ທີ່​ສາມາດສົ່ງ​ຜົນ​ເສຍ​ຕ່າງໆຕໍ່ສຸຂະພາບ ​ແລະ ຮ້າຍ​​ແຮງ​ໄປ​ກວ່ານັ້ນ ກໍ່ອາດ​ຈະ​ເຮັດ​ໃຫ້​ເສຍ​ຊີວິດ​ໄດ້. ດັ່ງ​ນັ້ນ ວິທະຍາສາດ​ການ​ແພດ​ ຈຶ່ງ​ມີ​ຄວາມ​ສຳຄັນຫຼາຍຕໍ່ຊີວິດ​ການ​ເປັນ​ຢູ່​ຂອງ​ຄົນ​ເຮົາ ​ເພື່ອ​ຊ່ວຍ​ໃນ​ການ​ປິ່ນປົວ ​ແລະ ຮັກສາ​ສຸຂະພາບ.

ພາກ​ວິຊາ​ນີ້​ຮຽນກ່ຽວກັບ ຮ່າງ​ກາຍຂອງ​ມະນຸດ ລວມ​ເຖິງທີ່​ຕັ້ງ, ໜ້າທີ່ ​ແລະ ກົນ​ໄກ​ການ​ເຮັດ​ວຽກ​ຂອງ​ແຕ່​ລະ​ອະ​ໄວ​ຍະ​ວະ​​​; ຮຽນຮູ້​ກ່ຽວກັບ​ອາການ​ທີ່​ນຳພາ​ຄົນ​ເຈັບ​ມາ​ໂຮງໝໍ ​ແລະ ວິທີ​ກວດກາ​ຮ່າງກາຍ​ຄົນ​ເຈັບເພື່ອ​ຊ່ວຍ​ໃນ​ການ​ບົ່ງມະຕິ​ພະຍາດ ​ແລະ ​ໃຫ້ການ​ປິ່ນປົວ ​ເຊິ່ງລວມຢູ່​ໃນ 4 ພາກສ່ວນຫຼັກ ຄື: ​ເດັກນ້ອຍ, ພາຍ​ນອກ​, ພາຍ​ໃນ ​ແລະ ອອກລູກ-ພະຍາດ​ຍິງ. ນອກຈາກ​ນີ້, ສາຂາ​ການ​ແພດ ​ຍັງ​ໄດ້​ຮຽນກ່ຽວກັບ​ ການ​ປ້ອງ​ກັນ​ ​ແລະ ຄວບ​ຄຸມພະ​ຍາດ​ອີກ​ດ້ວຍ. 

ວິທີ​ການ​ສິດສອນ ແຕ່ປີທີ 1 ຫາ ປີທີ 3 ແມ່ນຮຽນພາກ​ທິດ​ສະ​ດີ​ແບບ​ບັນ​ລະ​ຍາຍ, ຂຶ້ນຫ້ອງ​ທົດ​ລອງ​ໂດຍ​ມີ​ອາຈານ​ເປັນ​ຜູ້​ສາທິດ, ​ແບ່ງ​ກຸ່ມ​ສົນທະນາ​ກ່ຽວກັບ​ຫົວຂໍ້ທີ​ອາຈານ​ມອບໝາຍ​ໃຫ້ ພ້ອມ​ທັງ​ຂຽນບົດ​ລາຍ​ງານ​ຂຶ້ນນຳ​ສະ​ເໜີ. ປີ​ທີ 4 ​ແລະ ທີ 5 ແມ່ນ​ລົງ​ຝຶກ​ຫັດ​ຢູ່ໂຮງໝໍ​ໃນ​ຕອນ​ເຊົ້າ ​ແລະ ຮຽນທິດ​ສະ​ດີ​ຕອນ​ແລງ ພ້ອມກັບເວນຍາມໃນໂຮງໝໍ. ປີ​ທີ 6 ​ແມ່ນ​ລົງ​ຝຶກ​ຫັດ​ຢູ່​ໂຮງໝໍໝົດມື້​ເຮັດ​ວຽກ​ເປັນ​ຜູ້​ຊ່ວຍ​ທ່ານໝໍ: ຮັບຜິດຊອບ​ຄົນ​ເຈັບຕາມ​ທີ່​ຖືກມອບໝາຍ, ກວດ​ຄົນ​ເຈັບ, ຕິດຕາມ​ອາການ, ປິ່ນປົວ​ເບື້ອງຕົ້ນ ​ແລະ ອື່ນໆ.

ຊີວະສາດ, ​ເຄມີສາດ, ຄະນິດສາດ, ພາສາອັງກິດ ​ແລະ ພາສາຝຣັ່ງ ຍິ່ງ​ເປັນ​ການ​ດີ; ເປັນ​ຄົນ ມັກຊ່ວຍເຫຼືອຄົນ, ຊ່າງສັງເກດ ແລະ ລະອຽດແຕ່ວ່ອງໄວ, ມັກອ່ານ, ມີມະນຸດສຳພັນດີ, ມີທັກສະໃນການຕິດຕໍ່ສື່ສານ ແລະ ມີຄວາມອົດທົນ​; ​ແລະ ມີ​ຄວາມ​ສົນ​ໃຈ​ໃນການ​ແພດ ​ແລະ ການຄົ້ນຄິດວິເຄາະຫາສາເຫດ ແລະ ຜົນ.

ສາ​ມາດ ສອບ​ຖາມ​ປະຫວັດ, ກວດ​ກາ​ຮ່າງກາຍ, ບົ່ງມະຕິ​ພະຍາດ ​ແລະ ປິ່ນປົວ​ພະຍາດ​ໄດ້; ສາມາດ​ສັ່ງ​ກວດ​ວິ​ເຄາະ​ເພີ່ມ​ເພື່ອ​ຊ່ວຍ​ໃນ​ການ​ບົ່ງມະຕິ​ພະຍາດ​ ເຊັ່ນ: ສັ່ງ​ກວດ​ເລືອດ, ສ່ອງ​ໄຟຟ້າ, ​ເຮັດ​ເອ​ໂກ ​ແລະ ອື່ນໆ ​ພ້ອມ​ທັງສາມາດ​ແປ​ຜົນ​ກວດ​ຕ່າງ​ໆ ໄດ້; ​ໃນ​ກໍລະນີ​ທີ່ຢູ່​ຫ່າງ​ໄກ ​ແມ່ນ​ສາມາດ​ປິ່ນປົວ​ເບື້ອງຕັ້ນ ​ແລະ ສົ່ງຕໍ່​ໄປ​ບ່ອນ​ທີ່​ມີ​ເງື່ອນ​ໄຂ.

ສາມາດ​​ເຮັດ​ວຽກ​ ​​​ເປັນ​ແພດ​ປິ່ນປົວ​ຢູ່​ສຸກສາລາ, ​ໂຮງໝໍ​ເມືອງ, ​ໂຮງໝໍ​ແຂວງ ​ແລະ ​ໂຮງໝໍສູນ​ກາງ. ​ປະກອບ​ອາຊີບ​ອິດສະຫຼະ​ເປັນຕົ້ນ​ແມ່ນ ​ເປີດ​ຫ້ອງ​ກວດ​ພະຍາດ​ເອກະ​ຊົນ, ​ເຮັດ​ວຽກສົ່ງ​ເສີມ​ສຸຂະພາບ ​ແລະ ປ້ອງ​ກັນ​ພະຍາດ​ນຳ​ໂຄງການ ​ແລະ ສູນ​ຄົ້ນຄວ້າ​ກ່ຽວກັບ​ພະຍາດ.