ອຸດສາຫະກຳໂລຫະ

ອຸດສາຫະກຳໂລຫະ ເປັນອຸດສາຫະກຳປະເພດໜຶ່ງທີ່ມີຄວາມສຳຄັນໃນການພັດທະນາປະເທດ ແລະ ເປັນພື້ນຖານໃຫ້ແກ່ບັນດາອຸດສາຫະກຳອື່ນໆ. ໃນປັດຈຸບັນ ການຜະລິດເຫຼັກເສັ້ນເພື່ອນໍາໃຊ້ເຂົ້າໃນການກໍ່ສ້າງເຄຫາສະຖານ ແລະ ຕິດຕັ້ງອຸປະກອນໂລຫະຕ່າງໆ ແມ່ນມີຄວາມພົ້ນເດັ່ນ ອີກທັງປະເທດລາວໄດ້ເອົາໃຈໃສ່ໃນການພັດທະນາທາງດ້ານອຸດສາຫະກຳ ເພື່ອດຶງດູດຜູ້ລົງທຶນທັງພາຍໃນ ແລະ ຕ່າງປະເທດ ຈຶ່ງມີຄວາມຮຽກຮ້ອງຕ້ອງການນາຍຊ່າງອຸດສະຫະກໍາເປັນຈຳນວນຫຼວງຫຼາຍ.

ສາຂານີ້ຮຽນກ່ຽວກັບ ບັນດາເຕັກນິກໃນການຜະລິດ, ຕິດຕັ້ງ ແລະ ບໍາລຸງຮັກສາໂລຫະຂັ້ນພື້ນຖານ ເຊິ່ງກວມເອົາ ເຕັກນິກຕ່າງໆໃນການຈອດໂລຫະ ເຊັ່ນ: ຈອດໄຟຟ້າ, ຈອດທິກ, ຈອດແກັສ, ຈອດມິກ/ແມັກ, ການກວດສອບຄອງຈອດ, ການຄິດໄລ່, ການແຕ້ມແບບ ແລະ ການຕິດຕັ້ງ ໂຄງສ້າງເຫຼັກຕາມອາຄານ ແລະ ສະຖານທີ່ຕ່າງໆ, ການຜະລິດວັດສະດຸ ແລະ ເຄື່ອງໃຊ້ຈາກໂລຫະແຜ່ນ ແລະ ອາລູມີນຽມ ລວມໄປເຖິງ ການຕິດຕັ້ງສຸຂະພັນ, ການເດີນທໍ່ນ້ຳ ແລະ ທໍ່ນໍ້າເສຍ ເປັນຕົ້ນ.

ວິທີການສິດສອນຂອງສາຂານີ້ ປະກອບມີ ພາກທິດສະດີ (40% ສໍາລັບຊັ້ນກາງ, 50% ສໍາລັບຊັ້ນສູງ) ແລະ ພາກປະຕິບັດຕົວຈິງ (60% – ຊັ້ນກາງ, 50% – ຊັ້ນສູງ) ເຊິ່ງໃນນັ້ນ ນັກສຶກສາຈະໄດ້ນໍາໃຊ້ທິດສະດີຕາມລາຍວິຊາສະເພາະ ເພື່ອອ້າງອີງໃນການຝຶກປະຕິບັດ ພ້ອມທັງມີການນໍາໃຊ້ວັດສະດຸຕົວຈິງປະກອບສ່ວນເຂົ້າໃນການຮຽນ. ນອກຈາກນັ້ນ, ນັກສຶກສາຍັງຈະໄດ້ລົງຝຶກງານກັບບໍລິສັດ, ໂຮງງານຂອງເອກະຊົນທີ່ກ່ຽວຂ້ອງ ຫຼື ສາມາດຝຶກງານພາຍໃນໂຮງຮຽນໄດ້.

ຄວາມຮູ້ພື້ນຖານ ດ້ານວິຊາຄິດໄລ່ ເຊັ່ນ: ຄະນິດສາດ, ເຄມີສາດ, ຟີຊິກສາດ, ຄອມພິວເຕີ ແລະ ວິຊາແຕ້ມຮູບ. ມີຄວາມມັກຮັກໃນການສຶກສາກ່ຽວກັບການສ້ອມແປງເຄື່ອງມື, ການອອກແບບໂຄງສ້າງ ແລະ ການຕິດຕັ້ງອຸປະກອນຕ່າງໆ. ມີຄວາມສົນໃຈໃນອາຊີບນາຍຊ່າງ. ເປັນຄົນ ມັກອອກແຮງງານ, ມັກຊອກຮູ້, ຊອກສຶກສາດ້ວຍຕົນເອງ ແລະ ດຸໝັ່ນຂະຫຍັນພຽນ 

ສາມາດຄິດໄລ່, ວັດແທກ, ອອກແບບ ແລະ ນໍາໃຊ້ເຕັກນິກຕ່າງໆ ເຂົ້າໃນການຕິດຕັ້ງໂຄງສ້າງເຫຼັກ ແລະ ອຸປະກອນໂລຫະອື່ນໆ ທັງພາຍໃນ ແລະ ພາຍນອກເຄຫາສະຖານ ເຊັ່ນ: ຕິດຕັ້ງສຸຂະພັນ, ຮາງລິນ, ທໍ່ນໍ້າ ແລະ ທໍ່ນໍ້າເສຍ ເປັນຕົ້ນ. ນັກສຶກສາຍັງຈະມີຄວາມຮູ້ພື້ນຖານທາງດ້ານວິສະວະກໍາ ເພື່ອສາມາດໄປສຶກສາຕໍ່ສາຂາວິສະວະກໍາຂົວ-ທາງໃນລະດັບປະລິນຍາຕີໄດ້.

ສາມາດບັນຈຸເຂົ້າເຮັດວຽກ ທັງພາກລັດ ເຊັ່ນ: ລັດວິສະຫະກິດນ້ຳປະປາລາວ, ລັດວິສະຫະກິດໄຟຟ້າລາວ ຫຼື ບໍລິສັດເອກະຊົນທີ່ກ່ຽວຂ້ອງກັບສຸຂະພັນ ແລະ ການກໍ່ສ້າງ ແລະ ຫ້າງຮ້ານຕິດຕັ້ງອາລູມີນຽມຕ່າງໆ. ນອກນີ້ ຍັງສາມາດ ປະກອບອາຊີບຊ່າງຈອດເຫຼັກ, ຊ່າງຕິດຕັ້ງເຄື່ອງໃຊ້ສຸຂະພັນ, ທໍ່ນ້ຳເສຍ ແລະ ໄຟຟ້າ ຫຼື ສາມາດປະກອບທູລະກິດຂອງຕົນເອງໄດ້.