ສິລະປະປັ້ນຫຼໍ່

ສິລະປະປັ້ນຫຼໍ່ ຫຼື ວິຊາ​ປັ້ນຫຼໍ່ ​ເປັນ​ຂະ​ແໜງການໜຶ່ງຂອງ​ສິລະ​ປະ ທີ່​ສະ​ແດງ​ອອກ​ຜ່ານ​ການ​ປັ້ນ, ຫຼໍ່ ​​ໃຫ້​ເປັນ​ຮູບຊົງ 3 ມິ​ຕິ ​ແລະ ຕົກ​ແຕ່ງ​ໃຫ້​ເກີດ​ຄວາມ​ສວຍ​ງາມ. ສາຂາ​ນີ້​ມີ​ຄວາມ​ສຳຄັນ ​ແລະ ມີ​ບົດບາດ​ໃນ​ສັງຄົມ​ລາວ ເພາະຈະສາມາດ​ພົບ​ເຫັນ​ສິລະ​ປະປັ້ນຫຼໍ່ ​ໄດ້​ທົ່ວ​ທຸກ​ບ່ອນ ບໍ່​ວ່າ​ຈະ​ເປັນ ວັດວາອາ​ຮາມ, ອານຸສອນ​ສະຖານ, ອາຄານ ຫ້ອງການ, ສວນສາ​ທະ​ລະນະ ​ແລະ ອື່ນໆ ​ເຊິ່ງຄຸ້ນ​ເຄີຍ​ກັນ​ໃນ​ແບບ​ຂອງ ຮູບ​ປັ້ນ​ພະພຸດທະ​ຮູບ, ລວດລາຍ​ປະດັບ​ອາຄານ ​ແລະ ຮູບ​ຫຼໍ່ອານຸສາວະ​ລີ​ຕ່າງໆ.

ສາຂານີ້ຮຽນກ່ຽວກັບ ຄວາມ​ຮູ້​ດ້ານ​ລັກສະນະ​ຂອງສິລະ​ປະປັ້ນຫຼໍ່ຊະນິດ​ຕ່າງໆ ທັງ​ແບບ​ພື້ນ​ເມືອງ ​ແລະ ຮ່ວມ​ສະ​ໄໝ; ​ເຕັກນິກ ​ແລະ ວິທີການ​ໃນ​ການ​ປັ້ນ, ຫຼໍ່ ຮູບ​ສິລະ​ປະ ​ແບບ​ຕ່າງໆ​ເຊັ່ນ: ການ​ປັ້ນ​ພະພຸດທະ​ຮູບ, ລວດລາຍ​ປະດັບ, ວັດຖຸ​ຕົກ​ແຕ່ງ​ສວນ; ​ກາ​ນ​ເລືອກ, ນໍາໃຊ້ ​ແລະ ປະສົມວັດສະດຸເຊັ່ນ: ດິນ, ປູນ, ຊີມັງ ​ແລະ ວັດ​ສະດຸ​ອື່ນໆ ທີ່​ສາມາດ​ນຳ​ເອົາ​ມາ​ໃຊ້​ໃນ​ການ​ປັ້ນ​ໄດ້ ​ໂດຍຈະສ້າງສັນ​ໃຫ້​ມີ​ຄຸນຄ່າ​ເພີ່ມ​ດ້ວຍ​ຈິນຕະນາການ​ ​ແລະ ສີມື​ຂອງ​ນາຍ​ຊ່າງ.

ນັກສຶກສາຈະໄດ້ຮຽນທິດສະດີໃນຫ້ອງຮຽນ ຈາກ​ອາຈານ​ຜູ້​ທີ່​ມີ​ຄວາມ​ຊຳນານ​ງານ; ຮຽນຮູ້​ເຕັກນິກ​ກ່ຽວກັບ​ການ​ປັ້ນ ​ແລະ ຂຶ້ນ​ຮູ​ບ ​ໃນ​ແບບ​ຕ່າງໆ, ຮຽນຮູ້​ການ​ເຮັດ​ໂຄງ​ສ້າງ​ພາຍ​ໃນ​ຂອງ​ຮູ​ບປັ້ນກ່ອນ​. ຫຼັງຈາກ​ນັ້ນ ນັກ​ສຶກສາ ກໍ່ຈະ​ໄດ້​ເລີ່​ມຕົ້ນລົງມື​ປັ້ນຕົວ​ຈິງ, ​ເວົ້າລວມ ກໍ​ຄື​ຮຽນເຕັກນິກ​ທຸກ​ຢ່າງ​ທີ່​ກ່ຽວຂ້ອງ​ກັບ​ວິຊາ​ນີ້ ​ໂດຍ​ຈະເນັ້ນ​ພາກ​ປະຕິບັດ​ເປັນ​ສ່ວນ​ໃຫຍ່ ​ເຊິ່ງຈະ​ເລີ່​ມທົດ​ລອງ​ປັ້ນຈາກ ສິລະ​ປະ​ທີ່​ມີ​ຮູບຊົງ​ແບບ​ງ່າຍດາຍ ​​ໄປ​ຫາ ​ແບບ​ທີ່​ມີ​ຄວາມ​ສະຫຼັບຊັບ​ຊ້ອນ ​ແລະ ຕ້ອງການ​ຄວາມ​ປານີດ​ສູງ.

ຄວາມຮູ້​ພື້ນຖານ ​ສິລະ​ປະດ້ານ​ໃດໜຶ່ງຍິ່ງ​ເປັນ​ການ​ດີ; ​ເປັນ​ຄົນ​ທີ່ມີຄວາມອົດທົນສູງ ເພາະວິຊາປັ້ນເປັນວິຊາທີໜັກ, ​ໃສ່​ໃຈ​ໃນ​ລາຍ​ລະອຽດ, ມີ​ຄວາມລະອຽດອ່ອນ​ໃນ​ການ​ໃຊ້​ມື, ມີຈິນຕະນາການ ແລະ ຄວາມຄິດສ້າງສັນ; ມີຄວາມສົນໃຈ ​ແລະ ມັກຮັກໃນວຽກງານການປັ້ນ, ​ໃນ​ການ​ຮັກສາ​​ ແລະ ສ້າງສາສິລະ​ປະ​ວັດທະນະ​ທໍາ.

ມີຄວາມຮູ້ທາງດ້ານສິລະປະການ​ປັ້ນ, ​ເຕັກ​ນິກວິທີ​ການ​ຕ່າງໆ ທີ່ມີຄວາມສຳຄັນ ແລະ ກ່ຽວ ຂ້ອງກັບການປັ້ນ; ມີ​ຄວາມ​ຄິດ​ສ້າງສັນ, ມີຈິນຕະນາການໃໝ່ ໃນການສ້າງສັນງານປັ້ນອອກສູ່ສັງຄົມ, ມີຄວາມສາມາດໃນການຜະລິດ ແລະ ຄຸມວຽກງານກໍ່ສ້າງທາງດ້ານສິລະປະຂະໜາດໃຫຍ່ໄດ້.

ນັກສຶກສາສາມາດເປັນຊ່າງສີມືດ້ານການ​ປັ້ນຫຼໍ່, ​ເປີດ​ກິດຈະການ​ສ່ວນ​ຕົວ, ​ເປັນອາຈານສອນ ເຊິ່ງສາມາດເຮັດວຽກໃນອົງກອນທີ່ກ່ຽວຂ້ອງເຊັ່ນ: ບໍລິສັດ ຜະລິດຕະພັນວັດທະນະທຳ, ບໍລິສັດກໍ່ສ້າງ-ອອກແບບຕົກແຕ່ງ, ເປັນພະນັກງານລັດ,ໂຮງຮຽນວິຈິດສິນ ແລະ ໂຮງຮຽນ ວິຊາຊີບຕ່າງໆ.