ຈິດຕະກຳ

ຈິດຕະກຳ ​ໝາຍ​ເຖິງ ຮູບ​ແຕ້ມ ຫຼື ການ​ແຕ້ມຮູບ ອັນເປັນ​ວິຊາສິລະ​ປະ​ຂະ​ແໜງ​ເອກ ທີ່ເປັນ​ພື້ນຖານ​ໃຫ້​ແກ່​ວິຊາ​ສິລະ​ປະ​ອື່ນໆ​ ​ເພາະກ່ອນ​ຈະ​ມີ​ການ​ສ້າງສັນ​ຜົນງານ​ສິລະ​ປະ ບໍ່​ວ່າ​ຂະ​ແໜງ​ໃດ​ໆກໍ່​ຕາມ ຕ້ອງ​ໄດ້​ມີ​ການ​ອອກ​ແບບ ດ້ວຍ​ການສະ​ເກັດ​ພາບ ຫຼື​ ແຕ້ມ​ແບບ​ຮ່າງ​ເສຍ​ກ່ອນ. ວິຊາ​ຈິດຕະກຳ​ເປັນ​ວິຊາໜຶ່ງ ທີ່​ມີ​ຄວາມ​ສຳຄັນ​ຕໍ່​ສັງຄົມມາ​ແຕ່​ດົນ​ນານ ໃນ​ດ້ານ​ການ​ປະດັບ​ປະດາ​ ຕົກແຕ່ງ ອາຄານ​, ບ້ານ​ເຮືອນ ແລະ ສະຖານ​ທີ່​ສຳຄັນຕ່າງໆ ລວມ​ເຖິງ​ ວັດວາອາ​ຮາມ ​ແລະ ອື່ນໆ.

ວິຊາ​ນີ້ຮຽນ ກ່ຽວກັບ ການ​ແຕ້ມ​ຮູບ ແລະ ການ​ອອກ​ແບບ ​ເຊິ່ງ​ໄດ້​ແບ່ງ​ການ​ແຕ້ມ​ອອກ​ເປັນ ​ການແຕ້ມ​ຮູບ​ເໝືອນ (ຄົນ, ສັດ …) ​ໂດຍ​ນຳ​ໃຊ້ ສໍດຳ, ສີ​ຝຸ່ນ ​ແລະ ຖ່ານ; ການ​ແຕ້ມ​ແບບທົ່ວ​ໄປ (ນຳ​ໃຊ້​ສີ​ຕ່າງໆ ຄື: ສີນ້ຳ, ສີພັດສເທວ, ສີ​ອະຄຼີລິກ ​ແລະ ສີນ້ຳມັນ) ແລະ ການອອກ​ແບບ​ແຕ້ມ​ຈັດ​ພາບ ຕາມ​ຈິນຕະນາການ ​ແລະ ຈິດຕະກຳ​ຮ່ວມ​ສະ​​ໄໝ.

​ນັກສຶກສາ ຈະໄດ້ຮຽນທິດສະດີ​ການ​ແຕ້ມເປັນ​ພື້ນຖານ ຜ່ານການສັງ​ເກດ​ຕົວຢ່າງຂອງ ​ຜົນງານ​ຈາກ​ສິລະ​ປິນພາຍ​ໃນ​ ແລະ​ ຕ່າງປະ​ເທດ ພ້ອມທັງຮຽນຂັ້ນຕອນ ແລະ ຮູບແບບຂອງການແຕ້ມຜ່ານທາງທິດສະດີ  ແລ້ວລົງມືແຕ້ມຕົວຈິງ​ເປັນ​ສ່ວນ​ຫຼາຍ ເຊິ່ງຈະ​ເນັ້ນໃສ່ການ​ສ້າງສັນ​ຜົນງານ​ດ້ານ​ການ​ແຕ້ມ ​ໂດຍ​ອີງ​ໃສ່​ຄວາມ​ຖະໜັດ ​ຂອງ​ນັກ​ສຶກສາ​ແຕ່ລະຄົນ ເຊິ່ງໃນຂັ້ນຕອນການແຕ້ມນັ້ນ ແມ່ນຈະມີອາຈານ​ ​ຊ່ວຍ​ດຶງ​ເອົາ​ຈຸດ​ທີ່​ເດັ່ນ ຂອງນັກສຶກສາ ແລະ ການແຕ້ມມາ​ພັດທະນາ​ຝີ​ມື​ການ​ແຕ້ມ​ຂອງ​ນັກ​ສຶກສາ​ເອງ.​ 

ຄວາມຮູ້ພື້ນຖານ ດ້ານການ​​ແຕ້ມ​ຂັ້ນ​ຕົ້ນ, ສິລະປະພື້ນຖານ ແລະ ວັນນະຄະດີ. ມີຄວາມມັກຮັກ ​ໃນ​ວຽກງານຈິດຕະກໍາ, ມັກສິ່ງ  ໃໝ່ໆຢູ່ສະເໝີ ແລະ ມັກ​ການ​ຝຶກ​ຝົນ​ຕົນ​ເອງ. ເປັນຄົນ ມັກ​ສັງ​ເກດ, ຊອກ​ຮູ້​ຮ່ຳຮຽນ, ມີຄວາມອົດທົນ, ມີຄວາມລະອຽດອ່ອນ ແລະ ມີຄວາມຄິດສ້າງສັນ. 

ສາມາດ​ອອກ​ແບບ ​ແລະ ແຕ້ມ​ຮູບ​ໃນ​ແບບ​ຕ່າງໆ​​ເຊັ່ນ: ຮູບ​ເໝືອນ, ວິວທິວທັດ, ຮູບ​ຕາມ​ຈິນຕະນາການ​, ການແຕ້ມຮູບທົ່ວໄປ ແລະ ຈິດຕະກຳ​ຮ່ວມ​ສະ​​ໄໝ. ສາມາດ​ນຳ​ໃຊ້​ສີ​ໄດ້​ທຸກ​ຮູບ​ແບບ​ເຂົ້າ​ໃນ​ການ​ແຕ້ມ​ຮູບ ບໍ່ວ່າຈະເປັນສີນໍ້າມັນ, ສີຝຸ່ນ, ສີພັດສເທວ, ສໍດໍາ ແລະ ອື່ນໆ. 

ເປັນນັກ​ແຕ້ມ​ອິດ​ສະລະ, ນັກ​ແຕ້ມ​ກາ​ຕູນ, ນັກ​ອອກ​ແບບ, ​ເປັນ​ອາຈານ​ສອນ​ແຕ້ມ​ຮູບ, ​ເປັນ​ພະນັກງານຕາມ​ສຳນັກງານ​ອົງການ​ ຫຼື ​ບໍລິສັດ ທີ່ເຮັດວຽກ ກ່ຽວກັບ ການອອກ​ແບບ ຫຼື ວຽກງານຈິດຕະກໍາ ເຊັ່ນ: ກະຊວງ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ບໍລິສັດຕົກແຕ່ງ ແລະ ອອກແບບ ຫຼື ເປັນນັກສີລະປິນອິດສະລະ.