ປູກຝັງ

ການປູກຝັງ ເປັນສາຂາວິຊາທີ່ເວົ້າເຖິງສາດ ຫຼື ວິທະຍາສາດຕ່າງໆກ່ຽວກັບການປູກພືດ ລວມທັງສິ່ງແວດລ້ອມທີ່ອໍານວຍຄວາມສະດວກໃຫ້ແກ່ການປູກພືດ. ສາຂານີ້ມີຄວາມສໍາຄັນ ເນື່ອງຈາກມັນໄດ້ເນັ້ນໜັກ ໃສ່ການສ້າງນັກວິຊາການທີ່ມີຄວາມຮູ້ແລະ ສາມາດເຜີຍແຜ່ຄວາມຮູ້ເຫຼົ່ານັ້ນ ໃຫ້ແກ່ຊາວກະສິກອນທ້ອງຖິ່ນ ໂດຍມີຈຸດປະສົງເພື່ອ ເພີ່ມປະສິດທິພາບໃນການຜະລິດ, ເພື່ອພັດທະນາຊີວິດການເປັນຢູ່ຂອງປະຊາຊົນທ້ອງຖິ່ນ ກໍ່ຄືການພັດທະນາເສດຖະກິດ-ສັງຄົມໂດຍລວມ.

ສາຂານີ້ສຶກສາກ່ຽວກັບ ພືດສາດ (ເຊັ່ນ: ສະລິລະສາດພືດ, ລັກສະນະຂອງພືດ, ການທໍາງານຂອງພືດ) ແລະ ສິ່ງແວດລ້ອມທີ່ອໍານວຍຄວາມສະດວກໃຫ້ແກ່ການປູກຝັງ (ເຊັ່ນ: ການນໍາໃຊ້ນໍ້າເຂົ້າໃນການປູກພືດ, ການປັບປຸງດິນ, ບັນດາທາດໃນດິນທີ່ເຮັດໃຫ້ພືດຈະເລີນງອກງາມ, ອຸຕຸກະເສດ ຫຼື ການສຶກສາສະພາບອາກາດທີ່ເໝາະສົມໃຫ້ແກ່ການປູກພືດ) ແລະ ວິຊາສະເພາະດ້ານການປູກຝັງ ເຊັ່ນ: ວິທີການປູກ ແລະ ປັັບປຸງພັນພືດປະເພດຕ່າງໆ ເຊັ່ນ: ພືດສວນ, ພືດໄຮ່ ແລະ ພືດອຸດສາຫະກໍາ. 

ວິທີການສິດສອນປະກອບມີການຮຽນທິດສະດີການປູກຝັງ ໂດຍຜ່ານການບັນຍາຍ ແລະ ການປະຕິບັດຕົວຈິງ ໃນສວນທົດລອງພາຍໃນໂຮງຮຽນ, ໂດຍນັກສຶກສາຈະໄດ້ ທົດລອງປູກພືດດ້ວຍຕົນເອງ ເຊິ່ງມີຂະບວນການຕັ້ງແຕ່ ການເລືອກສະຖານທີ່, ການຂຸດໜານ, ກ້າ, ບົ່ມ, ຫົດນໍ້າ ແລະ ຕິດຕາມສຶກສາຂະບວນການຂະຫຍາຍຕົວ ຫຼື ຂະບວນການໃຫ້ຜົນຜະລິດ. ມີ​ການຝຶກງານ ໃນໜ່ວຍງານທັງພາກລັດ ແລະ ເອກະຊົນ ທັງພາຍໃນນະຄອນຫຼວງວຽງຈັນ ແລະ ທ້ອງຖິ່ນ.

ຄວາມຮູ້ພື້ນຖານວິຊາຊີວະສາດ, ເຄມີສາດ ແລະ ຄະນິດສາດ. ມີຄວາມສົນໃຈທາງດ້ານການຜະລິດກະສິກໍາ ຫຼື ການສຶກສາກ່ຽວກັບພືດ ແລະ ການປູກຝັງປະເພດຕ່າງໆ. ເປັນຄົນມັກທໍາມະຊາດ ແລະ ມັກການເຮັດວຽກພາກສະໜາມ ແລະ ທີ່ຂາດບໍ່ໄດ້ແມ່ນ ຄວນເປັນຄົນທີ່ເຫັນຄວາມສໍາຄັນຂອງຂະແໜງກະສິກໍາ ຕໍ່ການຂະຫຍາຍຕົວຂອງເສດຖະກິດ. 

ນັກສຶກສາທີ່ຈົບຈາກສາຂານີ້ ຈະມີທັກສະໃນການປູກພືດ, ການບົວລະບັດຮັກສາພືດ ແລະ ການຈັດການກິດຈະການກະສິກໍາອື່ນໆ ເຊັ່ນ: ການເລືອກພື້ນທີ່ໃນການປູກ, ການປັບແຕ່ງພື້ນທີ່ ຫຼື ການກຽມດິນ, ການປູກ, ຮັກສາ ແລະ ເກັບກ່ຽວພືດ ແລະ ການຈໍາໜ່າຍຜົນຜະລິດພືດ. ນອກຈາກນີ້, ຍັງມີຄວາມສາມາດໃນການສົ່ງເສີມ ແລະ ນໍາພາປະຊາຊົນເຮັດວຽກກະສິກໍາ.

ນັກສຶກສາ ສາມາດປະກອບອາຊີບ ເປັນນັກວິຊາການ ເຊິ່ງມີໜ້າທີ່ຫຼັກໃນການຈັດການກ່ຽວກັບການປູກຝັງ ໂດຍສາມາດເຮັດວຽກນໍາໜ່ວຍງານທັງພາກລັດ, ເອກະຊົນ, ອົງການຈັດຕັ້ງ ແລະ ໂຄງການສົ່ງເສີມກະສິກໍາຕ່າງໆ ເຊັ່ນ: ກະຊວງກະສິກໍາ ​ແລະ ປ່າ​ໄມ້, ຫ້ອງການກະສິກໍາ ​ແລະ ປ່າ​ໄມ້ແຂວງ, ທະນາຄານສົ່ງເສີມກະສິກໍາ, ສູນປ້ອງກັນພືດ ເປັນຕົ້ນ.