ຊ່າງອົງຄະທຽມ ແລະ ເຄື່ອງຄ້ຳຊູ

ຊ່າງອົງຄະທຽມ ແລະ ເຄື່ອງຄ້ຳຊູ ແມ່ນ​ ນັກ​ເຕັກນິກ​ ທີ່​ມີໜ້າທີ່​ປະກອບສ່ວນ​ເຂົ້າ​ໃນ​ການ​ຟື້ນຟູ​ສະມັດ​ຕະພາບ​ຂອງ​ຮ່າງກາຍຂອງຄົນເຈັບ ​ໂດຍ​ສະ​ເພາະ​ແມ່ນ​ການ​ສູນ​ເສຍ​ອົງຄະ​ຈາກ​ສົງຄາມ, ກະດູກຫັກ, ກະດູກເສື່ອມ ແລະ ອຸບັດຕິ​ເຫດ. ວຽກງານຊ່າງອົງຄະທຽມ ແລະ ເຄື່ອງຄ້ຳຊູ ແມ່ນວຽກງານທີ່ສຳຄັນຫຼາຍ ​ເພາະ​ຈະ​ຊ່ວຍ​ໃຫ້ຜູ້ທີ່ພິການ ສາມາດ​ຊ່ວຍ​ເຫຼືອຕົນ​ເອງໄດ້, ມີໂອກາດຊອກວຽກເຮັດງານທໍາ ແລະ ​ເປັນ​ການຍົກສູງຄຸນນະພາບຊີວິດ ຂອງ​ເຂົາເຈົ້າໃຫ້ກັບມາໃຊ້ຊີວິດຢູ່ໃນສັງຄົມໄດ້ຄືເກົ່າ. 

​ສາຂາ​ນີ້ ຮຽນກ່ຽວກັບການປະເມີນ, ວາງແຜນ ແລະ ​ຜະລິດເຄື່ອງ​ຄ້ຳ​ຊູ​ ໃຫ້​ກັບ​ຄົນ​ເຈັບທີ່​ມີ​ຄວາມ​ບົກພ່ອງ​ຂອງ​ຮ່າງກາຍ​ທີ່​ພົວພັນ​ເຖິງ ກ້າມຊີ້ນ, ກະດູກ, ​ເສັ້ນປະສາດ ​ເຊັ່ນ: ​ ​ຄ້ຳ​ຊູ​ ຄໍ, ຂາ, ແຂນ ​ແລະ ​ແອວ ​ເປັນຕົ້ນ ​ເພື່ອຈະຊ່ວຍຊູແທນ ໃນໄລຍະກ່ອນ ແລະ ຫຼັງຜ່າຕັດ ​​ເຊິ່ງຈະຊ່ວຍເພີ່ມຄວາມສາມາດໃນການເຄື່ອນເໜັງ, ຫຼຸດຜ່ອນຄວາມເຈັບປວດ ແລະ ອື່ນໆ. ພ້ອມ​ດຽວກັນນັ້ນ ກໍ່ຍັງມີ​ການ ​ສ້າງອົງຄະທຽມ ​ເພື່ອທົດແທນອະໄວຍະວະທີ່​ເສຍ​ໄປ ອີກດ້ວຍ. ​

​ວິທີ​ການ​ສິດສອນ ​​ເນັ້ນ​ໃສ່ການຮຽນທິດສະດີແບບ​ເປັນ​ກຸ່ມ ແລະ ລົງປະຕິບັດຕົວຈິງໃນຫ້ອງທົດລອງຢູ່​ສູນ​ຟື້ນຟູໜ້າທີ່​ການ ​ເຊິ່ງ ອາຈານ​ທີ່​ປຶກສາ​ຜູ້ໜຶ່ງ ຈະ​ເປັນ​ຜູ້​ສາທິດ​ໃຫ້​ເບິ່ງ​ລະອຽດກ່ຽວກັບ​ການ​ ສ້າງ​ອົງຄະ​ທຽມ ​ແລະ ​ເຄື່ອງ​ຄ້ຳ​ຊູ ​ເຊັ່ນ: ຂາທຽມ, ຫຼາບ​ແຂນ​-ຂາ ​ແລະ ອື່ນໆ; ແລະ ນັກ​ສຶກສາ ຍັງ​ຈະ​ໄດ້​​ສ້າງ​ອົງຄະ​ທຽມ ​ແລະ ​ເຄື່ອງ​ຄ້ຳ​ຊູ​ ດ້ວຍຕົນເອງ ​ຢູ່​ສູນ​ຟື້ນຟູໜ້າທີ່​ການ ພາຍ​ໃຕ້​ການ​ຊີ້ນຳ​ຂອງ​ອາຈານ ເຊິ່ງນັກສຶກສາ​ແຕ່ລະຄົນ​ຈະ​ໄດ້​ຮັບຜິດຊອບ​ຄົນ​ເຈັບ​ຕົວ​ຈິງ.

ຄວາມ​ຮູ້​ພື້ນຖານ ​ຊີວະສາດ, ​ເລຂາຄະນິດ ​ແລະ ຟິຊິກ​ສາດ;  ມີ​ຄວາມ​ສົນ​ໃຈ ​​ໃນ​ການ​ປະດິດ​ສິ່ງ​ຂອງ ​ແລະ ເປັນ​ຄົນ ທີ່ມີຄວາມອົດທົນ, ມີຄວາມປານີດ, ມີສິລະປະ ​ແລະມີໃຈຮັກມັກໃນການຊ່ວຍເຫຼືອສັງຄົມ ໂດຍສະເພາະແມ່ນ ຄົນດ້ອຍໂອກາດ, ຄົນພິການ ຫຼື ບົກພ່ອງທາງດ້ານຮ່າງກາຍ. 

ຄວາມ​ສາມາດ​ໃນ​ການ​ເຮັດວຽກຮ່ວມກັບທ່ານໝໍປິ່ນປົວ ໂດຍຜະລິດອົງຄະທຽມ ແລະ ເຄື່ອງຄ້ຳຊູໃຫ້ແກ່ຄົນເຈັບ; ຮູ້ວິທີການວາງແຜນ ແລະ ອອກແບບອົງຄະທຽມ ແລະ ເຄື່ອງຄໍ້າຊູ ​ໃຫ້​ເໝາະສົມ​ກັບ​ຄົນ​ເຈັບ; ສາມາດ​ຖ່າຍ​ທອດ​ຄວາມ​ຮູ້​ດ້ານ​ວິຊາ​ການ​ອົງຄະ​ທຽມ ​ແລະ ​ເຄື່ອງ​ຄ້ຳ​ຊູໃຫ້​ແກ່​ນັກ​ສຶກສາ​ແພດ​ທີ່​ກ່ຽວຂ້ອງທັງ​ພາກ​ທິດ​ສະ​ດີ ​ແລະ ປະຕິບັດ​ຕົວ​ຈິງ.

​​

ເປັນ​ຊ່າງ​ອົງຄະ​ທຽມ ​ແລະ ​ເຄື່ອງ​ຄ້ຳ​ຊູ ​ຢູ່​ສູນ​ການ​ແພດຟື້ນຟູໜ້າທີ່​ການນະຄອນຫຼວງ ແລະ ຕ່າງແຂວງ, ສູນ​ຜິວໜັງ ​ແລະ ​ໂ​ຮງໝໍ; ເຮັດ​ວຽກນຳ​ໂຄງການສາກົນ​ ເປັນຕົ້ນ​ແມ່ນ ​ໂຄງການ ​ເກັບ​ກູ້ລະ​ເບີດ; ເປັນອາຈານ​ສອນ​ຢູ່​ພາກວິຊາ​ຊ່າງ​ອົງຄະ​ທຽມ ​ແລະ ​ເຄື່ອງ​ຄໍ້າ​ຊູ.