ເສດຖະສາດພາກລັດ

ສາຂາເສດຖະສາດພາກລັດ ເປັນສາຂາທີ່ວ່າດ້ວຍ ການສຶກສາກ່ຽວກັບບົດບາດ ແລະ ໜ້າທີ່ຂອງລັດຖະບານ ໃນການດໍາເນີນນະໂຍບາຍການເງິນ ແລະ ເງິນຕາ. ສາຂານີ້ ມີບົດບາດສໍາຄັນຫຼາຍຕໍ່ການພັດທະນາເສດຖະກິດ ແລະ ສັງຄົມ ເນື່ອງຈາກເປັນພື້ນຖານໃນການຄຸ້ມຄອງລະບົບເສດຖະກິດ ທີ່ຈະຊ່ວຍກະຕຸກຊຸກຍູ້ໃຫ້ເສດຖະກິດມີການຂະຫຍາຍຕົວ ແລະ ມີສະຖຽນລະພາບ ເວົ້າລວມ, ເວົ້າສະເພາະ ພາກການເງິນ.

ສາຂານີ້ຮຽນກ່ຽວກັບ ການຄຸ້ມຄອງເສດຖະກິດ-ການເງິນ, ຕະຫຼາດການເງິນ ແລະ ສະຖາບັນການເງິນ ເພື່ອໃຫ້ສອດຄ່ອງກັບຈັງຫວະການຂະຫຍາຍຕົວຂອງເສດຖະກິດ. ການວິເຄາະການເງິນຂອງທຸລະກິດ ແລະ ລັດຖະບານ, ນະໂຍບາຍງົບປະມານ, ນະໂຍບາຍເງິນຕາ, ການແກ້ໄຂບັນຫາເສດຖະກິດ, ຂະບວນການ, ວິທີການກະກຽມ ແລະ ການວິເຄາະງົບປະມານຂອງລັດຖະບານ, ບົດບາດ ແລະ ໜ້າທີ່ຂອງລັດຖະບານໃນລະບົບເສດຖະກິດ, ໂຄງສ້າງລາຍຮັບ-ລາຍຈ່າຍຂອງລັດ ເຊັ່ນ: ການເກັບສ່ວຍສາອາກອນ, ການກໍ່ໜີ້ສາທາລະນະ ເປັນຕົ້ນ.

ປະກອບມີການສອນທິດສະດີເພື່ອນໍາໃຊ້ເຂົ້າໃນການວິເຄາະບັນຫາເສດຖະກິດ ເຊັ່ນ: ບັນຫາການເງິນພາກລັດ, ການທະນາຄານ, ຕະຫຼາດການເງິນ ແລະ ຕະຫຼາດທຶນ. ມີການລົງເກັບກໍາຂໍ້ມູນຕົວຈິງທັງຈາກພາກສະໜາມ ຫຼື ຈາກເອກະສານ ເພື່ອປະກອບເຂົ້າໃນການຂຽນບົດລາຍງານ ແລະ ການລົງຝຶກງານໃນອົງກອນທີ່ກ່ຽວຂ້ອງ ເຊັ່ນ: ກະຊວງແຜນການ ແລະ ການລົງທຶນ, ກະຊວງການເງິນ, ທະນາຄານກາງ,​ ທະນາຄານທຸລະກິດ, ຕະຫຼາດຫຼັກຊັບ ຫຼື ອົງການຈັດຕັ້ງທີ່ບໍ່ຂຶ້ນກັບລັດຖະບານ.

ຄວາມຮູ້ພື້ນຖານທາງດ້ານຄະນິດສາດ ແລະ ສະຖິຕິ. ມີຄວາມສົນໃຈກ່ຽວກັບເສດຖະກິດ ໂດຍສະເພາະທີ່ກ່ຽວຂ້ອງກັບພາກສ່ວນເງິນຕາ, ການທະນາຄານ ແລະ ການເງິນພາກລັດ ແລະ ມີຄວາມສົນໃຈຊອກຮູ້ ແລະ ສຶກສາກ່ຽວກັບນະໂຍບາຍຕ່າງໆ ທີ່ລັດຖະບານໄດ້ວາງອອກ.

ສາມາດນໍາໃຊ້ທິດສະດີ ແລະ ເຄື່ອງມືທາງເສດຖະສາດ ເຂົ້າໃນການຄຸ້ມຄອງເສດຖະກິດ-ການເງິນ, ຕະຫຼາດການເງິນ ແລະ ສະຖາບັນການເງິນ, ການວິເຄາະເສດຖະກິດ, ນະໂຍບາຍການເງິນ ແລະ ເງິນຕາ ຂອງລັດຖະບານ ແລະ ບັນຫາທີ່ເກີດຈາກການນໍາໃຊ້ນະໂຍບາຍການເງິນ-ເງິນຕາໃດໜຶ່ງ, ວິເຄາະປະສິດທິພາບໃນການຈັດເກັບລາຍຮັບ ແລະ ການໃຊ້ຈ່າຍຂອງລັດຖະບານ.

ເປັນນັກວິຊາການດ້ານການວາງແຜນນະໂຍບາຍ ແລະ ຄຸ້ມຄອງເສດຖະກິດ-ການເງິນ, ຕະຫຼາດການເງິນ ແລະ ສະຖາບັນການເງິນ ໂດຍສາມາດເຮັດວຽກໃນອົງກອນທີ່ກ່ຽວຂ້ອງ ເຊັ່ນ: ກະຊວງການເງິນ, ກະຊວງແຜນການ ແລະ ການລົງທຶນ, ຕະຫຼາດຫຼັກຊັບ ແລະ ສະຖາບັນການເງິນອື່ນໆ ເຊັ່ນ: ທະນາຄານ, ບໍລິສັດປະກັນໄພ, ບໍລິສັດເງິນທຶນ, ບໍລິສັດຫຼັກຊັບ ເປັນຕົ້ນ.