ເຕັກນິກລັງສີ ແລະ ຮູບພາບການແພດ
ເຕັກນິກລັງສີ ແລະ ຮູບພາບການແພດ ແມ່ນສາຂາໜຶ່ງຂອງການແພດ ທີ່ນໍາໃຊ້ເຕັກໂນໂລຊີທີ່ໄດ້ຈາກ ການສ່ອງໄຟຟ້າ ແລະ ເອໂກ ເປັນຕົ້ນ ເພື່ອໃຫ້ໄດ້ຮູບພາບຂອງພາກສ່ວນຕ່າງໆຂອງຮ່າງກາຍ ເພື່ອຊ່ວຍໃນການບົ່ງມະຕິ ແລະ ປິ່ນປົວພະຍາດ. ສາຂານີ້ ມີຄວາມສໍາຄັນ ເນື່ອງຈາກ ມັນຈະຊ່ວຍໃຫ້ເຫັນສະພາບຂອງອະໄວຍະວະພາຍໃນຮ່າງກາຍ ກໍລະນີມີການບາດເຈັບ ເຊັ່ນ: ກະດູກຫັກ ຫຼື ສະໝອງໄດ້ຮັບການກະທົບ ແລະ ຍັງສາມາດຕິດຕາມວິວັດທະນາການຂອງພະຍາດຕ່າງໆ ອີກດ້ວຍ.
ສາຂານີ້ ຮຽນກ່ຽວກັບການນຳໃຊ້ເຄື່ອງຈັກທີ່ທັນສະໄໝ ເຂົ້າມາຊ່ວຍໃນການບົ່ງມະຕິທາງການແພດເປັນຕົ້ນກໍແມ່ນ ເຄື່ອງ X-ray, CT Scan, ເຄື່ອງ ເອໂກ (Ultrasound) ແລະ ອື່ນໆ ເພື່ອປະເມີນຮູບພາບກ່ຽວກັບອະໄວຍະວະພາຍໃນ ແລະ ກວດກາຫາສິ່ງທີ່ຜິດປົກກະຕິໃນຮ່າງກາຍຂອງມະນຸດ, ເພື່ອເປັນຕົວຊ່ວຍໃຫ້ແກ່ທ່ານໝໍໃນການບົ່ງມະຕິ ແລະ ປິ່ນປົວຄົນເຈັບໄດ້ຢ່າງຖືກຕ້ອງ ແລະ ທັນກັບພະຍາດ.
ວິທີການສິດສອນຂອງສາຂານີ້ ເນັ້ນການສອນແບບບັນລະຍາຍ ໄປຄຽງຄູ່ກັບ ການສາທິດຂອງຄູອາຈານຕາມຫ້ອງທົດລອງ. ຫຼັງຈາກນັ້ນ, ນັກສຶກສາທຸກຄົນ ຈະຕ້ອງໄດ້ປະຕິບັດຕົວຈິງຢູ່ໂຮງໝໍເຊັ່ນ: ການຈັດທ່າຄົນເຈັບເພື່ອສ່ອງລັງສີ, ວິທີການຖ່າຍ ຮູບພາບລັງສີ, ແລະ ຂະບວນການລ້າງຮູບພາບລັງສີ ເປັນຕົ້ນ. ນອກຈາກນີ້, ກໍ່ຍັງມີການມອບຫົວຂໍ້ໃຫ້ນັກສຶກສາຄົ້ນຄວ້າ ດ້ວຍຕົນເອງ ແລະ ມີການເຮັດບົດລາຍງານສົ່ງ.
ຄວາມຮູ້ພື້ນຖານທາງດ້ານ ຄະນິດສາດ, ຟິຊິກສາດ, ເຄມີສາດ, ຄອມພິວເຕີ ແລະ ພາສາອັງກິດ; ເປັນຄົນ ມັກສັງເກດ; ມີທັກສະໃນການນໍາໃຊ້ເຄື່ອງຈັກ ແລະ ມີຄວາມສົນໃຈໃນ ເຕັກໂນໂລຊີ ກໍ່ຍິ່ງເປັນຜົນດີ ເພາະຈະໄດ້ຮຽນກ່ຽວກັບການນຳໃຊ້ເຄື່ອງຈັກທີ່ທັນສະໄໝເພື່ອໃຫ້ໄດ້ຮູບພາບລັງສີຂອງຮ່າງກາຍມະນຸດ.
ສາມາດປະກອບອາຊີບ ເປັນນັກເຕັກນິກລັງສີ ຢູ່ໂຮງໝໍທັງໃນພາກລັດ ແລະ ເອກະຊົນ; ເປັນອາຈານສອນດ້ານເຕັກນິກລັງສີ ຢູ່ພາກວິຊາ ເຕັກນິກລັງສີ ແລະ ຮູບພາບການແພດ ໃນຄະນະເຕັກນິກການແພດ ຂອງມະຫາວິທະຍາໄລວິທະຍາສາດສຸຂະພາບ; ປະກອບອາຊີບອິດສະຫຼະ ເຊັ່ນ: ເປີດໃຫ້ບໍລິການດ້ານ ເຕັກນິກລັງສີ ແລະ ຮູບພາບການແພດ.
ໜວດວິຊາຄວາມຮູ້ພື້ນຖານວິຊາສະເພາະ
- ກາຍະວິພາກສາດ
- ສະລິລະວິທະຍາ
- ການພະຍາບານພື້ນຖານ
- ຄວາມຊຳນານໃນການສື່ສານກັບຄົນເຈັບ
- ການເບິ່ງແຍງຄົນເຈັບໃນລັງສີວິທະຍາ
- ຈິດຕະວິທະຍາ ແລະ ສຸຂະພາບຈິດ
- ຟີຊິກລັງສີ
- ປະຕິກິລິຍາຂອງແສງລັງສີຕໍ່ຊີວະສາດ
- ອຸປະກອນເຄື່່ອງຈັກລັງສີ
- ອາການສາດ
- ພະຍາດວິທະຍາ
- ຈັນຍາທຳວິຊາອາຊີບ
- ການຄຸ້ມຄອງຮັກສາເຄື່ອງຈັກລັງສີ
ໝວດວິຊາສະເພາະ (ວິຊາຊີບ)
- ວິທີການຖ່າຍຮູບລັງສີ
- ຂະບວນການລ້າງຮູບລັງສີ
- ການປະເມີນຜົນຟີມຮູບລັງສີ
- ການບົ່ງມະຕິຮູບພາບການແພດທີ່ທັນສະໄໝ
- ການຮັບປະກັນຄຸນນະພາບໃນການຖ່າຍຮູບພາບລັງສີ
- ການນຳໃຊ້ສານກັນແສງ
- ການປ້ອງກັນແສງລັງສີ
- ອຸປະກອນທາງລັງສີປິ່ນປົວ ແລະ ການຄວບຄຸມຄຸນນະພາບ
- ອຸປະກອນທາງເວດຊະສາດນີວເຄຼຍ ແລະ ການຄວບຄຸມຄຸນນະພາບ
- ການກວດ ແລະ ປິ່ນປົວພະຍາດທາງລັງສີປີ່ນປົວ
- ການກວດ ແລະ ປິ່ນປົວພະຍາດທາງເວດຊະສາດນີວເຄຼຍ
Leave A Comment