ສາຂາກາຍະບຳບັດ
ກາຍະບຳບັດໝາຍເຖິງ ການຟື້ນຟູໜ້າທີ່ການ ການເຮັດວຽກຂອງຮ່າງກາຍໃນກໍລະນີຄົນເຈັບທີ່ໄດ້ຖືກສູນເສຍໜ້າທີ່ການ ຍ້ອນ ພະຍາດ ຫຼື ຖືກກະທົບຈາກອຸບັດຕິເຫດຕ່າງໆ ເຊັ່ນ: ຄົນເຈັບທີ່ເປັນອຳມະພາດ, ຄົນເຈັບທີ່ເສຍອົງຄະ ຫຼື ມີຄວາມ ບົກພ່ອງທາງຮ່າງກາຍໃນການເຄື່ອນໄຫວໄປມາ ໂດຍມີຈຸດປະສົງເພື່ອ ຟື້ນຟູ ແລະ ເພີ່ມຄວາມສາມາດໃນການເຄື່ອນເໜັງ ແລະ ຫຼຸດຜ່ອນຄວາມເຈັບປວດ ເພື່ອເຮັດໃຫ້ຊີວິດການເປັນຢູ່ຂອງເຂົາເຈົ້າດີຂື້ນ.
ສາຂານີ້ ຮຽນກ່ຽວກັບຫຼັກການການປິ່ນປົວຟື້ນຟູໜ້າທີ່ການຂອງຮ່າງກາຍຂອງຄົນເຈັບ ທີ່ມີຄວາມບົກພ່ອງຂອງຮ່າງກາຍ ໃນການເຄື່ອນໄຫວໄປມາ ເຊິ່ງປະກອບມີ: ການປະເມີນຄົນເຈັບ, ການວາງແຜນການປີ່ນປົວ ແລະ ຝຶກແອບດ້ວຍ ວິທີກາຍະບຳບັດຫຼາຍຮູບເເບບ ແລະ ວິທີຕ່າງໆ ເຊັ່ນ: ການຝຶກແອບການເຄື່ອນເໜັງ, ການນວດບຳບັດ, ການໃຊ້ຄື້ນສຽງ ແລະ ຄວາມຮ້ອນ ເພື່ອຫຼຸດຜ່ອນຄວາມເຈັບປວດ. ນອກຈາກນີ້ກໍ່ຍັງໄດ້ນຳໃຊ້ ແສງເລເຊີ ແລະ ເຕັກນິກອື່ນເຂົ້າໃນການປີ່ນປົວຄົນເຈັບອີກດ້ວຍ.
ວິທີການສິດສອນ ລວມມີ ການສິດສອນແບບບັນລະຍາຍ ແລະ ການຮຽນໂດຍອີງໃສ່ການສຶກສາບັນຫາຂອງກໍລະນີ ຄົນເຈັບ ຕົວຈິງຈາກການແບ່ງເປັນກຸ່ມຍ່ອຍ; ມີການສາທິດຈາກອາຈານ ກ່ຽວກັບ ການຝຶກແອບກາຍະບໍາບັດ ສໍາລັບຄົນເຈັບທີ່ຕ້ອງການ ການຟື້ນຟູໜ້າທີ່ການຂອງສ່ວນຕ່າງໆຂອງຮ່າງກາຍ ຢູ່ຫ້ອງປະຕິບັດການ. ຫຼັງຈາກນັ້ນ, ນັກສຶກສາ ຈະໄດ້ລົງຝຶກຫັດກາຍະບໍາບັດຕົວຈິງກັບຄົນເຈັບຢູ່ໂຮງໝໍ ແລະ ສູນການແພດຟຶ້ນຟູໜ້າທີ່ການ.
ໜວດວິຊາຄວາມຮູ້ພື້ນຖານວິຊາສະເພາະ
- ກາຍະວິພາກສາດ
- ສະລິລະວິທະຍາ
- ສະລິລະພະຍາດວິທະຍາ
- ວິທີວິທະຍາການຄົ້ນຄວ້າ
- ສະລິລະພະຍາດວິທະຍາຂອງການອອກກຳລັງກາຍ
- ຄວາມຊຳນານໃນການສື່ສານກັບຄົນເຈັບ
- ອຸປະກອນຄ້ຳຊູ ແລະ ອົງຄະທຽມ
- ຮູບພາບລັງສີ ແລະ ລັງສີບົ່ງມະຕິ
- ໂພສະນາການ
- ວິທະຍາການເຄື່ອນເໜັງ
- ຈິດຕະວິທະຍາ
- ຈັນຍາທຳແພດ, ຈັນຍາທຳກາຍະບຳບັດ
- ພະບາບານຟື້ນຟູ ແລະ ປະຖົມພະຍາບານ
ໝວດວິຊາສະເພາະ (ວິຊາຊີບ)
- ການນຳໃຊ້ເຄື່ອງມືປິ່ນປົວທາງກາຍະພາບ
- ການບໍລິຫານວິຊາການທາງກາຍະບຳບັດ
- ການອອກກຳລັງກາຍເພື່ອບຳບັດ
- ກາຍະບຳບັດໃນເດັກທີ່ມີຄວາມຜິດປົກກະຕິມາແຕ່ກຳເນີດ
- ດົນຕີບຳບັດ, ກິດຈະກຳບຳບັດ
- ກາຍະບຳບັດໃນສຸຕິນາລີເວດ
- ກາຍະບຳບັດໃນຊຸມຊົນ
- ກາຍະບຳບັດພະຍາດໃນລະບົບປະສາດ
- ກາຍະບຳບັດພະຍາດໃນລະບົບກະດູກ-ກ້າມຊີ້ນ
- ກາຍະບຳບັດໃນຜູ້ສູງອາຍຸ
- ກາຍະບຳບັດໃນລະບົບຫາຍໃຈ
- ກາຍະບຳບັດໃນກຸ່ມນັກກິລາ
- ກາຍະບຳບັດຫຼັງຈາກຖືກກະທົບ
- ການດັດ-ຍຶດ, ການນວດ ແລະ ການດຶງຈ່ອງ
- ຝຶກປະຕິບັດຢູ່ຫ້ອງທົດລອງ
- ປະຕິບັດຕົວຈິງພາກຄລີນິກຢູ່ໂຮງໝໍ, ສູນປິ່ນປົວຕ່າງໆ
Leave A Comment