ພາສາຣັດເຊຍ
ພາສາລັດເຊຍ ແມ່ນພາສາໜຶ່ງທີ່ມີການນໍາໃຊ້ຢ່າງກວ້າງຂວາງ ໃນຫຼາຍປະເທດໃນທະວີບເອີລົບ ໂດຍສະເພາະແມ່ນປະເທດທີ່ເຄີຍເປັນພາກສ່ວນຂອງອະດີດສະຫະພາບໂຊຫວຽດ. ລັດເຊຍ ເປັນປະເທດໜຶ່ງ ທີ່ມີປະຫວັດສາດທີ່ໜ້າສົນໃຈ, ວັດທະນະທໍາທີ່ງົດງາມ, ວັນນະຄະດີທີ່ອຸດົມສົມບູນ ແລະ ວິທະຍາສາດທີ່ກ້າວໜ້າ. ດັ່ງນັ້ນ, ການຮຽນພາສາລັດເຊຍ ຈະຊ່ວຍໃຫ້ມີຄວາມເຂົ້າໃຈໃນປະເທດລັດເຊຍ ຢ່າງເລິກເຊິ່ງ ແລະ ເປັນປະໂຫຍດໃຫ້ແກ່ການສື່ສານ ແລະ ສຶກສາແລກປ່ຽນຄວາມຮູ້.
ສາຂານີ້ຮຽນກ່ຽວກັບພື້ນຖານພາສາລັດເຊຍ ນັບຕັ້ງແຕ່ ພະຍັນຊະນະ, ການຜັນສຽງ, ຫຼັກໄວຍະກອນ, ການນຳໃຊ້ຄຳ ແລະ ການສ້າງປະໂຫຍກ ໄປຈົນເຖິງ ທັກສະໃນການຕິດຕໍ່ສື່ສານ ເຊັ່ນ: ການສົນທະນາໃນຊີວິດປະຈໍາວັນ, ການແນະນໍາຕົນເອງ. ນອກຈາກນີ້, ຍັງຈະໄດ້ຮຽນຮູ້ກ່ຽວກັບ ເສດຖະກິດ, ລະບົບການສຶກສາ, ວັນນະຄະດີ, ວັດທະນະທໍາ, ປະຫວັດສາດ ແລະ ການເມືອງ-ການປົກຄອງ ຂອງປະເທດລັດເຊຍ; ພ້ອມທັງຮຽນຮູ້ກ່ຽວກັບ ທິດສະດີການແປ ແລະ ການສອນພາສາລັດເຊຍ.
ການສິດສອນແມ່ນອີງໃສ່ທັງພາກທິດສະດີ ແລະ ປະຕິບັດຕົວຈິງຄຽງຄູ່ໄປນໍາກັນ ໂດຍນັກສຶກສາຈະໄດ້ມີການຝຶກການຟັງ, ການອ່ານ, ການຂຽນ, ການສົນທະນາ ພາຍໃນຫ້ອງຮຽນເປັນປະຈໍາ; ມີການລົງຝຶກງານນໍາບໍລິສັດ ຫຼື ຫ້ອງການຕ່າງໆທີ່ນໍາໃຊ້ພາສາລັດເຊຍ; ມີການເຂົ້າຮ່ວມການສໍາມະນາ ແລະ ຝຶກອົບຮົມຈາກອົງການຕ່າງໆ ເປັນຕົ້ນ. ນອກຈາກນັ້ນ, ນັກສຶກສາຍັງມີໂອກາດ ພັດທະນາທັກສະໃນການປາກເວົ້າ ຜ່ານການສົນທະນາກັບອາສາສະໝັກທີ່ເປັນເຈົ້າຂອງພາສາໂດຍກົງ.
ຄວາມຮູ້ພື້ນຖານ ດ້ານພາສາຕ່າງປະເທດ ເຊັ່ນ: ພາສາອັງກິດ ຫຼື ພາສາຝຣັ່ງ; ເປັນຄົນ ມີຄວາມກະຕືລືລົ້ນໃນການຊອກຮູ້, ມີຄວາມພະຍາຍາມ, ມີວິໄສທັດກວ້າງໄກ ແລະ ມີໃຈຮັກໃນການຮຽນຮູ້ສີ່ງໃໝ່ໆ; ມີຄວາມສົນໃຈໃນ ພາສາ, ວັນນະຄະດີ, ວັດທະນະທຳ, ເສດຖະກິດ ແລະ ຊີວິດການເປັນຢູ່ຂອງ ຄົນລັດເຊຍ.
ທັກສະ 4 ດ້ານ ໃນການສື່ສານ ພາສາລັດເຊຍ ເຊັ່ນ: ການເວົ້າ, ຟັງ, ອ່ານ ແລະ ຂຽນ; ທັກສະ ການສອນ ພາສາລັດເຊຍ; ສາມາດນຳໃຊ້ຄວາມຮູ້ດ້ານພາສາ ເຂົ້າໃນການນໍາທ່ຽວ ແລະ ການແປ; ມີຄວາມເຂົ້າໃຈກ່ຽວກັບ ວັດທະນະທໍາ ແລະ ຄວາມຮູ້ຕ່າງໆກ່ຽວກັບ ລັດເຊຍ ແລະ ສາມາດ ສົມທຽບ, ເລືອກເຟັ້ນ, ແລະ ໝູນໃຊ້ ຄວາມຮູ້ດັ່ງກ່າວເຂົ້າໃນວຽກງານທີ່ກ່ຽວຂ້ອງ.
ໝວດຄວາມຮູ້ພື້ນຖານວິຊາສະເພາະ:
- ການຜັນສຽງພາສາລັດເຊຍ
- ພາສາລັດເຊຍທົ່ວໄປ
- ວິທີສອນພາສາລັດເຊຍ
- ພາສາລັດເຊຍສໍາລັບການນໍາທ່ຽວ
ໝວດວິຊາສະເພາະ
- ຝຶກຫັດໄວຍະກອນ
- ອັກຂະຫຼະວິທະຍາ
- ຄໍາສັບວິທະຍາ
- ການປະກອບສ້າງຄໍາສັບ
- ພື້ນຖານພາສາສາດລັດເຊຍ
- ສັບທະສິນສາດ
- ວະຈິວິພາກພາສາລັດເຊຍ
- ພາສາລັດເຊຍປັດຈຸບັນ
- ວັນນະຄະດີລັດເຊຍ
- ວັນນະຄະດີໂຊຫວຽດ
- ວິເຄາະບົດປະພັນ
- ອະລິຍະທໍາ
- ທິດສະດີການແປພາສາລັດເຊຍ
- ພາສາລັດເຊຍສະເພາະດ້ານ
Leave A Comment