ສະພາບແວດລ້ອມຜັງເມືອງ

ສະພາບແວດລ້ອມຜັງເມືອງ​ແມ່ນສະພາບ​ແວດ​ລ້ອມທາງ​ດ້ານ​ເສດຖະກິດ-ສັງຄົມທີ່​ເປັນ​ປັດ​ໄຈ​ຕໍ່​ການ​ຂະຫຍາຍຕົວ ແລະ ການ​ສ້າງ​ຕົວ​ເມືອງ​ທີ່​ໜ້າ​ຢູ່, ລວມທັງ​ສິ່ງ​ແວດ​ລ້ອມທາງ​ວັດທະນາ​ທຳ ​ແລະ ສິ່ງ​ແວດ​ລ້ອມທາງ​ທຳ​ມະ​ຊາດ. ການ​ວາງ​ແຜນ ​ແລະ ຄຸ້ມ​ຄອງ​ສະພາບ​ແວດ​ລ້ອມ​ຜັງ​ເມືອງທີ່ມີ​ປະສິດທິພາບມີ​ຄວາມ​ສຳຄັນຕໍ່​ການກຳນົດ​ແຜນ​ພັດທະນາຕົວເມືອງ​ໃຫ້​ມີ​ຄວາມຍືນຍົງ ​ແລະ ສາມາດ​ຕອບ​ສະໜອງ​ຄວາມ​ຕ້ອງການ​​ທາງ​ດ້ານ​ເສດຖະກິດ ​ແລະ ສັງຄົມທີ່ມີການຂະຫຍາຍຕົວ.

ວິຊາ​ນີ້​ຮຽນກ່ຽວກັບບັນດາ​ວິທີ​ການ​​ໃນ​ການວາງແຜນ ແລະ ການຄຸ້ມຄອງຕົວເມືອງ, ສຶກສາສະພາບແວດລ້ອມເສດຖະກິດ ແລະປັດໄຈທີ່ເຮັດໃຫ້ຕົວເມືອງມີການຂະຫຍາຍຕົວ, ປັດໃຈທາງສັງຄົມທີ່ສົ່ງຜົນຕໍ່ການສ້າງຕົວເມືອງທີ່ໜ້າຢູ່, ການປົກປັກຮັກສາ ແລະ ສົ່ງເສີມຄຸນຄ່າຂອງມໍລະດົກວັດທະນະທຳ, ເງື່ອນໄຂສະພາບແວດລ້ອມທຳມະຊາດ, ການປ່ຽນແປງຂອງດິນຟ້າອາກາດ ເພື່ອສ້າງສະພາບແວດລ້ອມສິ່ງປຸກສ້າງທີ່ເປັນມິດກັບສິ່ງແວດລ້ອມ.

​ການສິດສອນວິຊາ​ນີ້​​ແມ່ນປະສົມ​ປະສານ​ການຮຽນທິດສະດີ ​ແລະ ເນັ້ນໜັກການສອນທັກສະການຮຽນຮູ້ດ້ວຍຕົນເອງໃຫ້ແກ່ນັກສຶກສາ ​ໂດຍຜ່ານ​ການປະຕິບັດຕົວຈິງ​ເຊັ່ນ: ການ​ຈຳລອງ​ສະພາບ​ແວດ​ລ້ອມ​ຜັງ​ເມືອງ, ວາງ​ແຜນ ​ແລະ ອອກ​ແບບ​ໂຄງ​ສ້າງ​ທາງ​ສະຖາປັດຕະຍາ​ກຳ ​ແລະ ສະພາບ​ແວດ​ລ້ອມ​ພາຍ​ໃນ​ອາຄານ​ເປັນ​ຕົ້ນ.​

ນັກສຶກສາ​ທີ່​ຮຽນສາຂາ​ນີ້​ຄວນ​ມີຄວາມສົນໃຈກ່ຽວກັບການວາງ​ແຜນ​, ອອກ​ແບບ ແລະ ການພັດທະນາຕົວເມືອງ, ມີ​ທັກ​ສະ​ໃນ​ການ​ວິ​ເຄາະ​ບັນຫາ, ການ​ຮັບ​ຟັງ ​ແລະ ການ​ປັບ​ຕົວ​ເຂົ້າ​ກັບ​ສະພາບ​ແວດ​ລ້ອມ​ອ້ອມ​ຂ້າງ, ມີ​ຫົວຄິດ​ປະດິດ​ສ້າງ ​ແລະ ພື້ນຖານ​ທາງ​​ດ້ານ​ການ​ແຕ້ມ ​ແລະ ການ​ຄິດ​ໄລ່. 

ນັກ​ສຶກສາທີ່​ຈົບ​ຈາກ​ພາກ​ວິຊາ​ນີ້​ຈະ​ມີ​ຄວາມສາມາດ​ໃນ​ການ​ວິ​ເຄາະ​ປັດ​ໄຈ​ຕ່າງໆ​ທີ່​ມີ​ຜົນ​ຕໍ່​ການ​ພັດທະນາ​ຕົວ​​ເມືອງ,​ ສາ​ມາດອອກແບບ, ວາງແຜນ ​ແລະ ພັດທະນາ​ຕົວ​ເມືອງ ​ໂດຍ​ນຳ​ໃຊ້​ເຕັກ​ໂນ​ໂລ​ຊີ​ທີ່​ເໝາະ​ສົມ. ມີທັກ​ສະໃນການນຳສະເໜີຄວາມຄິດດ້ວຍຄຳເວົ້າ, ການຂຽນ, ການແຕ້ມດ້ວຍມື, ດ້ວຍຄອມພິວເຕີ 2D ແລະ 3D  ແລະ ດ້ວຍຫຸ່ນຈຳລອງ.

ສາມາດ​ປະກອບ​ອາຊີບ​ເປັນ​ນັກ​ວິສະວະກອນ​ ຫຼື ທີ່​ປຶກສາ​ທາງ​ດ້ານ​ການອອກ​ແບບ​ພັດທະນາ​ຕົວ​ເມືອງ​ຢູ່​ອົງ​ກອນຕ່າງໆ​ທັງພາກລັດແລະເອກະຊົນເຊັ່ນ: ຂະ​ແໜງໂຍທາທິການ ແລະ ການຂົນສົ່ງ, ຂະ​ແໜງການອະນຸລັກມໍລະດົກວັດທະນະທຳ-ທ່ອງທ່ຽວ, ອົງການພັດທະນາສາກົນ, ຫ້ອງການວາງແຜນອອກແບບຜັງເມືອງ. ​ເປັນອາຈານ​ສອນ​ກ່ຽວກັບສະຖາປັດຕະຍາ​ກຳ​ສາດ ແລະ ຜັງເມືອງ.