ການຄ້າ
ການຄ້າໝາຍເຖິງການດຳເນີນທຸລະກິດການຄ້າ(ການນຳເຂົ້າ-ການສົ່ງອອກ)ແລະ ການລົງທຶນພາຍໃນ ແລະ ຕ່າງປະເທດ. ສາຂາການຄ້າມີຄວາມສຳຄັນຕໍ່ກັບເສດຖະກິດລາວໃນປັດຈຸບັນທີ່ມີການສົ່ງເສີມການພົວພັນການຄ້າທັງພາຍໃນ ແລະ ຕ່າງປະເທດ. ນອກນັ້ນ, ການທີ່ປະເທດລາວເຮົາໄດ້ເຂົ້າເປັນສະມາຊິກຂອງອົງການການຄ້າໂລກໃນປີ 2013 ທີ່ຜ່ານມາ, ໄດ້ສະແດງໃຫ້ເຫັນວ່າ ນີ້ຄືຍຸກສະໄໝແຫ່ງການເປີດກວ້າງການຄ້າເສລີບໍ່ວ່າຈະເປັນພາຍໃນ, ພາກພື້ນ ແລະ ໃນຂອບເຂດທົ່ວໂລກ.
ສາຂານີ້ສຶກສາກ່ຽວກັບ ການຄ້າ ແລະ ການລົງທຶນລະຫວ່າງປະເທດ ໃນນັ້ນ ນັກສຶກສາຈະໄດ້ຮຽນກ່ຽວກັບ: ບັນດານິຍາມທິດສະດີຂອງການຄ້າ ແລະ ການລົງທຶນລະຫວ່າງປະເທດ, ລັກສະນະຂອງການຄ້າປະເພດຕ່າງໆ (ການຄ້າເສລີ, ການຄ້າທີ່ມີການຄຸ້ມຄອງ), ຮູບແບບວິທີການດຳເນີນການຄ້າລະຫວ່າງປະເທດ, ບັນດານະໂຍບາຍການຄ້າຕ່າງໆ ເຊັ່ນ: ການສົ່ງເສີມການສົ່ງອອກ, ການທົດແທນການນຳເຂົ້າ, ຮູບແບບ, ວິທີ ແລະ ລະບົບການຊຳລະສິນຄ້າລະຫວ່າງປະເທດ ແລະ ກົດໝາຍການຄ້າ ເປັນຕົ້ນ.
ວິທີການສິດສອນ ແມ່ນປະກອບມີພາກທິດສະດີ ແລະ ພາກປະຕິບັດຕົວຈິງໄປນຳກັນ ເຊັ່ນ: ພາຍຫຼັງຮ່ຳຮຽນພາກທິດສະດີແລ້ວຮອດປີ 3 ນັກສຶກສາຈະຕ້ອງໄດ້ລົງຝຶກງານຕົວຈິງນຳບັນດາອົງກອນ ແລະ ພາກສ່ວນທີ່ກ່ຽວຂ້ອງທັງພາກລັດ ແລະ ບັນດາບໍລິສັດເອກະຊົນຕ່າງໆ, ພ້ອມມີການເຮັດບົດລາຍງານທີ່ຕິດພັນກັບການປະຕິບັດຕົວຈິງໃນແຕ່ລະວິຊາທີ່ກ່ຽວຂ້ອງ. ນອກຈາກນັ້ນ, ນັກສຶກສາຍັງຈະໄດ້ລົງໄປທັດສະນະສຶກສາຕາມສະຖານທີ່ຕ່າງໆ ພ້ອມທັງຂຽນບົດລາຍງານໂດຍນໍາໃຊ້ຂໍ້ມູນທີ່ໄດ້ຈາກການໄປທັດສະນະຈາກວິຊາດັ່ງກ່າວ.
ຄວາມສົນໃຈທາງດ້ານການຄ້າເປັນພິເສດ, ການເຮັດທຸລະກິດ. ເປັນຄົນ ມີຄວາມຄິດສ້າງສັນ ແລະ ຊ່າງສັງເກດ. ມັກຮຽນພາສາຕ່າງປະເທດ, ມັກການຕິດຕໍ່ພົວພັນກັບຄົນຈາກຫຼາກຫຼາຍວັດທະນະທຳ, ມັກອ່ານຂ່າວ, ມັກການຄຳນວນຄິດໄລ່, ມັກຮຽນຮູ້ສິ່ງໃໝ່ໆທີ່ເກີດຂຶ້ນຮອບຕົວ ແລະ ວິເຄາະສະຖານະພາບຂອງເສດຖະກິດສັງຄົມໃນຍຸກປັດຈຸບັນ.
ນັກສຶກສາສາມາດປະກອບອາຊີບເປັນນັກວິຊາການສັງກັດໃນກະຊວງອຸດສາຫະກຳ ແລະ ການຄ້າ, ເປັນນັກຄົ້ນຄວ້າ, ບັນດາອົງການລະຫວ່າງປະເທດທີ່ມີການພົວພັນທາງເສດຖະກິດ ຫຼື ພະນັກງານວິຊາການຂອງບໍລິສັດທີ່ນຳເຂົ້າ ແລະ ສົ່ງອອກຕ່າງໆ. ນອກຈາກນັ້ນ, ຍັງສາມາດເຂົ້າເຮັດວຽກທີ່ກະຊວງແຜນການ ແລະ ການລົງທຶນ ໃນຕໍາແໜ່ງວິຊາການພິຈາລະນາໂຄງການລົງທຶນທັງພາຍໃນ ແລະ ຕ່າງປະເທດ.
- ຄະນິດສາດ
- ການເມືອງ
- ຈິດຕະວິທະຍາທົ່ວໄປ
- ສະຖິຕິ
- ເສດຖະສາດຈຸລະພາກ
- ເສດຖະສາດມະຫາພາກ
- ພາສາອັງກິດທົ່ວໄປ
- ຄອມພິວເຕີ
- ພາສາອັງກິດສຳລັບເສດຖະສາດ-ການຄ້າ
- ເສດຖະສາດປຽບທຽບ
- ເສດຖະສາດອາຊີ
- ເສດຖະສາດອຸດສາຫະກຳແລະນະໂຍບາຍ
- ເສດຖະກິດໂລກ
- ເສດຖະສາດລະຫວ່າງປະເທດ
- ການຄ້າພາຍໃນ
- ການຄ້າຊາຍແດນ
- ເສດຖະມິຕິ
- ການວາງແຜນແລະປະເມີນໂຄງການ
- ກົດໝາຍການຄ້າລະຫວ່າງປະເທດ
- ການຕະຫຼາດລະຫວ່າງປະເທດ
- ການເງິນລະຫວ່າງປະເທດ
- ການຮ່ວມມືທາງເສດຖະກິດແລະການເຈລະຈາ
- ຕະຫຼາດຫຼັກຊັບ
- ທັດສະນະສຶກສາແລະການຝຶກງານ
- ເສດຖະສາດການລົງທຶນລະຫວ່າງປະເທດ
- ວິທີວິໄຈ
- ເສດຖະສາດຂົນສົ່ງແລະການປະກັນໄພ
- ການຄ້າເສລີອາຊຽນແລະອົງການການຄ້າ
- ການຊຳລະຄ່າສິນຄ້າລະຫວ່າງປະເທດ
- ເສດຖະສາດທຸລະກິດ
- ເສດຖະສາດເງິນຕາແລະທະນາຄານ
- ທິດສະດີພາສີອາກອນ
- E-Commerce
- ບັນຊີທົ່ວໄປ
- ບົດໂຄງການຈົບຊັ້ນ
Leave A Comment