ພາສາຫວຽດນາມ
ພາສາຫວຽດນາມ ແມ່ນ ພາສາໜຶ່ງທີ່ມີການນໍາໃຊ້ເພີ່ມຂຶ້ນໃນປະເທດລາວ ຍ້ອນການເຕີບໂຕຂອງລະບົບເສດຖະກິດ-ສັງຄົມ ຂອງປະເທດຫວຽດ. ພາສາຫວຽດນາມ ມີຄວາມສຳຄັນຫຼາຍ ຕໍ່ການຮັດແໜ້ນສາຍສຳພັນ ແລະ ການຮ່ວມມື ລະຫວ່າງ ປະເທດລາວ ແລະ ຫວຽດນາມ ທັງໃນດ້ານເສດຖະກິດ ແລະ ວັດທະນະທໍາ-ສັງຄົມ. ນອກຈາກນັ້ນ ຍັງເປັນການສົ່ງເສີມການແລກປ່ຽນຄວາມຮູ້ກັບປະຊາຊົນຫວຽດນາມ ພ້ອມທັງເປັນການເປີດໂລກະທັດໃນການຮຽນຮູ້ ໃຫ້ກວ້າງຂຶ້ນ.
ສາຂານີ້ຮຽນກ່ຽວກັບພາສາຫວຽດນາມທົ່ວໄປ ນັບຕັ້ງແຕ່ ຕົວອັກສອນ, ພະຍັນຊະນະ ແລະ ການອອກສຽງ ໄປຈົນເຖິງທັກສະພື້ນຖານ ເຊັ່ນ: ການອ່ານ, ຟັງ, ເວົ້າ, ຂຽນ, ຫຼັກໄວຍາກອນ, ການນຳໃຊ້ຄຳ ແລະ ປະໂຫຍກເພື່ອການສື່ສານ. ນອກຈາກນີ້, ຍັງຈະໄດ້ສຶກສາ ດ້ານອື່ນໆກ່ຽວກັບປະເທດຫວຽດນາມ ເຊັ່ນ: ປະຫວັດສາດ, ພູມສາດ, ເສດຖະກິດ, ວັດທະນະທໍາ, ນະໂຍບາຍການຕ່າງປະເທດ, ລະບົບການເມືອງ-ການປົກຄອງ. ພ້ອມທັງໄດ້ຮຽນຮູ້ກ່ຽວກັບທິດສະດີ ແລະ ວິທີການແປ ອີກດ້ວຍ.
ການສິດສອນຂອງພາກວິຊານີ້ ແມ່ນປະກອບດ້ວຍການຮຽນກ່ຽວກັບທິດສະດີພາຍໃນຫ້ອງຮຽນ ໂດຍມີການນໍາໃຊ້ສື່ການຮຽນ-ການສອນເພື່ອເພີ່ມຄວາມເຂົ້າໃຈຂອງນັກສຶກສາ ເຊັ່ນ: ການຟັງຈາກຊີດີ, ການອ່ານປຶ້ມ, ວາລະສານ ແລະ ໜັງສືພິມ. ນອກຈາກນີ້, ນັກສຶກສາຍັງຈະໄດ້ປະຕິບັດຕົວຈິງໃນການຂຽນບົດຄວາມ, ບົດປະພັນ ແລະ ບົດລາຍງານຕ່າງໆ ພ້ອມທັງຈະໄດ້ມີໂອກາດລົງຝຶກງານນໍາບໍລິສັດ ຫຼື ຫ້ອງການຕ່າງໆ ທີ່ກ່ຽວຂ້ອງທັງພາຍໃນປະເທດ ແລະ ທີ່ປະເທດເຈົ້າຂອງພາສາໂດຍກົງ.
ຄວາມຮູ້ພື້ນຖານ ດ້ານພາສາຕ່າງປະເທດ ເຊັ່ນ: ພາສາອັງກິດ, ພາສາຝຣັ່ງ, ແລະ ພາສາຫວຽດນາມ ຍິ່ງເປັນການດີ; ເປັນຄົນ ມີວິໄສທັດກວ້າງໄກ, ມັກໃນການສຶກສາຮຽນຮູ້ ພາສາຕ່າງປະເທດ ແລະ ວັດທະນະທໍາໃໝ່ໆ; ແລະ ມີຄວາມສົນໃຈ ໃນການສຶກສາກ່ຽວກັບວັດທະນະທຳ, ເສດຖະກິດ ແລະ ຊີວິດການເປັນຢູ່ ຂອງຄົນຫວຽດນາມ.
ມີຄວາມສາມາດໃນການນຳໃຊ້ພາສາຫວຽດນາມໃນການສື່ສານ ເຊັ່ນ: ການອ່ານ, ຟັງ, ຂຽນ ແລະ ເວົ້າ; ມີຄວາມເຂົ້າໃຈໃນສະພາບເສດຖະກິດ, ວັດທະນະທໍາ, ສັງຄົມ, ວັນນະຄະດີ, ແລະ ການທ່ອງທ່ຽວຂອງຫວຽດນາມ; ສາມາດນຳໃຊ້ພາສາຫວຽດນາມເຂົ້າໃນວຽກງານສະເພາະດ້ານອື່ນໆ ເຊັ່ນ: ການຕິດຕໍ່ພົວພັນ, ການນໍາທ່ຽວ ແລະ ການແປ.
ສາມາດປະກອບອາຊີບໃນຫຼາຍຂະແໜງການທີ່ກ່ຽວຂ້ອງ ເຊັ່ນ: ເປັນອາຈານສອນພາສາຫວຽດນາມ, ພະນັກງານນຳທ່ຽວ, ນັກແປພາສາ; ເປັນພະນັກງານພາຍໃນຫ້ອງການ ທັງໃນພາກ ລັດ, ເອກະຊົນ, ສະຖານທູດ ແລະ ອົງການສາກົນ ທີ່ນໍາໃຊ້ພາສາຫວຽດນາມ. ນອກນັ້ນ, ຍັງສາມາດປະກອບອາຊີບໃນຂະແໜງການສື່ສານມວນຊົນຕ່າງໆ ອີກດ້ວຍ.
ໝວດຄວາມຮູ້ພື້ນຖານວິຊາສະເພາະ:
- ອັກຂະຫຼະວິທີພາສາຫວຽດນາມ
- ວະຈິວີພາກພາສາຫວຽດນາມ
- ກາຍະສໍາພັນພາສາຫວຽດນາມ
- ວັດທະນະທໍາຫວຽດນາມ
- ວັນນະຄະດີຫວຽດນາມ
- ພູມສາດຫວຽດນາມ
- ປະຫວັດສາດຫວຽດນາມ
- ນະໂຍບາຍການພົວພັນຕ່າງປະເທດຂອງຫວຽດນາມ
- ການເມືອງການປົກຄອງຫວຽດນາມ
- ຄວາມຮູ້ກ່ຽວກັບເສດຖະກິດຫວຽດນາມ
- ພາສາລາວໂດຍສັງເຂບ
- ພາສາລາວເພື່ອການສື່ສານ
- ພາສາຕ່າງປະເທດ
ໝວດວິຊາສະເພາະ
- ພາສາຫວຽດນາມ
- ທິດສະດີການແປ
- ແປເອກະສານ
- ການແປລ່າມ
- ທັກສະການຟັງ
- ທັກສະການອອກສຽງ
- ທັກສະການອ່ານ
- ທັກສະການເວົ້າ
- ທັກສະການຂຽນບົດປະເພດຕ່າງໆ
Leave A Comment