ຄຸ້ມຄອງແຫຼ່ງນໍ້າ ແລະ ນຳໃຊ້ທີ່ດິນ
ການຄຸ້ມຄອງແຫຼ່ງນ້ຳ ແລະ ນຳໃຊ້ທີ່ດິນ ໝາຍເຖິງວິທີການບໍລິຫານຈັດການແຫຼ່ງນ້ຳ ແລະ ການວາງແຜນນຳໃຊ້ທີ່ດິນໃຫ້ຖືກຕາມລັກສະນະພູມສັນຖານ ແລະ ໃຫ້ມີການນໍາໃຊ້ແບບຍືນຍົງ. ແຫຼ່ງນ້ຳ ແລະ ທີ່ດິນ ມີຄວາມຈໍາເປັນຕໍ່ການ ດໍາລົງຊີວິດ ແລະ ພັດທະນາເສດຖະກິດໃນຂະແໜງການຕ່າງໆ ເຊັ່ນ: ກະສິກໍາ, ອຸດສາຫະກໍາ ແລະ ພະລັງງານ. ດັ່ງນັ້ນການຮຽນສາຂານີ້ຈະຊ່ວຍສົ່ງເສີມການປົກປັກຮັກສາ ແລະ ໝູນໃຊ້ຊັບພະຍາກອນທຳມະຊາດ ໃຫ້ຍືນຍົງ ແລະ ເກີດປະໂຫຍດສູງສຸດ.
ສາຂາວິຊານີ້ ສຶກສາຄົ້ນຄ້ວາກ່ຽວກັບ ການຄຸ້ມຄອງແຫຼ່ງນ້ຳ ໃຫ້ມີຄວາມອຸດົມສົມບູນ ເປັນຕົ້ນ ແມ່ນການສຶກສາກ່ຽວກັບ ຕົ້ນກໍາເນີດຂອງແຫຼ່ງນໍ້າ ແລະ ການຄຸ້ມຄອງອ່າງໂຕ່ງ; ການວາງແຜນນໍາໃຊ້ທີ່ດິນໃຫ້ແທດເໝາະກັບສະພາບພື້ນທີ່ ເຊັ່ນ: ການຈັດແຈງພື້ນທີ່ດິນສໍາລັບການຜະລິດກະສິກຳ, ອຸດສາຫະກຳ, ການຄຸ້ມຄອງປ່າສະຫງວນ, ການຄຸ້ມຄອງຊີວະນາໆພັນ ແລະ ປົກປັກຮັກສາຊັບພະຍາກອນທຳມະຊາດ ແລະ ສິ່ງແວດລ້ອມໃຫ້ຖືກວິທີ.
ວິທີການສິດສອນປະກອບມີ ພາກທິດສະດີ ແລະ ພາກປະຕິບັດຕົວຈິງ ເຊັ່ນ: ການຂຽນບົດລາຍງານແບບກຸ່ມໃນຫົວຂໍ້ທີ່ກ່ຽວຂ້ອງກັບລາຍວິຊາຮຽນ, ສຶກສາວິທີການພັດທະນາຊົນນະບົດ ໂດຍອີງໃສ່ການສົ່ງເສີມການພັດທະນາແບບປະສົມປະສານ ໂດຍໃຫ້ປະຊາຊົນມີສ່ວນຮ່ວມ, ລົງເກັບກໍາຂໍ້ມູນ ແລະ ສັງເກດວິທີການຄຸ້ມຄອງແຫຼ່ງນໍ້າ ແລະ ການນໍາໃຊ້ທີ່ດິນ, ວິເຄາະ-ວິໄຈ ຄຸນນະພາບດິນ ແລະ ນ້ຳ ໂດຍຜ່ານການເກັບກໍາຂໍ້ມູນພາກສະໜາມ.
ຮູ້ວິທີການນຳໃຊ້ແຜນທີ່, ສ້າງແບບແຜນການຈັດສັນຄຸ້ມຄອງປ່າໄມ້, ບໍລິຫານ ແລະ ຄຸ້ມຄອງແຫຼ່ງນໍ້າ ແລະ ນໍາໃຊ້ທີ່ດິນ; ສາມາດນຳໃຊ້ໂປຣແກຣມກ່ຽວກັບການສຳຫຼວດປ່າໄມ້ ແລະ ການນໍາໃຊ້ທີ່ດິນແບບສາມມິຕິ; ຮູ້ວິທີແປຂໍ້ມູນ ແລະ ນໍາໃຊ້ຂໍ້ມູນພາບຖ່າຍທາງອາກາດເຂົ້າໃນວຽກງານຕິດຕາມກວດກາ ແລະ ສໍາຫຼວດພື້ນທີ່ ແລະ ຮູ້ວິທີການວິເຄາະ-ວິໄຈດິນ ແລະ ນ້ຳ.
ເປັນນັກສໍາຫຼວດ, ຄຸ້ມຄອງ ແລະ ອານຸລັກແຫຼ່ງນໍ້າ, ດິນ ແລະ ປ່າໄມ້; ເປັນທີ່ປຶກສາດ້ານການຄຸ້ມຄອງແຫຼ່ງນ້ຳ ແລະ ການນໍາໃຊ້ທີ່ດິນ, ເປັນພະນັກງານໃນຂະແໜງການທີ່ກ່ຽວຂ້ອງທັງພາກລັດ ແລະ ເອກະຊົນ ເຊັ່ນ: ກະຊວງກະສິກຳ ແລະ ປ່າໄມ້, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ຄະນະກຳມະການແມ່ນ້ຳຂອງ (MRC) ແລະ ອື່ນໆ.
- ໝວດພື້ນຖານວິຊາສະເພາະ
- ພືດສາດ
- ເຄມີສິ່ງແວດລ້ອມ
- ອຸຕຸນິຍົມວິທະຍາ
- ວາງແຜນ ແລະຄຸ້ມຄອງໂຄງການ
- ນິເວດວິທະຍາປ່າໄມ້
- ປ້ອງກັນປ່າ
- ນິຕິກໍາປ່າໄມ້
- ວິທະຍາຕົ້ນໄມ້ໃຫຍ່
- ນະໂຍບາຍ ແລະ ຍຸດທະສາດປ່າໄມ້
- ສໍາຫຼວດ ແລະແຕ້ມແຜນທີ່
- ສັງຄົມວິທະຍາ
- ສຶກສາສິ່ງແວດລ້ອມ
- ເສດຖະສາດພື້ນຖານ
- ການບັນຊີ
- ໝວດວິຊາສະເພາະ
- ຄຸ້ມຄອງເຄື່ອງປ່າຂອງດົງ
- ຄຸ້ມຄອງປ່າສະຫງວນ
- ຄຸ້ມຄອງຊີວະນາໆພັນ
- ການຄຸ້ມຄອງດິນບໍລິເວນນໍ້າ
- ກະສິກໍາ ແລະ ປ່າໄມ້
- ຄຸ້ມຄອງປ່າໄມ້ຊຸມຊົນ
- ພາບຖ່າຍທາງອາກາດ
- ເສດຖະສາດຊັບພະຍາກອນປ່າໄມ້
- ຄຸ້ມຄອງທີ່ດິນ
- ວິທະຍາສາດດິນ
- ວິທະຍາວັດແທກໄມ້
- ເສດຖະສາດຊົນນະບັດ
- ຄຸ້ມຄອງສັດປ່າ
- ຈັດສັນຄຸ້ມຄອງແຫຼ່ງນໍ້າ
- ສົ່ງເສີມ ແລະ ພັດທະນາຊົນນະບົດ
- ການບໍລິຫານທີ່ດິນ
- ວະນະວັດປ່າທໍາມະຊາດ
- ສຳຫຼວດຊັບພະຍາກອນປ່າໄມ້ລະບົບຂໍ້ ມູນຂ່າວສານທາງພູມສາດ
- ອຸທົກກະສາດປ່າໄມ້
- ປະເມີນຜົນກະທົບຕໍ່ສິ່ງແວດລ້ອມ ແລະ ສັງຄົມ
- ຊີວະພູມສາດ
Leave A Comment