ວິສະວະກຳເອເລັກໂຕນິກ

ວິສະວະກຳອີເລັກໂຕນິກ ​ແມ່ນ​ການສືກສາ ແລະ ​ນໍາ​ໃຊ້​ອຸປະກອນ​ອີ​ເລັກ​ໂຕນິກ​ເຂົ້າ​ໃນ​ການ​ອອກ​ແບບ​ວົງ​ຈອນ ​ໃຫ້​ສາມາດ​ທໍາ​ງານ​ໄດ້​ຕາມ​ຄວາມ​ຕ້ອງການ​ເຊັ່ນ ລະບົບ​ຄວບ​ຄຸມ​ໄຟ​ຈະລາ​ຈອນ, ປ້າຍ​ໂຄສະນາ LED ​ເຄື່ອນ​ໄຫວ, ລະບົບ​ສາຍ​ການ​ຜະລິດ​ໃນ​ໂຮງງານຕ່າງໆ. ​ໃນ​ທຸກໆລະບົບ​ຂອງ​ເຄື່ອງ​ໃຊ້​ໄຟຟ້າ, ລະບົບ​ຄວບ​ຄຸມ​ອັດຕະ​ໂນ​ມັດ ​ແມ່ນ​ຈະ​ຕ້ອງ​ມີວົງ​ຈອນ​ອີ​ເລັກ​ໂຕນິກປະກອບ​ເຂົ້ານໍາ ບໍ່ວ່າ​ຈະ​ເປັນ​ການ​ປະຢັດ​ພະລັງງານ ​ແລະ ສາມາດນໍາ​ໃຊ້​ໄດ້​ສະດວກ​ສະບາຍ.

ຮຽນກ່ຽວກັບຄຸນລັກສະນະພື້ນຖານ, ການ​ທໍາ​ງານ ແລະ ການປະຍຸກໃຊ້ງານອຸປະກອນສານ​ເຄິ່ງຕົວ​ນໍາ ​ເພື່ອ​ປະກອບ​ເຂົ້າ​ເປັນ​ວົງ​ຈອນ​ອີ​ເລັກ​ໂຕນິກ ທີ່ສາມາດທໍາງານໄດ້ຕາມຄວາມຕ້ອງການ ປະຢັດພະລັງງານ ທັນສະໄໝ ອັດຕະໂນມັດ ແລະ ເພີ່ມປະສິດທິພາບການທໍາງານໃຫ້ກັບລະບົບ ເຊັ່ນ: ລະບົບເຕືອນອັກຄີໄພ, ລະບົບເກັບກໍາຂໍ້ມູນ, ລະບົບການກະເສດແບບໃໝ່, ຫຸ່ນຍົນ, ລະບົບສາຍພານການລໍາລຽງໃນໂຮງງານ, ສັນຍານກັນຂະໂມຍ ແລະ ອື່ນໆ.

ຮຽນທິດສະດີພື້ນຖານໂດຍລວມ ກ່ອນຮຽນການອອກແບບລະດັບຂັ້ນສູງ. ຫຼັງຈາກນັ້ນ ຈະກ້າວເຂົ້າສູ່ການປະຕິບັດຕົວຈິງ​ເຊັ່ນ: ອອກ​ແບບ​ວົງ​ຈອນ​ອີ​ເລັກ​ໂຕນິກ, ຕໍ່ວົງ​ຈອນ ​ແລະ ທົດ​ສອບການ​ທໍາ​ງານ, ແຕ້ມແບບແຜນວົງຈອນ, ຂຽນໂປຣແກຣມຄວບຄຸມ ແລະ ທົດສອບຢ່າງລະອຽດກ່ອນທີ່ຈະນໍາໄປທົດລອງຕິດຕັ້ງຕົວຈິງ. ນັກສຶກສາປີ​ສຸດ​ທ້າຍຍັງຈະໄດ້ເຮັດວຽກເປັນກຸ່ມເພື່ອປະດິດໂຄງງານເຊັ່ນ: ສ້າງລະບົບຄວບຄຸມຜ່ານອິນເຕີເນັດ ຫຼື ມືຖື, ເຄື່ອງມືວັດແທກ, ເຄື່ອງມືກວດຈັບ, ແລະ ອື່ນໆ ທີ່ສາມາດນໍາໃຊ້ເຂົ້າໃນການຮັບໃຊ້ສັງຄົມ.

ຄວາມຮູ້ພື້ນຖານທາງດ້ານວິຊາວິທະຍາສາດເປັນຕົ້ນແມ່ນ ຄະນິດສາດ ​ແລະ ຟິຊິກສາດ; ເປັນຄົນທີ່ມີຄວາມຢາກຮູ້ຢາກເຫັນໃນການການເຮັດວຽກຂອງອຸປະກອນອີເລັກໂຕນິກ, ມີແນວຄິດຢາກປະດິດສ້າງອັນໃດອັນໜຶ່ງດ້ວຍວົງຈອນອີເລັກໂຕນິກ, ມັກທົດລອງ ແລະ ທ້າທາຍໃນສິ່ງໃໝ່, ມີແນວຄິດສ້າງສັນ ແລະ ມັກໃນການຄິດໄລ່.

ມີທັກສະໃນການອອກແບບວົງຈອນອີເລັກໂຕນິກ, ສາມາດຂຽນໂປຣແກຣມຄວບຄຸມລະບົບອັດຕະໂນມັດຕ່າງໆ, ສາມາດຕິດຕັ້ງໄຟຟ້າໃນອາຄານ, ສາມາດສ້ອມແປງອຸປະກອນໄຟຟ້າຕ່າງໆເຊັ່ນ: ແອເຢັນ ຕະຫຼອດເຖິງການຂຽນໂປຣແກຣມຄວບຄຸມທີ່ຖືກນຳໃຊ້ໃນໂຮງຈັກໂຮງງານອຸດສາຫະກຳຕ່າງໆ.

ສາມາດປະກອບ​ອາຊີບເປັນ ຜູ້ຄວບຄຸມລະບົບອັດຕະໂນມັດໃນໂຮງຈັກ, ໂຮງງານ; ເປັນຊ່າງເຕັກນິກທີ່ຮັບຜິດຊອບເບິ່ງແຍງດູແລ, ສ້ອມແປງ ເຄື່ອງອີເລັກໂຕນິກຢູ່ສະໜາມບິນ, ເປັນຜູ້ຊ່ຽວຊານໃນການອອກແບບຕາຂ່າຍໄຟຟ້າ ແລະ ສາມາດປະກອບທຸລະກິດທາງດ້ານການສ້ອມແປງຄອມພິວເຕີ, ເຄື່ອງອີເລັກໂຕນິກ ​ແລະ ເປັນອາຈານສອນ​ໃນສາຂາ​ທີ່​ກ່ຽວຂ້ອງ.