ຊົນລະປະທານ

ການຊົນລະປະທານ ໝາຍເຖິງ ການບໍລິຫານນໍ້າ (ການກັກເກັບ, ຮັກສາ, ຄວບຄຸມ, ສົ່ງ, ລະບາຍ ຫຼື ແບ່ງນ້ຳ) ເພື່ອນຳໃຊ້ເຂົ້າໃນການກະເສດ, ການສ້າງພະລັງງານ, ວຽກງານອຸດສາຫະກຳ ແລະ ການປ້ອງກັນຄວາມເສຍຫາຍທີ່ອາດເກີດມາຈາກນ້ຳ, ການຄົມມະນາຄົມທາງນ້ຳທີ່ຢູ່ໃນເຂດພື້ນທີ່ຊົນລະປະທານ ແລະ ການບັນເທົາໄພນ້ຳຖ້ວມ ເຊິ່ງການຊົນລະປະທານ ຍັງມີຄວາມສໍາຄັນຕໍ່​ການສະໜອງນ້ຳໃຫ້ແກ່ການຜະລິດກະສິກຳ ອັນເປັນໜຶ່ງໃນແຫຼ່ງລາຍຮັບ ຂອງຊາດ.

ສາຂານີ້ຮຽນ ກ່ຽວກັບ ວຽກງານທາງດ້ານຊົນລະປະທານ ເພື່ອສະໜອງນ້ຳໃຫ້ແກ່ວຽກງານກະສິກໍາ ແລະ ອຸດສະຫະກຳເຊັ່ນ: ການອອກແບບຊົນລະປະທານລະດັບນ້ຳໄຮ່ນາ, ການວາງແຜນລະບົບແຈກຢາຍນ້ຳ, ການອອກແບບລະບົບຈັກສູບນ້ຳ, ລະບົບຊົນລະປະທານກັບສິ່ງແວດລ້ອມ, ການອອກແບບເຂື່ອນຂະໜາດນ້ອຍ, ການຫຼຸດຜ່ອນຄວາມສ່ຽງຕໍ່ໄພນໍ້າຖ້ວມຄຽງຄູ່ກັບການຮຽນຮູ້ວິທີການວິໄຈສະເພາະດ້ານ, ການແຕ້ມແຜນທີ່ພູມສາດ ແລະ ແຜນທີ່ໆດິນ ເປັນຕົ້ນ.

ນັກສຶກສາຈະໄດ້ຮຽນທິດສະດີພຶ້ນຖານ ກ່ຽວກັບວຽກງານວິສະວະກຳເຊັ່ນ: ທິດສະດີການສຳຫຼວດ, ການວິເຄາະໂຄງສ້າງ, ພື້ນຖານຄອມພິວເຕີ, ທໍລະນີສາດວິສະວະກຳ ແລະ ອື່ນໆ ເພື່ອໃຫ້ນັກສຶກສາມີຄວາມເຂົ້າໃຈ ກ່ຽວກັບ ສ່ວນປະກອບຂອງວັດສະດຸທີ່ຈະຖືກນຳໃຊ້ເຂົ້າວຽກງານຊົນລະປະທານ. ນັກສຶກສະຈະໄດ້ຮຽນພາກປະຕິບັດຕົວຈິງ ໂດຍຮຽນຮູ້ຜ່ານການທົດລອງຄວາມທົນທານຂອງເບຕົງ, ເຫຼັກ ແລະ ດິນ ພ້ອມທັງການທັດສະນະສຶກສາ ແລະ ຝືກງານຕາມເຂື່ອນຕ່າງໆ.

ມີຄວາມຮູ້ພື້ນຖານ ແໜ້ນດ້ານວິຊາຟີຊິກສາດ ແລະ ຄະນິດສາດ. ເປັນຄົນ ທີ່ມີຄວາມອົດທົນ ແລະ ມັກການເຮັດວຽກຕົວຈິງນອກສະຖານທີ່. ມີຄວາມສົນໃຈ ໃນການອອກແບບດ້ານວິສະວະກຳຕົວຢ່າງ ການອອກແບບຄອງເໝືອງ, ເຂື່ອນ, ຈັກສູບນໍ້າ, ຝາຍນ້ຳລົ້ນ ແລະ ການບໍລິຫານຈັດການນ້ຳຊົນລະປະທານເປັນພິເສດ.

ມີຄວາມສາມາດໃນການອອກແບບຊົນລະປະທານ; ຮູ້ຈັກການວາງແຜນໃນການແຈກຢາຍນ້ຳໃຫ້ທົ່ວເຖິງຕາມເນື້ອທີ່ນາທີ່ໄດ້ຄຳນວນ; ຮູ້ວິທີການລະບາຍນໍ້າ, ການແຕ້ມແຜນທີ່ ແລະ ການວັດແທກທີ່ດິນ; ຮູ້ຈັກນໍາໃຊ້ໂປຣແກຣມຄອມພິວເຕີທີ່​ກ່ຽວ​ພັນ​ກັບ​ການ​ອອກ​ແບບ ແລະ ສາມາດວາງແຜນຄຸ້ມຄອງໂຄງການແລະ ການບໍລິຫານການກໍ່ສ້າງຊົນລະປະທານ.

ເປັນນັກສຳຫຼວດ, ນັກວິຊາການ ຫຼື ນັກອອກແບບ ວັດແທກທີ່ດິນ ຫຼື ຊົນລະປະທານ. ເປັນພະນັກງານໃນພະແນກທີ່ກ່ຽວຂ້ອງກັບຊົນລະປະທານໃນຂັ້ນເມືອງ ແລະ ຂັ້ນແຂວງໃນທົ່ວປະເທດ. ສາມາດປະກອບທຸລະກິດເປັນຂອງຕົນເອງກ່ຽວກັບການສຳຫຼວດ ແລະ ອອກແບບການກໍ່ສ້າງຊົນລະປະທານ.