ວິສະວະກຳກົນຈັກ

ວິສະວະກຳກົນຈັກໝາຍເຖິງວຽກງານການຄຸ້ມຄອງ-ວາງແຜນ ການຜະລິດໃນວຽກງານກົນຈັກ. ໃນນັ້ນການອອກແບບກົນຈັກ, ເຕັກໂນໂລຊີພະລັງງານ ແລະ ວັດສະດຸ ແມ່ນວຽກງານໜຶ່ງທີ່ສຳຄັນທີ່ເຮັດໃຫ້ການຜະລິດສິນຄ້າມີຄຸນະພາບນັບຕັ້ງແຕ່ຫົວໜ່ວຍການຜະລິດພື້ນຖານຈົນເຖິງລະດັບໂຮງງານກົນຈັກທັນສະໄໝ ເຊິ່ງສະແດງໃຫ້ເຫັນວ່ານັກວິຊາການທາງດ້ານການຄຸ້ມຄອງ-ບໍລິຫານ ແລະ ການວາງແຜນການຜະລິດໃນວຽກງານກົນຈັກໃນລະດັບຕ່າງໆ ໃນຂອບເຂດທົ່ວປະເທດຍັງມີຄວາມຕ້ອງການສູງ.

ວິຊານີ້ຮຽນຮູ້ກ່ຽວກັບການຄຸ້ມຄອງບໍລິຫານກົນຈັກ, ເຕັກໂນໂລຊີ ພະລັງງານທົດແທນຕະຫຼອດເຖິງການຄິດຄົ້ນອອກແບບເຄື່ອງກົນຈັກປະເພດຕ່າງໆເພື່ອຕອບສະໜອງຄວາມຕ້ອງການຂອງສັງຄົມເຊັ່ນ: ເຄື່ອງຈັກຕັດຫຍ້າ, ຈັກສູບນ້ຳ, ເຄື່ອງສ້າງພະລັງງານໄຟຟ້າ ແລະ ອື່ນໆ. ນອກຈາກນີ້ ນັກສຶກສາຍັງຈະໄດ້ຮູ້ຈັກ ການອອກແບບນຳໃຊ້ພະລັງງານໃຫ້​ເກີດປະໂຫຍດ, ຮຽນຮູ້ກ່ຽວກັບການນຳໃຊ້ວັດສະດຸເຂົ້າໃນການຜະລິດ ແລະ ການກໍ່ສ້າງ ຕະຫຼອດເຖິງ ການຮຽນຮູ້ ວິທີ​ສ້າງ ພະລັງງານທົດແທນ.

ຮູບແບບການຮຽນຂອງສາຂາວິສະວະກຳກົນຈັກ ແມ່ນນັກສຶກສາຈະໄດ້ຮຽນທິດສະດີ30%ແລະມີການລົງຕົວຈິງໃນຫ້ອງທົດລອງເພື່ອທົດລອງສຶກສາກ່ຽວກັບວັດສະດຸການຜະລິດ ແລະ ອຸດສາຫະກຳເຊັ່ນ: ການສັງເກດການປ່ຽນຮູບໂລຫະ (ເຜົາ, ຕັດ, ຊ່ຽນ),ເຊື່ອມຕໍ່ວັດຖຸເພື່ອໃຫ້ມີຄວາມເຂົ້າໃຈເລິກເຊິ່ງຕໍ່ກັບຄຸນນະພາບຂອງວັດສະດຸກ່ອນທີ່ຈະນຳເຂົ້າໃຊ້ໃນຂັ້ນຕອນການຜະລິດ.ນອກຈາກນັ້ນນັກສຶກສາຍັງຈະໄດ້ລົງຝຶກງານໃນໂຮງງານຫຼອມໂລຫະ,ໂຮງງານອຸດສາຫະກຳຕ່າງໆເພື່ອໃຫ້ຮູ້ຈັກກັບການຜະລິດໂຕຈິງ.

ມີຄວາມຮູ້ພື້ນຖານດ້ານວິຊາທຳມະຊາດ​ເຊັ່ນ:ຄະນິດສາດ, ຟີຊິກສາດ ແລະ ເຄມີສາດ. ຕ້ອງເປັນຄົນມີຄວາມກະຕືລືລົ້ນ, ຊອກຮູ້ອັນໃໝ່ຕະຫຼອດເວລາ,ເປັນຄົນມັກຄິດແລະມັກສັງເກດໂດຍສະເພາະແມ່ນວຽກງານທີ່ຕິດພັນກັບກົນໄກການເຮັດວຽກຂອງເຄື່ອງຈັກຕ່າງໆ, ມີຄວາມອົດທົນ ແລະ ມີແນວຄິດສ້າງສັນ ​ແລະ ມີ​ຄວາມ​ສົນ​ໃຈ​ໃນນະ​ວັດຕະ​ກໍາ​ຕ່າງໆ.

ມີຄວາມສາມາດໃນການອອກແບບເຄື່ອງກົນຈັກເປັນຫຼັກ, ເຂົ້າ​ໃຈ​ກົນ​ໄກ ​ແລະ ການ​ນໍາ​ໃຊ້​ກົນ​ຈັກ​ປະ​ເພດ​ຕ່າງໆ, ຮູ້ຈັກວິທີການຜະລິດ,ຮູ້ຈັກການອອກແບບການນຳໃຊ້ພະລັງງານໃຫ້ເປັນປະໂຫຍດ,ຮູ້ຈັກນຳໃຊ້ສິ່ງເສດເຫຼືອມາສ້າງເປັນພະລັງງານທົດແທນຕະຫຼອດເຖິງການຄວບຄຸມເຄື່ອງກົນຈັກ, ມີທັກ​ສະ​ການ​ບໍາລຸງ​ຮັກສາ ​ແລະ ສ້ອມ​ແປງ​ກົນ​ຈັກ.

ສາມາດເປັນນັກວິສະວະກອນຄວບຄຸມການຜະລິດໃນໂຮງງານອຸດສາຫະກຳໃນທຸກຂະແໜງການ, ນັບຕັ້ງແຕ່ອຸດສາຫະກຳເບົາ (ເຄື່ອງນຸ່ງ, ອາຫານ) ຈົນເຖິງອຸດສາຫະກຳໜັກ (ລົດ, ໂຮງງານເບຍ) ນອກຈາກນັ້ນຍັງສາມາດເປັນນັກວິຊາການ ແລະ ຜູ້ຄວບຄຸມບູລະນະຮັກສາເຄື່ອງຈັກຢູ່ຕາມບໍລິສັດເຂື່ອນໄຟຟ້າ ແລະ ໂຮງຈັກໂຮງງານທຸກປະເພດ ຫຼື​ເປັນ​ອາຈານ​ສອນ​ກໍ່​ໄດ້.