ການຄຸ້ມຄອງຊັບພະຍາກອນນ້ຳ

ການຄຸ້ມຄອງຊັບພະຍາກອນນ້ຳໝາຍເຖິງການຄວບຄຸມປະລິມານແລະລະດັບນ້ຳຂອງແຫຼ່ງນ້ຳແລະການຈັດການໆນໍາໃຊ້ນ້ຳໃຫ້ເກີດປະໂຫຍດສູງສຸດ ໂດຍບໍ່ໃຫ້ເກີດມີຄວາມເສຍຫາຍຕໍ່ຊີວິດການເປັນຢູ່ຂອງປະຊາຊົນ ແລະ ສິ່ງແວດລ້ອມ. ນໍ້າເປັນຊັບພະຍາກອນທີ່ມີອິດທິພົນຕໍ່ການດໍາລົງຊີວິດ ແລະ ຖືກນໍາໃຊ້ເຂົ້າໃນວຽກງານທຸກຂະແໜງການ ດັ່ງນັ້ນ ຈຶ່ງມີຄວາມຈໍາເປັນທີ່ຈະຕ້ອງມີການຈັດການຄຸ້ມຄອງນ້ຳໃຫ້ຖືກນຳໃຊ້ຢ່າງເໝາະສົມ ແລະມີປະສິດທິພາບ.

ວິຊານີ້ແມ່ນຮຽນກ່ຽວກັບການຄຳນວນຄິດໄລ່ນ້ຳເພື່ອການຜະລິດໄຟຟ້ານ້ຳຕົກ, ການວິເຄາະແລະຈັດການຄຸນນະ
ພາບຂອງນ້ຳ, ການບຳບັດນ້ຳເສຍ, ການສົ່ງເສີມການນຳໃຊ້ນໍ້າຢ່າງມີຄຸນຄ່າ, ການຄຸ້ມຄອງແຫຼ່ງນ້ຳ, ການວາງແຜນແລະອອກແບບອາຄານກັກເກັບນ້ຳແລະອາຄານນຳສົ່ງ ເຊິ່ງນັກຮຽນ ຈະໄດ້ຮຽນຮູ້ຫຼັກການພັດທະນາໄຟຟ້ານ້ຳຕົກຕະຫຼອດເຖິງວິທີການປະເມີນຜົນກະທົບທາງສິ່ງແວດລ້ອມແລະການນຳໃຊ້ລະບົບຂໍ້ມູນຂ່າວສານໃນການຄຸ້ມຄອງແຫຼ່ງນ້ຳ.

ຮູບແບບການຮຽນການສອນແມ່ນເລີ່ມຈາກການຮຽນທິດສະດີພື້ນຖານທາງດ້ານວິສະວະກຳທີ່ກ່ຽວພັນກັບຊັບພະຍາກອນນ້ຳເຊັ່ນ: ທໍລະນີວິສະວະກຳ, ກົນລະສາດດິນ, ກົນລະສາດວິສະວະກຳ, ການນຳໃຊ້ໂປຣແກຣມຄອມພິວເຕີເຂົ້າໃນການແຕ້ມແບບຕະຫລອດເຖິງການສຳຫຼວດແລະແຕ້ມແຜນທີ່. ນັກສຶກສາຍັງຈະໄດ້ປະຕິບັດຕົວຈິງ, ໄປທັດສະນະສຶກສາ ແລະ ຝຶກງານກັບພານສ່ວນທີ່ກ່ຽວຂ້ອງ ເພື່ອຮຽນຮູ້ການວັດແທກຄວາມໄວແລະປະລິມານຂອງນ້ຳໃນສະຖານີຕ່າງໆກ່ອນແລະຫຼັງການອອກແບບໂຄງສ້າງຕ່າງໆ.

ມີຄວາມຮູ້ພື້ນຖານດ້ານວິຊາເຄມີສາດແລະຊີວະສາດ. ເປັນຄົນຊ່າງສັງເກດ, ກະຕືລືລົ້ນ, ຮູ້ວິເຄາະຂໍ້ມູນ ແລະ ຄວາມເປັນໄປໄດ້. ມີຄວາມສົນໃຈໃນການຮັກສາສິ່ງແວດລ້ອມ ໂດຍສະເພາະສິ່ງແວດລ້ອມທາງນ້ຳ. ມັກການຄົ້ນຫາແລະທຳຄວາມເຂົ້າໃຈຄວາມເປັນໄປໄດ້ຂອງທຳມະຊາດ ເປັນຕົ້ນ.

ມີຄວາມຮູ້ພື້ນຖານດ້ານການບໍລິຫານຈັດການນໍ້າ;ຮູ້ວິທີການສຶກສາແຫຼ່ງນ້ຳເພື່ອມາຮັບໃຊ້ສັງຄົມ,ວິທີການປ້ອງກັນໄພນ້ຳຖ້ວມ ແລະ ຮັກສາສິ່ງແວດລ້ອມ ແລະ ແຫຼ່ງນໍ້າ;ສາມາດຄຸ້ມຄອງນ້ຳແບບປະສົມປະສານແລະຍືນຍົງ, ປະເມີນຜົນກະທົບທາງສິ່ງແວດລ້ອມກ່ອນແລະຫຼັງການກໍ່ສ້າງ.

ເປັນຜູ້ບໍລິຫານຈັດການນ້ຳຢູ່ຕາມເຂື່ອນໄຟຟ້າຕ່າງໆ, ເປັນນັກວິຊາການ ໃນກົມຊັບພະຍາກອນນ້ຳ, ກົມກອງ ຫຼື ໂຄງການຕ່າງໆທີ່ເຮັດວຽກກ່ຽວຂ້ອງກັບການຮັກສາສິ່ງແວດລ້ອມ,ການພັດທະນາຊຸມຊົນ, ການຄຸ້ມຄອງ-ບໍລິຫານ ແລະ ປົກປັກຮັກສານໍ້າ.